Emiganzo 31 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩĩta Abamĩdĩanĩ

¹ Neryo Omwami Mukulu mwabũga na Musa ati,

² Ũkĩsĩraye abana ba Ĩsraelĩ Abamĩdĩanĩ; nʼenyũma wʼaho wasyeya abotata-kulu bawe.

³ Neryo Musa mwabũga nʼabandu ati, Mwambalaye abandu omo katĩkatĩ kenyũ ebindu byʼamalwa, imwatoka eriyalwa na Mĩdĩanĩ, eriyira erĩkĩsya lyʼOmwami Mukulu oko Bamĩdĩanĩ.

⁴ Oko buli kihanda elfu nguma, omo bihanda byosĩ bya Ĩsraelĩ, mwasyatumabo eriyalwa.

⁵ Neryo mobabanika omo maelfu wa Ĩsraelĩ, elfu nguma omo buli kihanda, elfu ĩkũmĩ nʼĩbĩrĩ abambite ebindu byʼamalwa.

⁶ Na Musa mwatumabo, elfu nguma yʼobuli kihanda, oko malwa, ibo na Fĩnehasĩ mugala wʼomũhererĩ Eleazarĩ, eriyalwa, haguma nʼebindu byʼahabũyĩrĩre nʼesyongubi busana nʼendulo omo byala biwe.

⁷ Neryo mobalwa na Mĩdĩanĩ, ngoko Mwami Mukulu ahana Musa; mobĩta obuli mulume.

⁸ Kandi mobĩta abami bʼeMĩdĩanĩ haguma nʼabandi abĩtawa; Ewĩ, na Rekemũ, na Zũrĩ, na Hũrĩ, na Reba, abami batanu bʼeMĩdĩanĩ; na Balama nibya mugala wa Beorĩ, mobamwĩta omo mũyalĩ.

⁹ Nʼabagala ba Ĩsraelĩ mobanyega abakalĩ bʼeMĩdĩanĩ nʼabana babo; nʼesyonde syabo syosĩ, nʼesyombũlĩ syabo syosĩ, nʼebindu byabo byosĩ, mobĩmyabyo mo minyego.

¹⁰ Kandi mobahĩsya emĩyĩ yabo yosĩ aho babya bĩkere, nʼebilaliriro byabo byosĩ.

¹¹ Mobatwala eminyego nʼebyahũngawa ebyosĩ, abandu nʼesyonyama ebibiri byosĩ.

¹² Mobaleta abahũngawa, nʼabanyegwa, nʼolũhũngo uku Musa, nʼuku Eleazarĩ omũhererĩ, nʼoko ndeko yʼabana ba Ĩsraelĩ, oko kilaliriro omo bwerere bwʼeMoabũ, obuli hakũhĩ nʼeYorodanĩ, eYerĩko.

¹³ Na Musa nʼomũhererĩ Eleazarĩ, nʼabakulu bosĩ bʼendeko, mobahuluka erĩhĩndana nabo ekyaswa kyʼekilaliriro.

¹⁴ Neryo Musa mwahitana oko bakulu bʼemilondo, abakulu bʼamaelfu, nʼabakulu bʼamagana, abasubula bakalũa oko mũbĩrĩ wʼamalwa.

¹⁵ Na Musa mwabwirabo ati, Mwabĩrĩbalya abakalĩ bosĩ kwehĩ?

¹⁶ Lebaya, aba bo baleka abana ba Ĩsraelĩ ĩbahalya oko Mwami Mukulu busana nʼomwatsi wa Peorĩ, busana nʼerihana lya Balama, neryo ekĩhũnzo mokyahĩka omo ndeko yʼOmwami Mukulu.

¹⁷ Na lino mwĩte obuli mwana wʼobulume, nʼobuli mũkalĩ oyo wabiriminya omulume erigotsera naye.

¹⁸ Nĩkwa abana bosĩ bʼobũkalĩ, abate baminya omulume erigotsera naye, muyibikirebo, sĩmwĩtebo.

