Emiganzo 9 - AMASAKO ABOYTRTRE WA NYAMUHANGA AWAKAHULAWA MO BIBLIA

Ekihano kyʼerĩteya Erikiruka

¹ Kandi Omwami Mukulu mwabũga na Musa omo mbwarara yʼeSĩnaĩ, oko mukera wʼerĩtsũka lyʼomwaka wʼakabiri ĩbamabĩlũa omo kihugo kyʼeMĩsĩrĩ, ati,

² Kandi abana ba Ĩsraelĩ bategaye Erikiruka oko mugulu walyo owahulawa.

³ Oko kiro kyʼerĩkũmĩ nʼebini kyʼomukera oyũ omwʼĩgolo-golo, mwasyateyalyo oko mugulu owahulawa; mwasyateyalyo ngʼebihano byalyo byosĩ, kandi ngʼebilayiro byalyo byosĩ.

⁴ Neryo Musa mwabwira abana ba Ĩsraelĩ, ati bategaye Erikiruka oko mugulu walyo.

⁵ Nabo mobateya Erikiruka oko mukera wʼerĩtsũka, oko kiro kyʼerĩkũmĩ nʼebini kyʼomukera omwʼĩgolo-golo, omo mbwarara yʼeSĩnaĩ ngʼebyosĩ ebyo Mwami Mukulu ahana Musa, abana ba Ĩsraelĩ ko bakola batya.

⁶ Neryo mohabya abandi balume, ababya batsandĩrya busana nʼekĩnda kyʼomundu, neryo mobatatoka erĩteya Erikiruka ekiro ekyo, neryo mobahĩka embere sya Musa na Harũnĩ oko kiro ekyo.

⁷ Nʼabandu abo mobamubwira bati, Ĩtwe tuli batsandĩrya busana nʼekĩnda kyʼomundu; busana nakĩ tũkakakĩrĩbawa situhonge ehongo yʼOmwami Mukulu oko mugulu owahulawa omo katĩkatĩ kʼabana ba Ĩsraelĩ kwehĩ?

⁸ Na Musa mwabwirabo ati, Mulinde, natahulikirira ekyo Mwami Mukulu asyahana busana nenyũ.

⁹ Neryo Omwami Mukulu mwabwira Musa, atĩ,

¹⁰ Ũbũge nʼabana ba Ĩsraelĩ, uti, Omundundi omo katĩkatĩ kenyũ, kutse owʼebihanda byenyũ oyo Wasyabya mũtsandĩrya busana nʼekĩnda, kutse akabya oko lugendo lwʼehali, nomo angabya atya asyateya Erikiruka lyʼOmwami Mukulu.

¹¹ Oko mukera wʼakabiri oko kiro kyʼerĩkũmĩ nʼebini omwʼĩgolo-golo basyateyalyo; basyalyalyo haguma nʼobundu obute mo kĩhamya haguma nʼebiti bĩkalĩhĩre.

¹² Ĩsĩbasĩga kulyo erĩhĩka omo ngyakya, kutse ĩsĩbatwa erĩkũha lya kulyo; basyateyalyo ngʼebilayiro byosĩ byʼErikiruka.

¹³ Nĩkwa omundu oyo werĩre, naye isiali oko lugendo, kandi akasĩgalira okwʼĩteya Erikiruka, omundu oyo asyagabwa oko bandu buwe; kusangwa mwataletera Omwami Mukulu ehongo oko mugulu walyo owahulawa, omundu oyo asyaheka erĩlolo liwe.

¹⁴ Kandi owʼehandi oyukabungira omo katĩkatĩ kenyũ, amasonda erĩteya Erikiruka oko Mwami Mukulu; ngʼekilayiro kyʼErikiruka, kandi ngʼerihana lyalyo, kwʼasyakola atya. Mwasyabya nʼekilayiro kiguma, oko mubunga nʼoko mbutirwa yʼomo kihugo.

Ekĩtũ endata oko Hema

¹⁵ Nʼoko kiro ekyo ahʼerĩĩkala hahanganĩbwa, ekĩtũ mokyayibamba oko hʼerĩĩkala, eyo ye Hema yʼerĩtũlago; kandi omwʼĩgolo-golo mokyabya endata oko hʼerĩĩkala ngʼekĩsosekanĩo kyʼomuliro, erĩhĩka omo ngyakya.

¹⁶ Mokyabya kitya ebiro byosĩ; ekĩtũ mokyayibamba kuho omo musibo, nʼekĩsosekanĩo kyʼomuliro omo kiro.

¹⁷ Nʼoko mugulu ogo ekĩtũ kyasumbawa erĩlũa oko Hema, neryo abana ba Ĩsraelĩ mobahongoka; nʼaho ekĩtũ kyayihanda ahisi, abana ba Ĩsraelĩ mobalaliriraho.

¹⁸ Okwʼihana lyʼOmwami Mukulu abana ba Ĩsraelĩ mobahongoka, nʼokwʼihana lyʼOmwami Mukulu mobahanda ekilaliriro; omugulu ekĩtũ kyayihanda oko hʼerĩĩkala mobĩkala omo kilaliriro.

¹⁹ Omugulu ekĩtũ kyalindirira oko Hema biro bingi, abana ba Ĩsraelĩ mobateya ekilayiro kyʼOmwami Mukulu, mobatahongoka.

²⁰ Nʼoko yindi migulu ekĩtũ kyamabya oko hʼerĩĩkala ko biro bike; neryo ngʼerihana lyʼOmwami Mukulu mobĩkala omo kilaliriro, nʼakandi ngʼerihana lyʼOmwami Mukulu mobahongoka.

²¹ Nʼoko yindi migulu ekĩtũ kyamabyaho erĩtsũka omwʼĩgolo-golo erĩhĩka omo ngyakya; omugulu ekĩtũ kyasumbawa omo ngyakya, mobahongoka; kutse kyamabyaho omo musibo nʼomo kiro, omugulu ekĩtũ kyasumbawa, mobahongoka.

²² Ekĩtũ kyamalindirira endata oko hʼerĩĩkala, kyamaganiraho endata ebiro bibiri kutse mukera kutse mwaka, abana ba Ĩsraelĩ ibabya omo kilaliriro, mobatahongoka; nĩkwa omugulu kyasumbawa, mobahongoka.

²³ Okwʼihana lyʼOmwami Mukulu mobahanda ebilaliriro, nʼokwʼihana lyʼOmwami Mukulu mobahongoka; mobateya ekilayiro kyʼOmwami Mukulu kera, ngʼerihana lyʼOmwami Mukulu busana na Musa.