Emiganzo 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Eriyihongera lyʼabakulu

¹ Neryo oko kiro ekyo, Musa abere abibuga erihanda eHema, neryo mwahakabyayo amagũta nʼerisololayo, nʼebindu byayo byosĩ, nʼekiherero nʼebindu byakyo byosĩ, mwahakabyabyo amagũta nʼerihigulabyo nibya.

² Neryo abasondolĩ ba Ĩsraelĩ, abakulu bʼebĩtũnga byʼabotata wabo, mobaleta ehongo. Aba babya basondolĩ bʼebihanda; babya bakulu bʼabandu abaganzawa.

³ Mobaletera Omwami Mukulu esyohongo syabo, esyogalĩ ndatu esĩswĩkĩre, nʼesyonume ĩkũmĩ nʼĩbĩrĩ; egalĩ nguma busana nʼabasondolĩ babiri babiri, nʼobuli mundu ende nguma; mobaletasyo embere syʼeHema.

⁴ Neryo Omwami Mukulu mwabwira Musa ati,

⁵ Wĩmayebyo kubo, isyatoka erikola omũbĩrĩ wʼeHema yʼerĩhĩndanamo. Wasyahabyo oko Balawĩ, oko buli mundu ngʼomũbĩrĩ wuwe.

⁶ Neryo Musa mwĩmya esyogalĩ esyo nʼesyonde, mwahasyo oko Balawĩ.

⁷ Esyogalĩ ĩbĩrĩ nʼesyonde ĩnĩ mwahasyo abagala ba Gerĩsonĩ, ngʼomũbĩrĩ wabo kwʼali.

⁸ Nʼesyogalĩ ĩnĩ nʼesyonde munani mwahasyo oko bagala ba Merarĩ, ngʼomũbĩrĩ wabo kwʼali, ibakahanawa na Ĩtamarĩ mugala wʼomũhererĩ Harũnĩ.

⁹ Nĩkwa mwataha kindu oko bagala ba Kohatĩ, kusangwa omũbĩrĩ wʼebindu bĩbũyĩrĩre abya wabo; ebyo mobahekabyo oko bitigo byabo.

¹⁰ Nʼabasondolĩ mobahonga obuhere bwʼerihigula busana nʼekiherero omugulu kyahakabĩbawa amagũta, neryo abasondolĩ abo mobahera ehongo yabo embere syʼekiherero.

¹¹ Neryo Omwami Mukulu mwabwira Musa ati, Balete esyohongo syabo, omũsondolĩ muguma obuli kiro, busana nʼerisolola lyʼekiherero.

¹² Nʼoyo waha ehongo yiwe ekiro kyʼerĩtsũka abya Nasonĩ mugala wa Amĩnadabũ, wʼebihanda kya Yũda.

¹³ Nʼehongo yiwe yabya sahanĩ nguma yʼekĩtsĩpa, obũlĩto bwayo bwabya sekelĩ ĩgana nʼamakũmĩ asatu, nʼekibindi kiguma kyʼekĩtsĩpa kyʼesyosekelĩ makũmĩ alinda ngʼolulengo lwʼesekelĩ yʼahabũyĩrĩre; ebibiri byosĩ byabya byoswĩre nʼeyĩsyano yʼenzelele eyĩtũlũngene mwʼamagũta eribya obuhere bwʼengano;

¹⁴ nʼomũko muguma wʼesyamagetsi wʼesyosekelĩ ĩkũmĩ ogoswĩre mʼobukwa;

¹⁵ enume yʼende nguma, nʼembangale nguma, nʼakabangale kaguma kʼembũlĩ kʼomwaka muguma, eribya buhere bwʼerĩokererya;

¹⁶ embaya nguma busana nʼobuhere bwʼebibi;

¹⁷ na busana nʼobuhere bwʼamahere wʼobuholo, esyonume syʼesyonde ĩbĩrĩ, nʼesyombangale ĩtanu, nʼesyombaya ĩtanu, nʼehibangale hitanu ehyʼomwaka muguma. Ebĩ byabya hongo ya Nasonĩ mugala wa Amĩnadabũ.

