Emĩsyo 10 - AMASAKO ABOYTRTRE WA NYAMUHANGA AWAKAHULAWA MO BIBLIA

Omutunganene akabana obubuya nʼomubi akabana obubi

¹ Emĩsyo ya Solomono. Omugala oyuwite amenge akatsemesaya ĩse; Nĩkwa mugala mũkĩrũ nĩ bũlĩge busana na nyĩnya.

² Ebindu byʼebibi sibyereta ndũndĩ; Nĩkwa eritunganene lĩkalamaya oko luholo.

³ Omwami Mukulu siendisyaleka ekĩrĩmũ kyʼomutunganene erĩkwa enzala, Nĩkwa akakũna hali erisonda lyʼababi.

⁴ Oyukakola omo byala byʼobugata akabya mwera; Nĩkwa ebyala byʼoyuli nʼomũhwa bĩkakanyaya ebindu.

⁵ Oyukakuma-kuma omo mũtũta ni mugala oyuwite amenge; Nĩkwa oyukagotsera omo bugese ni mugala oyukahemula.

⁶ Omũyĩsa ali oko mutwe wʼabatunganene; Nĩkwa omwaga aswĩkĩre obuno bwʼababi.

⁷ Eryibuka lyʼabatunganene nĩ mũyĩsa; Nĩkwa erĩna lyʼababi lyasyahonda.

⁸ Owʼamenge omo mutima asyangirira amategeko; Nĩkwa omũkĩrũ wʼebĩnywa bingi asyawa.

⁹ Oyukalendera omo litunganene akalendera buholo; Nĩkwa Oyũkatalaya esyonzira siwe asyaminyikala.

¹⁰ Oyũkakoheraya omo lĩso akaleta obũlĩge; Nĩkwa omũkĩrũ wʼebĩnywa bingi asyawa.

¹¹ Obuno bwʼomutunganene nĩ ngũnũnũko yʼengebe; Nĩkwa omwaga akaswika obuno bwʼababi.

¹² Obusu bũkatsatsũhaya malwa; Nĩkwa olwanzo lũkakũnĩngĩra amalolo gosĩ.

¹³ Omo mĩnywa yʼoyuwite eriminyerera amenge akabanika; Nĩkwa Omwĩgo ni busana nʼomugongo wʼoyutawite omutima.

¹⁴ Abandu bʼamenge bakabika eriminya; Nĩkwa obuno bwʼabakĩrũ ni ʼhera lya sesene.

¹⁵ Ebindu byʼomũsokĩ nĩ mũyĩ akangatĩre wuwe; Nʼerihera lyʼabera ni bwera bwabo.

¹⁶ Omũbĩrĩ wʼabatunganene akaleta engebe; Erĩkanĩa lyʼababi likaleta amalolo.

¹⁷ Oyũkowa erihabula ali omo nzira yʼengebe; Nĩkwa oyukaleka erikungwa akatala.

¹⁸ Oyũkabĩsa obusu ni wʼemĩnywa yʼeribiha: Nʼoyũkasĩngĩsĩraya nĩ mũkĩrũ.

¹⁹ Omo bungi bwʼebĩnywa sihebula ĩlolo; Nĩkwa oyũkakakĩraya emĩnywa yiwe akakola nʼamenge.

²⁰ Olulimi lʼomutunganene luli ngʼekĩtsĩpa kisombwere; Omutima wʼababi sialigasakĩ.

²¹ Emĩnywa yʼomutunganene ĩkalĩsaya bangi; Nĩkwa abakĩrũ bakahola busana nʼeribula amenge.

²² Omũyĩsa wʼOmwami Mukulu akaleta obuteke; Naye sialitomeka obũlĩge bo kugo.

²³ Oko mũkĩrũ erikola ebibi liri ngʼitsanga; Nʼamenge kwʼane atya oko mundu wʼeriminya.

²⁴ Obuba bwʼababi bwasyamũhĩkako; Nʼabatunganene basyahabwa ebyo bakasonda.

²⁵ Omugulu akanyabungu kakalaba, ababi isibakiriho; Nĩkwa omutunganene ni kibanza kya kera na kera.

²⁶ Ngʼesĩkĩ omo meno, kandi ngʼomũkĩ omo meso, Omugata kwʼali atya oko bakamutuma.

²⁷ Eriubaha lyʼOmwami Mukulu likatomekera ebiro; Nĩkwa emĩtũta yʼababi yasyakehĩbwa.

²⁸ Amaha wʼabatunganene asyabya butseme; Nĩkwa amaha wʼababi asyahera.

²⁹ Enzira yʼOmwami Mukulu ni hakangatĩre hʼoyutunganene; Nĩkwa niʼhera oko bakola-nabi.

³⁰ Abatunganene sĩbendĩsyatũndwa na kera; Nĩkwa ababi sibendĩsyĩkala omo kihugo.

³¹ Obuno bwʼomutunganene bũkahetaya amenge; Nĩkwa olulimi olũkasĩngĩsĩraya lwasyatũbwa.

³² Emĩnywa yʼabatunganene yasĩ ekĩkasĩmawa; Nĩkwa obuno bwʼababi bũkabũga ebĩhengemĩre.