¹⁹ Neryo musibe omo kyaswa kyʼekilaliriro ebiro birinda; nʼomundundi oyo wabĩrĩta omundu, nʼomundundi oyo wabĩrĩtũla oko yũlĩtawa, mũyeraye oko kiro kyʼebisatu nʼoko kiro kyʼebirinda, Ĩnywe nʼabanyegwa benyũ.

²⁰ Mũyeraye nʼobuli lukimba, nʼoko byosĩ ebĩkakokotĩbawa omo ngobĩ, nʼebyosĩ bilukene omo bweya bwʼesyombene, nʼebindu byosĩ ebikabatsawa omo miti.

Omugambo wʼebindu ebikanyegawa

²¹ Neryo omũhererĩ Eleazarĩ mwabũga nʼabalwaĩ abayalwa, ati, Ekĩ kye kihano kyʼemigambo eyo Mwami Mukulu ahana Musa;

^22-23 nĩkwa esyamagetsi, nʼebĩtsĩpa, nʼomulinga, nʼebyuma, nʼekyuma kyʼerĩnzanza, nʼekyuma kyʼerĩsasĩ obuli kindu kitehya omo muliro, mwasyalabyakyo omo muliro, ikyera; nĩkwa kyasyerĩbwa omo magetsi wʼemitundira; nʼebyosĩ ebikahya omo muliro mwasyalabyabyo omo magetsi.

²⁴ Kandi mwasyerya esyongimba syenyũ ekiro kyʼebirinda, imwera; nʼenyũma wʼaho mwasyingira omo kilaliriro.

Obuhere bwʼerĩhũnga-hũngya bʼomwami Mukulu

²⁵ Neryo Omwami Mukulu mwabũga na Musa, ati,

²⁶ Uwe, na Eleazarĩ, nʼabakulu bʼebĩtũnga byʼabotata bʼendeko mwĩmaye emiganzo yʼabanyegwa abahũngawa, eyʼabandu nʼeyʼesyonyama.

²⁷ Kandi, ugabe ebinyegwa mo magabo abiri omo katĩkatĩ kʼesyombangĩ abayalwa nʼendeko yosĩ.

²⁸ Kandi uyire omusolo wʼOmwami Mukulu busana nʼabalwĩ abayalwa, omundu muguma omo magana atanu, oko bandu, nʼoko syonde, nʼoko syopunda, nʼoko mbũlĩ.

²⁹ Wĩmayego oko luhande lwabo, muhego oko mũhererĩ Eleazarĩ, eribya buhere bwʼerisumba busana nʼOmwami Mukulu.

³⁰ Na busana nʼoluhande lwʼabana ba Ĩsraelĩ, wasyĩmya omuguma gʼoko makũmĩ atanu, oko bandu nʼoko syonde, nʼoko syopunda, nʼoko syombũlĩ, nʼoko nyama syosĩ, muhebyo oko Balawĩ, abakategaya eHema yʼOmwami Mukulu.

³¹ Neryo Musa na Eleazarĩ omũhererĩ mobakola ngoko Mwami Mukulu ahana Musa.

³² Nĩkwa eminyego eyasaka oko binyegwa ebyo abalwĩ bĩmaya, yabya esyombũlĩ elfu magana ndatu nʼamakũmĩ alinda nʼĩtanu (675,000),

³³ nʼesyonde, elfu makũmĩ alinda nʼĩbĩrĩ (72,000),

³⁴ nʼesyopunda elfu makũmĩ ndatu nʼenguma (61,000).

³⁵ Nʼabandu bosĩ, elfu makũmĩ asatu nʼĩbĩrĩ (32,000) oko bakalĩ abate baminya mulume erigotsera naye.

³⁶ Nʼoluhande olwabya erĩgabo lyʼabandu bayalwa, emiganzo yalyo yabya esyombũlĩ elfu magana asatu nʼamakũmĩ asatu nʼirinda nʼamagana atanu (337,500).

