Emiganzo 32 - AMASAKO ABOYTRTRE WA NYAMUHANGA AWAKAHULAWA MO BIBLIA

Rũbenĩ na Gadĩ bakabũlaya ekitaka

¹ Nĩkwa abagala ba Rũbenĩ nʼabagala ba Gadĩ babya bawite ebihangulo binene byʼesyonde; kandi omugulu balangira ekihugo kyʼeYazerĩ, nʼekihugo kyʼeGĩleadĩ, ko kiri mʼobũlĩsĩryo bwʼesyonde;

² Abagala ba Gadĩ nʼabagala ba Rũbenĩ mobasa mobabũga na Musa, nʼomũhererĩ Eleazarĩ, nʼoko bakulu bʼendeko, bati,

³ Atarotĩ nʼeDĩbonĩ, nʼeYazerĩ, nʼeNĩmũra, nʼeHesbonĩ, nʼeElale, nʼeSĩbũma, nʼeNebo, nʼeBeonĩ,

⁴ ekihugo ekyo Mwami Mukulu asingũla embere syʼendeko ya Ĩsraelĩ ni kihugo busana nʼesyonde; nʼabagombe bawe bawite esyonde.

⁵ Kandi mobabũga bati, Twamasunga erĩsĩmwa omo meso wawe, ekihugo ekĩ kihabawe abagombe bawe mo kitaka kyabo; sututwale eyisirya wʼeYorodanĩ.

⁶ Kandi Musa mwabũga nʼabana ba Gadĩ nʼabana ba Rũbenĩ, ati, Abagala benyũ bayalwe nenyũ ĩmũnĩkere hano kwehĩ?

⁷ Busana nakĩ mũkĩta emitima yʼabagala ba Ĩsraelĩ yʼobũlũndũ okwʼisokera omo kihugo ekyo Mwami Mukulu abirihabo kwehĩ?

⁸ Abotata wenyũ ko banayira batya ekiro natumabo erĩlũa eKadesĩ-Barnea eriyalinga ekihugo.

⁹ Kusangwa omugulu bahetukira omo musya wʼeEskolĩ, nʼerilangira ekihugo, mobĩta emitima yʼabana ba Ĩsraelĩ yʼobũlũndũ, sibingire omo kihugo ekyo Mwami Mukulu ahabo.

¹⁰ Ekiro ekyo erihitana lyʼOmwami Mukulu molyagulumira, naye mwalahĩrya ati,

¹¹ Kwenene sihali mundu nʼomuguma oko balũa eMĩsĩrĩ, erĩtsũka oko myaka makũmĩ abiri nʼabakulu kwʼaho oyo wasyalangira ekihugo ekyo nalahĩraya Abrahamũ na Ĩsaka, na Yakobo; kusangwa mobatanyikwama ndeke.

¹² Nina Kalebũ mugala wa Yafũne Omũkenĩzĩ, na Yosũa mugala wa Nũnĩ; kusangwa mobakwama Omwami Mukulu yo ndeke-ndeke.

¹³ Nʼerihitana lyʼOmwami Mukulu molyagulumira uku Ĩsraelĩ, neryo mwaganga-gangyabo omo mbwarara emyaka makũmĩ ani, erĩhĩka aho lulengo olwakola nabi omo meso wʼOmwami Mukulu lwatĩndĩra.

¹⁴ Neryo, Ĩnywe mwabirihangana omo mwanya wʼabotata wenyũ, endeko yʼabandu bʼebibi eritomekerya erihitana erĩkalĩre lyʼOmwami Mukulu uku Ĩsraelĩ.

¹⁵ Kusangwa mwamayitsora kwiye akandisyaswasĩgabo omo mbwarara; nenyũ mwasyaherya abandu bosĩ aba.

¹⁶ Neryo mobayĩtũnda ahali Musa, bati, Twasyahĩmba hano ebĩyĩte busana nʼebihangulo byetu, nʼemĩyĩ busana nʼabana betu;

¹⁷ nĩkwa ĩtwe twasyasĩka ĩtũnayĩkangatĩre erigenda embere syʼabagala ba Ĩsraelĩ, erĩhĩka aho twasyakoleryabo ewabo; nʼabana betu basyĩkala omo mĩyĩ ĩkangatĩre busana nʼesyondũlanĩ syʼekihugo.

¹⁸ Sitwendisyasuba omo manyũmba wetu, abagala ba Ĩsraelĩ bosĩ bate babana obuli mundu omwandu wuwe.

¹⁹ Kusangwa sĩtwendĩsyĩmya omwandu haguma nabo eyisĩrya wʼeYorodanĩ, kutse hali kwʼaho; kusangwa omwandu wetu abiritutogerako oko mwisirya ono wʼeYorodanĩ erilola ebwanga bwʼendata.