¹⁸ Nʼoko kiro kyʼakabiri abya Netanelĩ mugala wa Zũarĩ, omũsondolĩ wa Ĩsakarĩ, mwaleta ehongo;

¹⁹ mwaleta busana nʼehongo yiwe esahanĩ nguma yʼekĩtsĩpa, obũlĩto bwayo nĩ sekelĩ erĩgana nʼamakũmĩ asatu, nʼekibindi kiguma kyʼekĩtsĩpa kyʼesyosekelĩ makũmĩ alinda, ngʼolulengo lwʼesekelĩ yʼahabũyĩrĩre; ebibiri byosĩ ĩbyoswĩre nʼeyĩsyano yʼenzelele eyĩtũlũngene nʼamagũta eribya buhere bwʼengano;

²⁰ omũko muguma wʼesyamagetsi wʼesyosekelĩ ĩkũmĩ, ogoswĩre kʼobukwa;

²¹ nʼenume yʼende nguma, nʼembangale, nʼakabangale kaguma kʼomwaka muguma, eribya buhere bwʼerĩokererya;

²² nʼembaya nguma eribya buhere bwʼebibi;

²³ kandi busana nʼobuhere bwʼamahere wʼobuholo, esyonume syʼesyonde ĩbĩrĩ, nʼesyombangale ĩtanu, nʼesyombaya ĩtanu, nʼehibangale hitanu hyʼomwaka muguma; eyĩ ni hongo ya Netanelĩ mugala wa Zũarĩ.

²⁴ Nʼoko kiro kyʼakasatu abya Elĩabũ mugala wa Helonĩ, omũsondolĩ wʼabana ba Zebũlũnĩ;

²⁵ ehongo yiwe yabya nĩ nguma yʼebĩtsĩpa, obũlĩto bwayo bwabya sekelĩ erĩgana nʼamakũmĩ asatu, nʼekibindi kiguma kyʼesyosekelĩ makũmĩ alinda, ngʼolulengo lwʼesekelĩ yʼahabũyĩrĩre; ebibiri byosĩ ĩbyoswĩre nʼeyĩsyano yʼenzelele eyĩtũlũngene nʼamagũta eribya buhere bwʼengano;

²⁶ omũko muguma wʼesyamagetsi wʼesyosekelĩ ĩkũmĩ ogoswĩre kʼobukwa,

²⁷ enume nguma ndere yʼende nʼembangale nguma, nʼakabangale kaguma kʼomwaka muguma, eribya buhere bwʼerĩokererya;

²⁸ nʼembaya nguma eribya buhere bwʼebibi;

²⁹ na busana nʼobuhere bwʼamahere wʼobuholo, esyonume ĩbĩrĩ syʼesyonde, nʼesyombangale ĩtanu, nʼesyombaya ĩtanu, nʼehibangale hitanu hyʼomwaka muguma. Eyĩ yabya hongo ya Elĩabũ mugala wa Helonĩ.

³⁰ Nʼoko kiro kyʼakani abya Elĩzũrĩ mugala wa Sedeũrĩ, omũsondolĩ wʼabana ba Rũbenĩ:

³¹ ehongo yiwe yabya sahanĩ nguma yʼebĩtsĩpa, obũlĩto bwayo bwabya esyosekelĩ erĩgana nʼamakũmĩ asatu, nʼekibindi kiguma kyʼebĩtsĩpa kyʼesyosekelĩ amakũmĩ alinda, ngʼolulengo lwʼesekelĩ yʼahabũyĩrĩre; ebibiri byosĩ ĩbyoswĩre eyĩsyano yʼenzelele ĩyĩtũlũngene nʼamagũta eribya buhere bwʼengano;

³² nʼomũko muguma wʼesyamagetsi wʼesyosekelĩ ĩkũmĩ ĩnĩoswĩre kʼobukwa;

³³ enume yʼende nguma, embangale nguma, nʼakabangale kaguma kʼomwaka muguma, eribya buhere bwʼerĩokererya.

