Emiganzo 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Erihigula abatsandĩrya

¹ Kandi Omwami Mukulu mwabũga na Musa ati,

² Uhane abana ba Ĩsraelĩ, bahĩre obuli muhaga eyĩhya oko kilaliriro, nʼobuli mundu oyũkwĩre ekinyaro, nʼomundundi oyuli mũtsandĩrya busana nʼabaholĩ.

³ Mũhũlũkaye abosĩ abʼobulume nʼabʼobũkalĩ, ekyaswa kyʼekilaliriro ho mwasyahĩrabo; ĩsĩbatsandaya ekilaliriro kyabo aho nyĩkere omo katĩkatĩ kabo.

⁴ Nʼabana ba Ĩsraelĩ mobakola batya, mobahũlũkĩryabo ekyaswa kyʼekilaliriro; ngoko Mwami Mukulu abũga na Musa, abana ba Ĩsraelĩ ko bakola batya.

⁵ Kandi Omwami Mukulu mwabũga na Musa ati,

⁶ Ũbũge nʼabana ba Ĩsraelĩ uti, Omugulu omulume kutse omũkalĩ akakola erĩlolo lyahi eryo abandu bakakola, erĩhalya oko Mwami Mukulu, nʼomundu oyo iniabiribya kʼomusango;

⁷ neryo asyakangya erĩlolo liwe eryo abirikola; kandi asyaliha ndeke busana nʼebibi biwe ebyosĩ, kandi asyatomeka kubyo ekihande kiguma kyʼomo bitanu kyabyo, nʼerihakyo oyo alyahalayako.

⁸ Nĩkwa omundu oyo amabya isiawite mundu wʼekĩtũnga kiwe oyo wangalihwa busana nʼebibi ebyo, ekikandisyalihwa busana nʼebibi kihabawe oko Mwami Mukulu busana nʼomũhererĩ; haguma nʼembangale yʼembanulo, eyikasyamuhanulira.

⁹ Nʼobuli buhere bwʼerĩhũnga-hũngya bwʼebindu byosĩ bĩbũyĩrĩre byʼabana ba Ĩsraelĩ, ebyo bakaha omũhererĩ, byasyabya biwe.

¹⁰ Nʼebindu bisolwere byʼobuli mundu byasyabya byʼomũhererĩ; nʼekĩndũkĩ ekyo mundu akaha omũhererĩ, kyasyabya kiwe.

Ekihano kyʼabatetĩ

¹¹ Neryo Omwami Mukulu mwabũga na Musa ati,

¹² Ũbũge nʼabana ba Ĩsraelĩ, ubwirebo uti, Omũkalĩ wʼomundundi amalola ehandi, akamũhalyako,

¹³ neryo omundu akagotsera naye omo luteto nʼomwatsi oyo akabĩsama oko meso wʼĩba wuwe, naye isialitalangirwa, omũkalĩ ĩnĩabĩrĩyĩtsandya, isihali omũlangĩrĩ oyukamuhandikirira, isialitahambwa omo mwatsi oyo;

¹⁴ kandi ekĩrĩmũ kyʼobũha kyamahĩka oko mulume, naye akabya nʼobũha busana na mũkalĩwe, omugulu abĩrĩyĩtsandya; kutse ekĩrĩmũ kyʼobũha kyamamũhĩkako, akakwa mũkalĩwe yʼobũha, naye sialĩtayĩtsandya;

¹⁵ neryo omundu oyo asyaleta omũkalĩ wuwe oko mũhererĩ, kandi asyaleta obuhere busana naye, ekihande kiguma kyʼomwʼĩkũmĩ kyʼekitiri kyʼeyĩsyano yʼekisusu; sĩendĩsyũta amagũta go kubo, kutse erĩhĩra oũbanĩ kubo; kusangwa ni buhere bwʼeyĩsyano yʼobũha, obuhere bwʼeyĩsyano bwʼeryibuka, eryibuka erĩlolo.

¹⁶ Neryo omũhererĩ asyaleta omũkalĩ yo hakũhĩ, nʼerĩmũhanganĩa embere syʼOmwami Mukulu;

¹⁷ neryo omũhererĩ asyĩmya amagetsi abũyĩrĩre omo nyungu yʼeribumba; nʼomũhererĩ asyĩmya oko lũtũtũ oluli ahisi omo lubuga-buga lwʼahʼerĩĩkala, neryo asyahĩralo omo magetsi ayo.

