Emiganzo 34 - AMASAKO ABOYTRTRE WA NYAMUHANGA AWAKAHULAWA MO BIBLIA

Emitano yʼekihugo kyʼeKanana

¹ Kandi Omwami Mukulu mwabũga na Musa ati,

² Uhane abana ba Ĩsraelĩ ũbũge nabo uti, Omugulu mũkahĩka omo kihugo kyʼeKanana, ekĩ kye kihugo ekyo mwasyalya mo mwandu, ekihugo kyʼeKanana ngʼemitano yakyo kwʼiri.

³ Neryo oluhande lwenyũ lwʼelutambi lwʼeyĩkwa lwasyasubulira oko mbwarara yʼeSĩnĩ oko lutambi lwʼeEdomũ, nʼomutano wenyũ wʼelutambi lwʼeyĩkwa asyahĩka oko ndũlĩ yʼEngetsi yʼomũnyũ erilola endata.

⁴ Nʼomutano wenyũ asyabinduka erilola elutambi lwʼeyĩkwa lwʼerihetukira eAkarabĩmũ, nʼerilaba erĩhĩka eSĩnĩ; nʼerĩlũa eyo, asyalola oko lutambi lwʼeKadesĩ-barnea; neryo asyalũa aho nʼerĩhĩka eHasarĩdarĩ, nʼerilaba aho erĩhĩka eAsĩmonĩ.

⁵ Nʼomutano asyabinduka erĩlũa eAsĩmonĩ erĩhĩka oko lũsĩ lwʼeMĩsĩrĩ, nʼendũlĩ yago yasyabya oko ngetsi.

⁶ Neryo busana nʼomutano wʼeyĩkwa, mwasyayira engetsi nene mo mutano wakyo; oyo asyabya mutano wenyũ wʼeyĩkwa.

⁷ Kandi oyo asyabya mutano wenyũ wʼelutambi lwʼendata: erĩtsũka oko Ngetsi Nene mwasyahĩra Omutano erĩhĩka oko kitwa kyʼeHorĩ.

⁸ Nʼerĩlũa oko kitwa kyʼeHorĩ mwasyayitulira Omutano erĩhĩka eLebohamatĩ; nʼerisubulira eZedadĩ.

⁹ Nʼomutano asyayahĩka eZĩfronĩ, nʼerisubulira eHazare-nanĩ; oyo asyabya mutano wenyũ wʼolutambi lwʼendata.

¹⁰ Kandi mwasyayitulira Omutano wenyũ wʼendata erĩlũa eHazare-nanĩ erĩhĩka eSefamũ,

¹¹ nʼomutano oyo asyandagala erĩlũa eSefamũ erĩhĩka eRĩbla, ebwanga bwʼendata bwʼeAĩnĩ; nʼomutano asyandagala erĩhĩka oko bwandagala oko lutambi lwʼendata lwʼengetsi yʼeKĩneretĩ.

¹² Nʼomutano oyo asyandagala erĩhĩka eYorodanĩ nʼerisubulira oko Ngetsi yʼomũnyũ. Ekĩ kyasyabya kihugo kyenyũ ngoko mitano yĩtĩmbĩre kukyo.

¹³ Neryo Musa mwahana abagala ba Ĩsraelĩ ati, Ekĩ kyo kihugo ekyo mwasyalya mo nzĩgalya omwʼigereka, ekyo Mwami Mukulu abirihana erihakyo oko bihanda mwenda nʼekitswe.

¹⁴ Kusangwa ekihanda kyʼabagala ba Rũbenĩ omo bĩtũnga byʼabotata wabo, nʼekihanda kyʼabagala ba Gadĩ omo bĩtũnga byʼabotata wabo, nʼoluhande lwʼekihanda kya Manase babĩrĩmya enzĩgalya yabo.

¹⁵ Ebihanda bibiri nʼoluhande lwʼekihanda babĩrĩmya enzĩgalya yabo eyisirya wʼeYorodanĩ eyisirya wʼeYerĩko erilola ebwanga bwʼendata eyo eryuba likasira.

Amena wʼabagabĩ bʼekihugo

¹⁶ Kandi Omwami Mukulu mwabũga na Musa, ati,

¹⁷ Aya wa mena wʼabandu abasyabagabira ekihugo eribya mwandu: Eleazarĩ omũhererĩ, na Yosũa mugala wa Nũnĩ.

¹⁸ Nenyũ mwasyĩmya omũsondolĩ muguma oko buli kihanda, erigaba ekihugo eribya mwandu.

¹⁹ Nʼaya wa mena wʼabalume abʼoko kihanda kya Yũda, Kalebũ mugala wa Yefũne.

²⁰ Nʼomo kihanda kyʼabagala ba Sĩmeonĩ, Semũelĩ mugala wa Amĩhũdĩ.

²¹ Omo kihanda kya Benyamĩna, Elĩdadĩ mugula wa Kĩsĩlonĩ.

²² Nʼomo kihanda kyʼabagala ba Danĩ omũsondolĩ ye Bũkĩ mugala wa Yogĩlĩ.

²³ Nʼomo bagala ba Yosefũ, omo kihanda kyʼabagala ba Manase omũsondolĩ ye Hanĩelĩ mugala wa Efodĩ.

²⁴ Nʼomo kihanda kyʼabagala ba Efũraĩmũ omũsondolĩ ye Kemũelĩ mugala wa Sĩfitanĩ.

²⁵ Nʼomo kihanda kyʼabagala ba Zebũlũnĩ omũsondolĩ ye Elĩzafanĩ mugala wa Parũnaka.

²⁶ Nʼomo kihanda kyʼabagala ba Ĩsakarĩ omũsondolĩ ye Palatĩelĩ mugala wa Azanĩ.

²⁷ Nʼomo kihanda kyʼAbaaserĩ omũsondolĩ ye Ahĩhũdĩ mugala wa Selomĩ.

²⁸ Nʼomo kihanda kyʼabagala ba Nafũtalĩ omũsondolĩ ye Pedahelĩ mugala wa Amĩhũdĩ.

²⁹ Aba bo Mwami Mukulu ahana ati bagabire abagala ba Ĩsraelĩ bʼomwandu omo kihugo kyʼeKanana.