Emiganzo 35 - AMASAKO ABOYTRTRE WA NYAMUHANGA AWAKAHULAWA MO BIBLIA

Emĩyĩ eyahabawa Abalawĩ

¹ Neryo Omwami Mukulu mwabũga na Musa omo bwerere bwʼeMoabũ oko Yorodanĩ eyisirya wʼeYerĩko, ati,

² Uhane abagala ba Ĩsraelĩ bahe Abalawĩ omo mwandu wʼenzĩgalya yabo emĩyĩ yʼerĩĩkalamo; kandi mwasyaha Abalawĩ bʼolũlĩsĩryo olũtĩmbĩre oko mĩyĩ eyo.

³ Basyĩkala omo mĩyĩ eyo, nʼolũlĩsĩryo lwabo lwasyabya busana nʼebihangulo byabo, na busana nʼebindu byabo, kandi busana nʼesyonyama syabo syosĩ.

⁴ Nʼolũlĩsĩryo lwʼemĩyĩ, olo mwasyaha Abalawĩ, lwasyabya lũkatsũka oko kĩyĩte kyʼomũyĩ erilola eyĩhya okwʼirenga metere magana ani nʼamakũmĩ ndatu (460) oko mbande syosĩ.

⁵ Nenyũ mwasyalenga eyĩhya wʼomũyĩ busana nʼebwanga bwʼendata metere magana mwenda nʼamakũmĩ abiri (920), na busana nʼoluhande lwʼelutambi lwʼeyĩkwa metere magana mwenda nʼamakũmĩ abiri (920), kandi busana nʼoluhande lwʼeyĩkwa metere amagana mwenda nʼamakũmĩ abiri (920), na busana nʼoluhande lwʼelutambi lwʼendata metere magana mwenda nʼamakũmĩ abiri (920), omũyĩ iniane omo katĩkatĩ. Obũ bo bũlĩsĩryo bwʼemĩyĩ.

⁶ Nʼemĩyĩ eyo mwasyaha Abalawĩ yasyabya mĩyĩ ndatu yʼeribaliramo, eyo mwasyaha busana nʼoyũlĩta omundu erisagirako; nʼakandi mwasyatomekera kwʼemĩyĩ makũmĩ ani nʼeyĩbĩrĩ (42).

⁷ Nʼemĩyĩ yosĩ eyo mwasyaha Abalawĩ yasyabya mĩyĩ makũmĩ ani nʼomunani (48); mwasyaha yobo haguma nʼamalĩsĩryo wayo.

⁸ Kandi busana nʼemĩyĩ eyo mwasyaha bagala ba Ĩsraelĩ omo nzĩgalya, oko bangi mwasyĩmya mingi; nʼoko bake mwasyĩmya mike; obuli mundu asyaha omo mĩyĩ yiwe oko Balawĩ omo lulengo lwʼenzĩgalya yiwe eyo asyalya mo mwandu.

Emĩyĩ yʼobusagiro

⁹ Kandi Omwami Mukulu mwabũga na Musa ati,

¹⁰ Ũbũge nʼabagala ba Ĩsraelĩ, ubwirebo uti, Omugulu mukasoka eYorodanĩ erĩhĩka omo kihugo kyʼeKanana,

¹¹ mwasyayisoga emĩyĩ eribya mĩyĩ yʼeribaliramo busana nenyũ, neryo oyũkĩta omundu omwʼĩbũlĩkĩra iniatoka erisagirako.

¹² Nʼemĩyĩ eyo yasyabya busayiro busana nenyũ oko mũkĩsya, neryo oyũkĩta omundu siahole, ate ahĩka aho asyimanira embere syʼendeko busana nʼeritswera.

¹³ Nʼemĩyĩ eyo mwasyahigula busana nenyũ yasyabya mĩyĩ ndatu yʼeribaliramo.

¹⁴ Mwasyaha emĩyĩ ĩsatu eyisirya oko Yorodanĩ, nʼemĩyĩ ĩsatu omo kihugo kyʼeKanana; yasyabya mĩyĩ yʼeribaliramo.

¹⁵ Busana nʼabana ba Ĩsraelĩ, na busana nʼowʼehandi, na busana nʼomubunga omo katĩkatĩ kenyũ, emĩyĩ ndatu eyĩ yasyabya busana nʼobubaliro, neryo obuli mundu oyũkĩta omundu ĩnĩakabũlĩkĩra iniatoka erisagirayo.