¹⁸ Nʼomũhererĩ asyahĩra omũkalĩ oyo embere syʼOmwami Mukulu, nʼeribohola esyonzwiri syʼoko mutwe wʼomũkalĩ, nʼerĩhĩra obuhere bwʼeyĩsyano yʼengano bwʼeryibuka omo byala biwe, obo ni buhere bwʼeyĩsyano yʼengano yʼobũha; nʼomũhererĩ asyabya nʼamagetsi awakalĩhĩre omo byala biwe awakaleta eritakira.

¹⁹ Nʼomũhererĩ asyamusema, kandi bũga nʼomũkalĩ ati, Hamabya hate asyamundu wakesĩrye nawe, nʼakandi utetakebera emũsĩke oko bũtsandĩrya, igukine omo hamũlĩ yʼĩbawe, subye oko lubanza lwʼamagetsi awakalĩhĩre aya, awakaleta eritakira.

²⁰ Nĩkwa wamabya ĩwabĩrĩyĩtĩmbya igukine omo hamũlĩ yʼĩba we, wamabya wabĩrĩyĩtsandya, nʼogundi mulume ate ĩbawe abĩrĩkesya nawe;

²¹ neryo omũhererĩ asyasema omũkalĩ omo kisemo kyʼeritakira, nʼomũhererĩ asyabũga nʼomũkalĩ ati, Omwami Mukulu akuyire mo mutakirwa nʼekisemo omo bandu bawe, omugulu Omwami Mukulu asyaleka ekihinga kyawe ikyuma, nʼenda yawe ĩyabĩmba;

²² nʼamagetsi awakaleta eritakira aya asyaya omo nda yawe, nʼerĩbĩmbya enda yawe, nʼerĩũmya ekihinga kyawe, nʼomũkalĩ asyabũga ati, Amina, amina.

²³ Nʼomũhererĩ asyasaka eritakira erĩ omo kitabu, kandi asyasangũlĩryayo omo magetsi akalĩhĩre.

²⁴ Neryo asyanywĩsya omũkalĩ oko magetsi awakalĩhĩre awakaleta eritakira; nʼamagetsi awakaleta eritakira asyaya omo nda yiwe, nʼerihinduka mwʼakalĩhĩre.

²⁵ Nʼomũhererĩ asyahamba obuhere bwʼengano bwʼobũha omo byala byʼomũkalĩ, asyahũnga-hũngya obuhere bwʼengano obo embere syʼOmwami Mukulu, nʼeriretabo oko kiherero.

²⁶ Kandi omũhererĩ asyĩmya ekiganza kyʼobuhere bwʼengano, ngʼeryibukwa lyabo, nʼerĩhĩsĩrĩryabo omo mũkĩ oko kiherero, nʼenyũma wʼaho asyanywĩsya omũkalĩ yʼamagetsi ayo.

²⁷ Nʼomugulu amabĩmũnywĩsya amagetsi, ayo, amabya abĩrĩyĩtsandya, ĩnĩabĩrĩhalya ũkwʼĩba wuwe, amagetsi ayo awakaleta eritakira asyingira omo nda yiwe nʼerihinduka mwʼakalĩhĩre, nʼenda yiwe yasyabĩmba nʼekihinga kiwe kyasyuma; nʼomũkalĩ oyo asyabya mutakirwa omo bandu buwe.

²⁸ Nʼomũkalĩ amabya ĩsĩalĩtayĩtsandya, ĩnĩerĩre; asyabya bwĩranda, kandi asyabuta abana.

²⁹ Ekĩ kye kihano kyʼobũha, omugulu omũkalĩ akayĩtĩmbaya ehandi nʼerĩyĩtsandya, iniakine omo hamũlĩ yʼĩba wuwe,

³⁰ kutse omugulu ekĩrĩmũ kyʼobũha kĩkahĩka oko mulume, ĩnĩakakwa mũkalĩ wuwe yʼobũha; neryo asyahangania omũkalĩ embere syʼOmwami Mukulu, nʼomũhererĩ asyamũhĩkererya kwʼebihano byosĩ ebĩ.

³¹ Nʼomulume asyabya isiali na bibi, nʼomũkalĩ oyo asyaheka erĩlolo liwe.