³⁴ Embaya nguma eribya buhere bwʼebibi;

³⁵ na busana nʼobuhere bwʼamahere wʼobuholo, esyonume ĩbĩrĩ syʼesyonde, nʼesyombangale ĩtanu, nʼesyombaya ĩtanu, nʼehibangale hitanu hyʼomwaka muguma. Eyĩ yabya hongo ya Elĩzũrĩ mugala wa Sedeũrĩ.

³⁶ Nʼoko kiro kyʼakatanu abya Selũmĩelĩ mugala wa Sũrĩsadaĩ, omũsondolĩ wʼabana ba Sĩmeonĩ.

³⁷ Ehongo yiwe yabya sahanĩ nguma yʼebĩtsĩpa, obũlĩto bwayo bwabya sekelĩ ĩgana nʼamakũmĩ asatu, nʼekibindi kiguma kyʼebĩtsĩpa kyʼesyosekelĩ makũmĩ alinda, ngʼolulengo lwʼesekelĩ yʼahabũyĩrĩre; ebyosĩ bibiri ĩbyoswĩre nʼeyĩsyano yʼenzelele eyĩtũlũngene nʼamagũta eribya buhere bwʼengano;

³⁸ nʼomũko muguma wʼesyamagetsi wʼesyosekelĩ ĩkũmĩ, ĩnĩoswĩre kʼobukwa;

³⁹ enume nguma yʼende, nʼembangale nguma, nʼakabangale kʼomwaka muguma, eribya buhere bwʼerĩokererya;

⁴⁰ embaya nguma eribya buhere bwʼebibi;

⁴¹ na busana nʼobuhere bwʼamahere wʼobuholo, esyonume ĩbĩrĩ syʼesyonde, nʼesyombangale ĩtanu nʼesyombaya ĩtanu, nʼehibangale hitanu hyʼomwaka muguma; eyĩ yabya hongo ya Selũmĩelĩ mugala wa Sũrĩsadaĩ.

⁴² Nʼoko kiro kyʼendatu abya Elĩasafũ mugala wa Deũelĩ, omũsondolĩ wʼabana ba Gadĩ.

⁴³ Ehongo yiwe yabya sahanĩ nguma yʼebĩtsĩpa, obũlĩto bwayo bwabya sekelĩ erĩgana nʼamakũmĩ asatu, nʼekibindi kiguma kyʼebĩtsĩpa kyʼesyosekelĩ makũmĩ alinda, ngʼolulengo lwʼesekelĩ yʼahabũyĩrĩre; ebibiri byosĩ ĩbyoswĩre nʼeyĩsyano yʼenzelele eyĩtũlũngene nʼamagũta eribya buhere bwʼengano;

⁴⁴ nʼomũko muguma wʼesyamagetsi wʼesyosekelĩ ĩkũmĩ, ĩnĩoswĩre kʼobukwa;

⁴⁵ enume nguma yʼende, nʼembangale nguma, nʼakabangale kʼomwaka muguma, eribya buhere bwʼerĩokererya;

⁴⁶ nʼembaya nguma eribya buhere bwʼebibi;

⁴⁷ kandi busana nʼobuhere bwʼamahere wʼobuholo, esyonume ĩbĩrĩ syʼesyonde, nʼesyombangale ĩtanu, nʼesyombaya ĩtanu, nʼehibangale hitanu hyʼomwaka muguma. Eyĩ yabya hongo ya Elĩasafũ omugala wa Deũelĩ.