¹⁶ Nĩkwa amabya amũswĩraya nʼekindu kyʼekyuma, akahola, iye nĩ mwĩtĩ; nʼomwĩtĩ asyĩtwa kwenene.

¹⁷ Kandi amabya amũswĩraya omwʼĩbwe eriri omo byala, akahola, iye nĩ mwĩtĩ, nʼomwĩtĩ asyitwa kwenene.

¹⁸ Kutse amabya amũswĩraya nʼekindu kyʼomuti ekiri omo byala biwe, akahola, iye nĩ mwĩtĩ; nʼomwĩtĩ asyĩtwa kwenene.

¹⁹ Omũkĩsya wʼomusasi ĩyowene asyĩta omwĩtĩ oyo; omugulu akahĩndana naye asyamwĩta.

²⁰ Kandi amabya alĩamũkũna busana nʼekĩnĩga, kutse amugusa kwʼekindu, akamũlĩmbya, neryo akahola,

²¹ kutse omo bũyĩgũ amũswĩraya omo byala, akahola; oyo wamũswĩraya asyĩtwa kwenene, iye nĩ mwĩtĩ; omũkĩsya wʼomusasi asyĩta omwĩtĩ omugulu akahĩndana naye.

²² Nĩkwa amamũkũna lũba butsira bũyĩgũ, kutse erimugusa kwʼekĩndũkĩ butsira erĩmũlĩmbya,

²³ kutse erĩbwe, ekikaleka omundu akahola, isialitamulangira, likamutogerako, akahola, iye sĩ nzĩgũ yiwe, kutse sialitasonda erimukola nabi.

²⁴ Neryo endeko yasyatswera omo katĩkatĩ kʼomũswĩrya nʼomũkĩsya wʼomusasi ngʼamahamulo aya kwʼali.

²⁵ Nʼendeko yasyalamya oyũlĩta omundu omo byala byʼomũkĩsya wʼomusasi, nʼendeko yasyamũsũbya oko mũyĩ wuwe wʼeribalirako, ogo asagirako; naye asyĩkalamo erĩhĩka oko luholo lwʼomũhererĩ mukulu, oyo wahakabĩbawa amagũta abũyĩrĩre.

²⁶ Nĩkwa omundu oyo wĩta omundu amakiruka Omutano wʼomũyĩ wuwe wʼeribalirako nomo yangabya ndambĩ yahi, eyo akasagirako,

²⁷ nʼomũkĩsya wʼomusasi akamubana eyĩhya oko mutano wʼomũyĩ wuwe wʼeribalirako, nʼomũkĩsya wʼomusasi akĩta oyo wĩta omundu; siendisyabya ko musango wʼomusasi.

²⁸ Kusangwa abya atolere erĩĩkala omo mũyĩ wuwe wʼeribalirako erĩhĩka okwʼikola lyʼomũhererĩ mukulu; nĩkwa enyũma wʼoluholo lwʼomũhererĩ mukulu, oyo wĩta omundu asyasuba omo kihugo kyʼenzĩgalya yiwe.

²⁹ Emyatsi eyĩ yasyabya kihano nʼekihamulo omo syondengo syenyũ syosĩ omo manyũmba wenyũ gosĩ.

³⁰ Oyũkĩta omundu, omwĩtĩ asyĩtwa okwʼĩtũlago lyʼabalangĩrĩ; sihali mundu wasyakwa busana nʼerĩtũlago lyʼomũlangĩrĩ muguma.

³¹ Kandi sĩmũsyĩmaya endongolya busana nʼengebe yʼomwĩtĩ, oyuli nʼembuga yʼoluholo; nĩkwa asyĩtwa kwenene.

³² Kandi sĩmũsyĩmaya endongolya busana nʼoyulyasagira omo mũyĩ wuwe wʼeribalirako, ati atoke erĩĩkala omo kihugo erĩhĩka oko luholo lwʼomũhererĩ.

³³ Neryo sĩmũsyetsandaya ekihugo mulimo, kusangwa omusasi akatsandaya ekihugo; kusangwa sihali endĩhĩ eyangayirwa busana nʼekihugo busana nʼomusasi owakũtawamo, go nʼomusasi wʼoyũlyũtago.

³⁴ Nenyũ sĩmũsyetsandaya ekihugo ekyo mwĩkeremo, omo nyĩkere; kusangwa ĩngye, Mwami Mukulu, nyĩkere omo katĩkatĩ kʼabagala ba Ĩsraelĩ.