³⁷ Nʼomusolo wʼOmwami Mukulu omo syombũlĩ abya magana ndatu nʼamakũmĩ alinda nʼesĩtanu (675),

³⁸ nʼesyonde syabya elfu makũmĩ asatu nʼendatu (36,000). Nʼomusolo wʼOmwami Mukulu abya makũmĩ alinda nʼĩbĩrĩ (72).

³⁹ Nʼesyopunda syabya elfu makũmi asatu nʼamagana atanu (30,500), nʼomusolo wʼOmwami Mukulu abya makũmĩ ndatu nʼenguma (61) kusyo.

⁴⁰ Nʼabandu babya elfu ĩkũmĩ na ndatu (16,000); nʼomusolo kubo wʼOmwami Mukulu abya bandu makũmĩ asatu nʼababiri (32).

⁴¹ Kandi Musa mwaha omũhererĩ Eleazarĩ yʼomusolo owabya buhere bwʼerisumba bʼomwami Mukulu, ngoko Mwami Mukulu ahana Musa.

⁴² Nĩkwa oluhande lwʼabana ba Ĩsraelĩ, olo Musa alũsaya oko bandu abayalwa.

⁴³ Nĩkwa oluhande lwʼendeko lwabya lwʼesyombũlĩ elfu magana asatu nʼamakũmĩ asatu nʼirinda nʼamagana atanu (337,500),

⁴⁴ nʼesyonde elfu mĩ asatu na ndatu (36,000),

⁴⁵ nʼesyopunda elfu makũmĩ asatu nʼamagana atanu (30,500),

⁴⁶ nʼabandu elfu ĩkũmĩ nʼendatu (16,000).

⁴⁷ Nʼoko luhande lwʼabana ba Ĩsraelĩ, Musa mwĩmya ekiguma ekĩkalũa oko buli makũmĩ atanu, oko bandu nʼoko syonyama, mwahabyo Abalawĩ, abategaya omũbĩrĩ wʼahʼerĩĩkala lyʼOmwami Mukulu, ngoko Mwami Mukulu ahana Musa.

⁴⁸ Kandi abakulu ababya oko elfu enzige, abakulu bʼamaelfu, nʼabakulu bʼamagana, mobayĩtũnda ahali Musa.

⁴⁹ Mobabwira Musa bati, Abagombe bawe babiriganza abalwĩ abo tũkategaya, sihalitabula nʼomuguma gʼũkwʼĩtwe.

⁵⁰ Neryo twamaleta ehongo oko Mwami Mukulu, ebyo buli mundu abiribana, ebindu byʼesyamagetsi, amahĩnda, emisege yʼoko byala, nʼesyombũka, nʼesyombũka syʼamatwĩ, nʼemisege yʼomo bĩkya, eriyira endĩhĩ yʼembanulo busana netu embere syʼOmwami Mukulu.

⁵¹ Neryo Musa nʼomũhererĩ Eleazarĩ mobĩmya esyamagetsi syabo, nʼebindu ebĩhesĩrwe emĩsĩndo yosĩ.

⁵² Nʼesyamagetsi syosĩ syʼobuhere bwʼerisumba, ebyo bahongera Omwami Mukulu, esyʼabakulu bʼamaelfu, nʼabakulu bʼamagana, syabya sekelĩ elfu ĩkũmĩ na ndatu nʼamagana alinda nʼamakũmĩ atanu (16,750).

⁵³ Abalwĩ ĩbamabĩmya eminyego, obuli mundu ebiwe.

⁵⁴ Neryo Musa nʼomũhererĩ Eleazarĩ mobĩmya esyamagetsi syʼabakulu bʼamaelfu nʼabʼamagana, mobaletasyo omo Hema yʼerĩhĩndanamo eribya kĩbũkyo busana nʼabagala ba Ĩsraelĩ embere syʼOmwami Mukulu.