⁴⁸ Nʼoko kiro kyʼebirinda abya Elĩsama mugala wa Amĩhũdĩ, omũsondolĩ wʼabana ba Efũraĩmũ:

⁴⁹ ehongo yiwe yabya sahanĩ nguma yʼebĩtsĩpa, obũlĩto bwayo bwabya esyosekelĩ erĩgana nʼamakũmĩ asatu, nʼekibindi kiguma kyʼebĩtsĩpa kyʼesyosekelĩ amakũmĩ alinda, ngʼolulengo lwʼesekelĩ yʼahabũyĩrĩre; ebibiri byosĩ ĩbyoswĩre mwʼeyĩsyano yʼenzelele eyĩtũlũngene mwʼamagũta erĩbya buhere bwʼengano;

⁵⁰ nʼomũko muguma wʼesyamagetsi wʼesyosekelĩ ĩkũmĩ, ĩnĩoswĩre kʼobukwa;

⁵¹ enume nguma, nʼembangale nguma, akabangale kʼomwaka muguma, eribya buhere bwʼerĩokererya;

⁵² nʼembaya nguma eribya buhere bwʼebibi;

⁵³ kandi busana nʼobuhere bwʼamahere wʼobuholo, esyonume ĩbĩrĩ, nʼesyombangale ĩtanu, nʼesyombaya ĩtanu, nʼehibangale hitanu hyʼomwaka muguma; eyĩ yabya hongo ya Elĩsama omugala wa Amĩhũdĩ.

⁵⁴ Nʼoko kiro kyʼomunani abya Gamalĩelĩ mugala wa Pedasũrĩ, omũsondolĩ wʼabana ba Manase;

⁵⁵ ehongo yiwe yabya sahanĩ nguma yʼebĩtsĩpa, obũlĩto bwayo bwabya esyosekelĩ erigana nʼamakũmĩ asatu, nʼekibindi kiguma kyʼebĩtsĩpa kyʼesyosekelĩ makũmĩ alinda, ngʼolulengo lwʼesekelĩ yʼahabũyĩrĩre; ebibiri byosĩ ĩbyoswĩre nʼeyĩsyano yʼenzelele eyĩtũlũngene mwʼamagũta eribya buhere bwʼengano;

⁵⁶ nʼomũko muguma wʼesyamagetsi wʼesyosekelĩ ĩkũmĩ, ĩnĩoswĩre kʼobukwa;

⁵⁷ enume yʼende nguma, embangale nguma, nʼakabangale kaguma kʼembũlĩ kʼomwaka muguma, eribya buhere bwʼerĩokererya;

⁵⁸ embaya nguma eribya buhere bwʼebibi;

⁵⁹ kandi busana nʼobuhere bwʼamahere wʼobuholo, esyonume ĩbĩrĩ syʼesyonde, nʼesyombangale ĩtanu, nʼesyombaya ĩtanu, nʼehibangale hitanu hyʼembũlĩ hyʼomwaka muguma. Eyĩ yabya hongo ya Gamalĩelĩ mugala wa Pedasũrĩ.

⁶⁰ Nʼoko kiro kyʼomwenda abya Abĩdanĩ mugala wa Gĩdeonĩ, omũsondolĩ wʼabana ba Benyamĩnĩ

⁶¹ ehongo yiwe yabya sahanĩ nguma yʼebĩtsĩpa, obũlĩto bwayo bwabya esyosekelĩ erigana nʼamakũmĩ asatu, nʼekibindi kiguma kyʼebĩtsĩpa kyʼesyosekelĩ makũmĩ alinda, ngʼolulengo lwʼesekelĩ yʼahabũyĩrĩre; ebibiri byosĩ ĩbyoswĩre mwʼeyĩsyano yʼenzelele eyĩtũlũngene nʼamagũta eribya buhere bwʼengano;

⁶² nʼomũko muguma wʼesyamagetsi wʼesyosekelĩ ĩkũmĩ, ĩnĩoswĩre kʼobukwa;

⁶³ enume yʼende nguma, embangale nguma, nʼakabangale kʼomwaka muguma, eribya buhere bwʼerĩokererya;

⁶⁴ nʼembaya nguma eribya buhere bwʼebibi;

⁶⁵ kandi busana nʼobuhere bwʼamahere wʼobuholo, esyonume ĩbĩrĩ syʼesyonde, nʼesyombangale ĩtanu, nʼesyombaya ĩtanu, nʼehibangale hitanu hyʼomwaka muguma; eyĩ yabya hongo ya Abĩdanĩ, mugala wa Gĩdeonĩ.

