Emiganzo 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Ekihano kyʼAbanazĩrĩ

¹ Kandi Omwami Mukulu mwabũga na Musa ati,

² Ũbũge nʼabana ba Ĩsraelĩ uti, Omugulu omulume kutse omũkalĩ akayisema lyʼomũsĩndo, eriyisema lyʼOmũnazĩrĩ eriyihigula busana nʼOmwami Mukulu,

³ asyagana ebĩnyũ, nʼobwabũ bũkalĩre; sĩendĩsyapũlya erihira lyʼebĩnyũ, kutse erihira lyʼobwabũ bũkalĩre, kutse sĩendĩsyapũlya eyĩsande yahi yʼebĩnyũ, kutse ebĩgũma bibisi byʼebĩnyũ kutse ebyũmĩre.

⁴ Ebiro byosĩ byʼeriyisolola liwe siendisyalya kindu nʼekiguma kyʼomũlĩkĩ wʼebĩnyũ, erĩtsũka oko mbuto yabyo nʼerĩhĩka oko bisugu.

⁵ Ebiro byosĩ byʼeriyisema okwʼiyisolola liwe, olugembe silwendisyakira omo mutwe wuwe; erĩhĩka aho biro byasyahĩkanira, ebyo ayisololamo oko Mwami Mukulu, asyabya mũbũyĩrĩre; asyaleka esyonzwiri syʼomutwe wuwe isyakula isyabya nyiri.

⁶ Ebiro byosĩ ebyo akayisolola oko Mwami Mukulu ĩsyahĩka hakũhĩ nʼekĩnda.

⁷ Ĩsyayĩtsandaya busana na tata wuwe, kutse busana na koyo wuwe, kutse busana na mugala wabo, kutse busana na mwali wabo, omugulu bakahola; kusangwa eriyisolola liwe uku Nyamuhanga liri oko mutwe wuwe.

⁸ Ebiro byosĩ byʼeriyisolola liwe abũyĩrĩre oko Mwami Mukulu.

⁹ Kandi Omundundi amakanukira hakũhĩ naye, naye amatsandya omutwe wʼeriyisolola liwe; neryo asyasĩsa omutwe omo kiro kyʼeriyisolola liwe oko kiro kyʼakalinda asyasĩsago.

¹⁰ Nʼoko kiro kyʼomunani asyaletera omũhererĩ yʼehitungula hibiri, kutse ehĩrĩkũkũ hibiri hirere-hirere, oko lũkyo lwʼeHema yʼerĩhĩndanamo.

¹¹ Nʼomũhererĩ asyahera akaguma busana nʼobuhere bwʼebibi, nʼakandi busana nʼobuhere bwʼerĩokererya, nʼerimukolera embanulo busana nʼebibi biwe busana nʼomũholĩ. Kandi asyahigula omutwe wuwe ekiro ekyo kisakisa.

¹² Kandi asyahigulira Omwami Mukulu yʼebiro biwe eribya Mũnazĩrĩ, kandi asyaleta akabangale, ekyana kyʼembũlĩ kyʼomwaka muguma busana nʼobuhere bwʼolubanza; nĩkwa ebiro byʼerĩmbere byasyabya busa, kusangwa eriyisolola liwe lyatsandĩbawa.

¹³ Ekĩ kye kihano kyʼOmũnazĩrĩ, omugulu ebiro byʼeriyisolola liwe byamabĩhĩkana; asyaleta obuhere oko lũkyo lwʼeHema yʼerĩhĩndanamo.

¹⁴ Asyahongera Omwami Mukulu yʼehongo yiwe: akabangale kaguma, ekyana kyʼembũlĩ kyʼomwaka muguma ekite ko kĩtĩngũ busana nʼobuhere bwʼerĩokererya, nʼakatsugutsi kaguma kʼembũlĩ kʼomwaka muguma akate ko kĩtĩngũ busana nʼobuhere bwʼebibi, nʼembangale nguma eyite ko kĩtĩngũ eribya buhere bʼobuholo,

¹⁵ nʼekĩbo kyʼobundu bute mo kĩhamya, ehitole hyʼeyĩsyano eyĩnogĩre ndeke ehĩtũlũngene nʼamagũta, nʼehitole hike-hike ehite mo kĩhamya ehĩhakabĩre amagũta, nʼobuhere bwabyo bwʼengano, nʼamahere wabo wʼerĩpũlya.

¹⁶ Neryo omũhererĩ asyakangyabyo embere syʼOmwami Mukulu, kandi asyahera obuhere buwe bwʼebibi, nʼobuhere buwe bwʼerĩokererya.

¹⁷ Kandi asyahera embangale eribya hongo yʼamahere wʼobuholo oko Mwami Mukulu, haguma nʼekĩbo kyʼamandu awate mo kĩhamya; nʼomũhererĩ asyahonga obuhere buwe bwʼengano, nʼobuhere buwe bwʼerĩpũlya.

¹⁸ NʼOmũnazĩrĩ asyasĩsa omutwe wʼeriyisolola liwe oko lũkyo lwʼeHema yʼerĩhĩndanamo, kandi asyĩmya esyonzwiri esĩhĩgwĩre syʼomutwe wuwe, nʼerĩhĩrasyo oko muliro owali omwisi wʼehongo yʼamahere wʼobuholo.

¹⁹ Nʼomũhererĩ asyĩmya ekiboko ekĩhũkĩre kyʼembangale, nʼerĩlũsya omo kĩbo akatole kaguma akate mo kĩhamya, nʼakatole kaguma kake-kake akate mo kĩhamya, asyahĩrabyo oko byala byʼOmũnazĩrĩ, abĩsĩsa esyonzwiri siwe esĩhĩgwĩre.

²⁰ Neryo omũhererĩ asyahũngahũngyabyo eribya buhere bwʼerĩhũngahũngya embere syʼOmwami Mukulu. Ebĩ bĩbũyĩrĩre busana nʼomũhererĩ, haguma nʼolukanga lwʼerĩhũnga-hũngya nʼekihinga kyʼerisumba; nʼenyũma wʼaho Omũnazĩrĩ iniatoka erĩpũlya ebĩnyũ.

²¹ Ekĩ ni kihano kyʼOmũnazĩrĩ oyukayisema, nʼehongo yiwe oko Mwami Mukulu busana nʼeriyisolola liwe, nʼebindi kwʼebyo angatoka; nʼerilaga eryo akalaga, ko bimutolere bitya erikola ngʼekihano kyʼeriyisolola liwe.

²² Neryo Omwami Mukulu mwabũga na Musa ati,

²³ Ubwire Harũnĩ nʼabagala buwe, uti, omo mũsĩndo oyũ mwasyatsumula abana ba Ĩsraelĩ; mwasyabwirabo muti,

²⁴ Omwami Mukulu akutsumule, nʼerĩkũteya;

²⁵ Omwami Mukulu akukebere ndeke, akusasire;

²⁶ Omwami Mukulu akusamalire nʼobubuya buwe, nʼerikuha Obuholo.

²⁷ Ko basyahĩra erĩna lyage lyo batya oko bana ba Ĩsraelĩ; nage nasyatsumulabo.