²⁰ Kandi Musa mwabũga nabo ati, Mwamakola omwatsi oyũ, mwamayikangatira eriyalwa embere syʼOmwami Mukulu,

²¹ nʼabandu bosĩ abayĩkangatĩre mwamasoka eYorodanĩ embere syʼOmwami Mukulu erĩhĩka aho asyahigira esyonzĩgũ siwe embere siwe,

²² nʼekihugo kyasyabya kyabĩgondĩbwa embere syʼOmwami Mukulu; neryo enyũma wʼaho mwasyasubula, isimuli nʼomusango omo meso wʼOmwami Mukulu nʼomo meso wa Ĩsraelĩ; nʼekihugo kino kyasyabya enzĩgalĩra yenyũ embere syʼOmwami Mukulu.

²³ Nĩkwa mwamatindakola mutya, ĩmwamahalya oko Mwami Mukulu; kandi muminye ebibi byenyũ ĩbyasyabahĩkako.

²⁴ Mũyĩhĩmbĩre emĩyĩ busana nʼabana benyũ, nʼebĩyĩte busana nʼesyombũlĩ syenyũ; mukole ebyo mukabilaga omo buno bwenyũ,

²⁵ Neryo abagala ba Gadĩ nʼabagala ba Rũbenĩ mobabwira Musa, bati, Abagombe bawe basyakola ngoko omukama wage akahana.

²⁶ Abana betu, abagole betu, ebihangulo byetu, nʼesyonde syetu syosĩ, syasyabya omo mĩyĩ yʼeGĩleadĩ;

²⁷ nĩkwa abagombe bawe basyasoka obuli mundu ĩnĩayĩkangatĩre busana nʼamalwa embere syʼOmwami Mukulu eriyalwa, ngoko mukama wage akabũga.

²⁸ Neryo Musa mwahana omũhererĩ Eleazarĩ, na Yosũa mugala wa Nũnĩ nʼabakulu bʼabotata wʼebihanda byʼabagala ba Ĩsraelĩ.

²⁹ Kandi Musa mwabũga nabo, ati, Abana ba Gadĩ nʼabana ba Rũbenĩ bamasoka eYorodanĩ haguma nenyũ, obuli mundu ĩnĩanayĩkangatĩre okwʼilwa, embere syʼOmwami Mukulu, nʼekihugo kyamagondĩbwa embere syenyũ; neryo mwasyahabo ekihugo kyʼeGĩleadĩ mo kyabo.

³⁰ Nĩkwa bamatindasoka haguma nenyũ ĩbanayĩkangatĩre, basyabya nʼesyombibi haguma nenyũ omo kihugo kyʼeKanana.

³¹ Nʼabana ba Gadĩ nʼabana ba Rũbenĩ mobasũbĩrya bati, Ngoko Mwami Mukulu abĩrĩbũga nʼabagombe bawe ko twasyakola tutya.

³² Twasyasoka ĩtũnayĩkangatĩre embere syʼOmwami Mukulu omo kihugo kyʼeKanana, nʼesyombibi syʼomwandu wetu syasyasĩgala eyisiria wʼeYorodanĩ.

³³ Neryo Musa mwaha oko bana ba Gadĩ nʼoko bana ba Rũbenĩ, nʼoko luhande lwʼekihanda kya Manase mugala wa Yosefũ, obwami bwa Sĩhonĩ omwami wʼAbaamorĩ, nʼobwami bwa Ogĩ omwami wʼeBasanĩ, ekihugo nʼemĩyĩ yakyo ko biri, haguma nʼemitano yakyo, emĩyĩ yʼekihugo eyĩtĩmbĩre ehosĩ.

³⁴ Nʼabana ba Gadĩ mobahĩmba eDĩbonĩ, nʼe Atarotĩ, nʼeAroerĩ,

³⁵ nʼeAtarotĩ-Sofani, nʼeYazerĩ, nʼeYogĩbeha,

³⁶ nʼeBete-Nĩmũra, nʼeBete Haranĩ, emĩyĩ eyĩkangatĩre, nʼebĩyĩte busana nʼesyombũlĩ.

³⁷ Nʼabana ba Rũbenĩ mobahĩmba eHesbonĩ, nʼeElale, nʼeKĩrĩataĩmũ,

³⁸ nʼeNebo, nʼeBaala-Meonĩ, amena wayo iniamabindulwa, nʼeSĩbũma; mobaluka emĩyĩ bahĩmba yʼawandi mena.

³⁹ Nʼabagala ba Makĩrĩ mugala wa Manase mobaya eGĩleadĩ, mobĩmyaho, mobanyega Abaamorĩ ababyaho.

⁴⁰ Na Musa mwaha Gĩleadĩ uku Makĩrĩ mugala wa Manase; naye mwĩkalaho.

⁴¹ Kandi Yaĩrĩ mugala wa Manase mwayĩmya emĩyĩ yayo, mwalukayo Emĩyĩ ya Yaĩrĩ.

⁴² Na Noba mwayĩmya eKenatĩ, nʼemĩyĩ yayo, neryo mwalukayo mo Noba, ngʼerĩna liwe.