⁶⁶ Nʼoko kiro kyʼerĩkũmĩ abya Ahĩezerĩ omugala wa Amĩsadaĩ, omũsondolĩ wʼabana ba Danĩ;

⁶⁷ ehongo yiwe yabya sahanĩ nguma yʼebĩtsĩpa, obũlĩto bwayo bwabya esyosekelĩ erĩgana nʼamakũmĩ asatu, nʼekibindi kiguma kyʼebĩtsĩpa kyʼesyosekelĩ makũmĩ alinda, ngʼolulengo lwʼesekelĩ yʼahabũyĩrĩre; ebibiri byosĩ ibyoswĩre nʼeyĩsyano yʼenzelele eyĩtũlũngene nʼamagũta eribya buhere bwʼengano;

⁶⁸ nʼomũko muguma wʼesyamagetsi wʼesyosekelĩ ĩkũmĩ, ĩnĩoswĩre kʼobukwa;

⁶⁹ enume nguma, nʼembangale nguma, nʼakabangale kʼomwaka muguma, eribya buhere bwʼerĩokererya;

⁷⁰ nʼembaya nguma eribya buhere bwʼebibi;

⁷¹ kandi busana nʼobuhere bwʼamahere wʼobuholo, esyonume ĩbĩrĩ, nʼesyombangale ĩtanu, nʼesyombaya ĩtanu, nʼehibangale hitanu hyʼembũlĩ hyʼomwaka muguma; eyĩ yabya hongo ya Ahĩezerĩ mugala wa Amĩsadaĩ.

⁷² Nʼoko kiro kyʼerĩkũmĩ nʼekiguma Pagĩelĩ mugala wa Okranĩ, omũsondolĩ wʼabana ba Aserĩ;

⁷³ ehongo yiwe yabya sahanĩ nguma yʼebĩtsĩpa, obũlĩto bwayo bwabya esyosekelĩ erĩgana nʼamakũmĩ asatu, nʼekibindi kyʼebĩtsĩpa kyʼesyosekelĩ makũmĩ alinda ngʼolulengo lwʼesekelĩ yʼahabũyĩrĩre; ebibiri byosĩ ĩbyoswĩre nʼeyĩsyano yʼenzelele eyĩtũlũngene nʼamagũta eribya buhere bwʼengano;

⁷⁴ nʼomũko muguma wʼesyamagetsi wʼesyosekelĩ ĩkũmĩ, ĩnĩoswĩre kʼobukwa;

⁷⁵ enume yʼende nguma nʼembangale nguma, nʼakabangale kʼomwaka muguma, eribya buhere bwʼerĩokererya;

⁷⁶ nʼembaya nguma eribya buhere bwʼebibi;

⁷⁷ kandi busana nʼobuhere bwʼamahere wʼobuholo, esyonume ĩbĩrĩ syʼesyonde, nʼesyombangale ĩtanu, ehibangale hitanu hyʼomwaka muguma; eyĩ yabya hongo ya Pagĩelĩ mugala wa Okranĩ.

