Emiganzo 8 - AMASAKO ABOYTRTRE WA NYAMUHANGA AWAKAHULAWA MO BIBLIA

Esyotala sirinda syʼahabũyĩrĩre

¹ Neryo Omwami Mukulu mwabũga na Musa, ati,

² Ũbũge na Harũnĩ, umubwire uti, Omugulu ũkakaya esyotala, esyotala sirinda syasyakolerya emuliro wʼekĩhambĩrĩrĩ kyasyo.

³ Na Harũnĩ mwakola atya; mwahanda esyotala syʼaho embere syʼomutagala, ngoko Mwami Mukulu ahana Musa.

⁴ Kandi oyo abya mũbĩrĩ wʼerihesa omutagala, omũbĩrĩ wʼerihesa esyamagetsi, erĩtsũka oko kabuno kago, nʼerĩhĩka oko musanga wago, abya mũbĩrĩ wʼerihesa, ngʼolulengo olo Mwami Mukulu akangaya Musa, kwʼakola omutagala wʼatya.

Eriera lyʼAbalawĩ

⁵ Kandi Omwami Mukulu mwabũga na Musa ati,

⁶ Wĩmaye Abalawĩ omo katĩkatĩ kʼabana ba Ĩsraelĩ, werayebo.

⁷ Litya wasyakolerabo, erisololabo busana nʼerĩeryabo, utsatsange amagetsi wʼerĩhotsya kubo, kandi bayĩkĩraye kʼolugembe oko mubiri wabo gosĩ, beraye esyongimba syabo, neryo basyera.

⁸ Neryo bĩmaye enume yʼende, nʼobuhere bwayo bwʼengano, eyĩsyano yʼenzelele eyĩtũlũngene nʼamagũta; kandi wasyĩmya enume yʼakabiri yʼende busana nʼobuhere bwʼebibi.

⁹ Kandi wasyaleta Abalawĩ embere syʼeHema yʼerĩhĩndanamo; kandi wasyahĩndanĩa endeko yosĩ yʼabana ba Ĩsraelĩ;

¹⁰ neryo wasyaleta Abalawĩ embere syʼOmwami Mukulu. Nʼabana ba Ĩsraelĩ basyahĩra ebyala byabo oko Balawĩ.

¹¹ Na Harũnĩ asyahanganĩa Abalawĩ embere syʼOmwami Mukulu eribya buhere bwʼerĩhũnga-hũngya busana nʼabana ba Ĩsraelĩ, ibatoka erikola omũbĩrĩ wʼOmwami Mukulu.

¹² NʼAbalawĩ basyahĩra ebyala byabo oko mitwe yʼesyonume syʼesyonde; neryo uhonge enguma eribya buhere bwʼebibi, nʼeyindi eribya buhere bwʼerĩokererya, busana nʼOmwami Mukulu, eririha embanulo busana nʼAbalawĩ.

¹³ Kandi wasyahanganĩa Abalawĩ embere sya Harũnĩ nʼembere syʼabagala buwe, erĩhanganĩabo ngʼobuhere bwʼerĩhũngahũngya oko Mwami Mukulu.

¹⁴ Wasyasolola Abalawĩ erĩlũa omo katĩkatĩ kʼabana ba Ĩsraelĩ; nʼAbalawĩ basyabya bage.

¹⁵ Nʼenyũma wʼaho Abalawĩ basyingira erikola omũbĩrĩ wʼeHema yʼerĩhĩndanamo. Nawe wasyeryabo, nʼeriretabo eribya buhere bwʼerĩhũngahũngya.

¹⁶ Kusangwa nabirihabwabo kũndũ oko bana ba Ĩsraelĩ; omo mwanya wʼabosĩ abakatsũka eributwa, ehimbere hyosĩ hyʼabana ba Ĩsraelĩ, nabĩrĩmyahyo mo hyage.

¹⁷ Kusangwa ehimbere hyosĩ omo katĩkatĩ kʼabana ba Ĩsraelĩ ni hyage, oko bandu nʼoko syonyama; oko kiro ekyo naswĩraya ehimbere hyosĩ omo kihugo kyʼeMĩsĩrĩ monahigulabo busana nage ĩngyowene.

¹⁸ Kandi nabĩrĩmya Abalawĩ omo mwanya wʼehimbere hyosĩ omo katĩkatĩ kʼabana ba Ĩsraelĩ.

¹⁹ Kandi nabiriha Abalawĩ mo lũsũnzo uku Harũnĩ nʼabagala buwe erĩlũa oko bana ba Ĩsraelĩ, bakole omũbĩrĩ wʼabana ba Ĩsraelĩ omo Hema yʼerĩhĩndanamo, nʼeririha embanulo busana nʼabana ba Ĩsraelĩ; Sihabye kĩhũnzo omo katĩkatĩ kʼabana ba Ĩsraelĩ, omugulu bakahĩka hakũhĩ nʼahabũyĩrĩre.

²⁰ Neryo Musa, na Harũnĩ, nʼendeko yosĩ yʼabana ba Ĩsraelĩ mobakola batya oko Balawĩ; ngʼebyosĩ ebyo Mwami Mukulu ahana Musa busana nʼAbalawĩ, neryo abana ba Ĩsraelĩ ko bakolabo batya.

²¹ NʼAbalawĩ mobayerya kwʼebibi, kandi moberya esyongimba syabo; na Harũnĩ mwaletabo eribya buhere bwʼerĩhũngahũngya embere syʼOmwami Mukulu; na Harũnĩ mwakolerabo embanulo busana nʼerĩeryabo.

²² Nʼenyũma wʼaho, Abalawĩ mobingira erikola omũbĩrĩ wabo omo Hema yʼerĩhĩndanamo embere sya Harũnĩ nʼembere syʼabagala buwe; ngoko Mwami Mukulu ahana Musa busana nʼAbalawĩ, ko bakolabo batya.

Emyaka yʼomũbĩrĩ wʼAbalawĩ

²³ Kandi Omwami Mukulu mwabũga na Musa, ati,

²⁴ Omwatsi goyũ busana nʼAbalawĩ; erĩtsũka oko myaka makũmĩ abiri nʼeyĩtanu nʼabakulu kwʼaho basyingira erikola omo mũbĩrĩ wʼeHema yʼerĩhĩndanamo.

²⁵ Nĩkwa oko myaka yʼamakũmĩ atanu basyũmbya erikola omũbĩrĩ, isibendisyaswakola kandi.

²⁶ Nĩkwa banganawatĩkya balĩkyabo omo Hema yʼerĩhĩndanamo, erĩteya obũteya, nĩkwa isibaswakola omũbĩrĩ oyo. Ko wasyakolera Abalawĩ bʼutya omo mĩbĩrĩ yabo.