⁷⁸ Nʼoko kiro kyʼerĩkũmĩ nʼebibiri abya Ahĩra mugala wa Enanĩ, omũsondolĩ wʼabana ba Nafũtalĩ;

⁷⁹ ehongo yiwe yabya sahanĩ nguma yʼebĩtsĩpa obũlĩto bwayo bwabya esyosekelĩ erĩgana nʼamakũmĩ asatu, nʼekibindi kiguma kyʼebĩtsĩpa kyʼesyosekelĩ makũmĩ alinda, ngʼolulengo lwʼesekelĩ yʼahabũyĩrĩre; ebibiri byosĩ ĩbyoswĩre mwʼeyĩsyano yʼenzelele eyĩtũlũngene nʼamagũta eribya buhere bwʼengano;

⁸⁰ nʼomũko muguma wʼesyamagetsi wʼesyosekelĩ ĩkũmĩ, ĩnĩoswĩre kʼobukwa.

⁸¹ Enume yʼende nguma, nʼembangale nguma, nʼakabangale kʼomwaka muguma eribya buhere bwʼerĩokererya;

⁸² nʼembaya nguma eribya buhere bwʼebibi;

⁸³ kandi busana nʼobuhere bwʼamahere wʼobuholo, esyonume ĩbĩrĩ syʼesyonde, nʼesyombangale ĩtanu, nʼesyombaya ĩtanu, nʼehibangale hitanu hyʼomwaka muguma. Eyĩ yabya hongo ya Ahĩra mugala wa Enanĩ.

⁸⁴ Esĩ ni hongo syʼerisolola busana nʼekiherero omugulu abasondolĩ ba Ĩsraelĩ bahakabayaho amagũta; esyosahanĩ ĩkũmĩ nʼĩbĩrĩ syʼebĩtsĩpa, ebibindi erĩkũmĩ nʼebibiri byʼebĩtsĩpa, emyũko erĩkũmĩ nʼeyĩbĩrĩ yʼesyamagetsi,

⁸⁵ obũlĩto bwʼobuli sahanĩ bwabya esyosekelĩ ĩgana nʼamakũmĩ asatu, nʼobuli kibindi makũmĩ alinda; ebĩtsĩpa byosĩ byʼebindu ebyo byabya esyosekelĩ elfu ĩbĩrĩ nʼamagana ani (2,400), ngʼolulengo lwʼesekelĩ yʼahabũyĩrĩre;

⁸⁶ emyũko erĩkũmĩ nʼeyĩbĩrĩ yʼesyamagetsi, eyoswĩre kʼobukwa, obũlĩto bwayo nĩ sekelĩ ĩkũmĩ oko buli mũko, ngʼolulengo lwʼesekelĩ yʼahabũyĩrĩre; esyamagetsi syosĩ syʼemyũko eyĩ nĩ sekelĩ ĩgana nʼamakũmĩ abiri (120).

⁸⁷ Nʼesyonume syʼesyonde syosĩ busana nʼobuhere bwʼerĩokererya esyonume ĩkũmĩ nʼĩbĩrĩ, nʼesyombangale ĩkũmĩ nʼesĩbĩrĩ, nʼehibangale hyʼomwaka muguma haguma, nʼobuhere bwasyo bwʼengano nĩ ʼkũmĩ nʼesĩbĩrĩ; nʼesyombaya busana nʼobuhere bwʼebibi ĩkũmĩ nʼĩbĩrĩ;

⁸⁸ nʼesyonume syʼesyonde syosĩ busana nʼobuhere bwʼamahere wʼobuholo esyonume makũmĩ abiri nʼesĩnĩ (24), nʼesyombangale makũmĩ ndatu (60), nʼesyombaya makũmĩ ndatu (60), nʼehibangale hyʼomwaka muguma makũmĩ ndatu (60). Eyĩ ni hongo yʼerisolola busana nʼekiherero kyabĩhakabĩbwa amagũta.

⁸⁹ Kandi omugulu Musa ingira omo Hema yʼerĩhĩndanamo erĩkanĩa na Nyamuhanga, Musa mwowa omulenge akabũga naye akalũa endata oko kĩtũmbĩ kyʼeriganyira ekyabya oko lĩsandũkũ lyʼerĩtũlago, erĩlũa omo katĩkatĩ kʼamakerũbĩ abiri; neryo mwakanĩa naye.