Emiganzo 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Erihigulwa lyʼabahererĩ nʼAbalawĩ

¹ Neryo aya wa masako wʼesyondengo sya Harũnĩ na Musa oko kiro ekyo Mwami Mukulu abũga na Musa omo kitwa kyʼeSĩnaĩ.

² Aya wa mena wʼabagala ba Harũnĩ: Nadabũ akambere, na Abĩhũ, Eleazarĩ, na Ĩtamarĩ.

³ Aya wa mena wʼabagala ba Harũnĩ, abahererĩ abahakabĩbawa amagũta, abo ahigula erikola omũbĩrĩ gʼobũhererĩ.

⁴ Na Nadabũ na Abĩhũ mobaholera embere syʼOmwami Mukulu, omugulu bahera omuliro wʼehandi embere syʼOmwami Mukulu, omo mbwarara yʼeSĩnaĩ, nabo isibawite bana; na Eleazarĩ na Ĩtamarĩ mobakola omũbĩrĩ ngʼabahererĩ, omugulu oyo Harũnĩ ĩse wabo inianeho.

⁵ Neryo Omwami Mukulu mwabũga na Musa ati,

⁶ Ulete ekihanda kya Lawĩ hakũhĩ, ũhĩrebo embere sya Harũnĩ omũhererĩ, ibamukolera.

⁷ Nabo basyateya obũteya buwe, nʼobũteya bwʼendeko yosĩ embere syʼeHema yʼerĩhĩndanamo, erikola omũbĩrĩ wʼeHema yʼerĩhĩndanamo.

⁸ Nabo basyateya ebindu byosĩ byʼeHema yʼerĩhĩndanamo, nʼobũteya bwʼabana ba Ĩsraelĩ, erikola omũbĩrĩ wʼeHema yʼerĩhĩndanamo.

⁹ Nawe wasyaha Abalawĩ uku Harũnĩ nʼabagala buwe; abirihabwabo kwenene omo katĩkatĩ kʼabana ba Ĩsraelĩ.

¹⁰ Litya wasyahamula Harũnĩ nʼabagala buwe, nabo basyateya obũhererĩ bwabo; nʼowʼehandi amasegera hakũhĩ asyĩtwa.

¹¹ Kandi Omwami Mukulu mwabũga na Musa ati,

¹² Lebaya, nabĩrĩmya Abalawĩ omo katĩkatĩ kʼabana ba Ĩsraelĩ omo mwanya wʼotumbere tosĩ abakatsũka eributwa omo katĩkatĩ kʼabana ba Ĩsraelĩ. Neryo Abalawĩ basyabya bage.

¹³ Kusangwa ehimbere hyosĩ ni hyage; oko kiro ekyo naswĩraya otumbere tosĩ omo kihugo kyʼeMĩsĩrĩ monayihigulira ehimbere hyosĩ omo Ĩsraelĩ, ehyosĩ hyʼabandu nʼehyʼesyonyama hyasyabya hyage. Ĩngye indi Mwami Mukulu.

Emĩbĩrĩ yʼAbalawĩ

¹⁴ Neryo Omwami Mukulu mwabũga na Musa omo mbwarara yʼeSĩnaĩ ati,

¹⁵ Uganze abana bʼAbalawĩ oko bĩtũnga byʼabotata wabo nʼoko bihanda byabo; obuli mulume erĩtsũka oko mukera muguma nʼabakulu kwʼaho wasyaganzabo.

¹⁶ Neryo Musa mwaganzabo ngʼekĩnywa kyʼOmwami Mukulu, ngoko ahanawa.

¹⁷ Neryo aba babya bagala ba Lawĩ oko mena wabo: Gerĩsonĩ, na Kohatĩ, na Merarĩ.

¹⁸ Nʼaya wa mena wʼabagala ba Gerĩsonĩ oko bihanda byabo nĩ Lĩbũnĩ na Sĩmeĩ.

¹⁹ Nʼabagala ba Kohatĩ oko bĩtũnga byabo nĩ Amũramũ, na Ĩzĩharĩ, Hebũronĩ, na Ũzĩelĩ.

²⁰ Nʼabagala ba Merarĩ oko bĩtũnga byabo nĩ Malĩ na Mũsĩ. Ebĩ bye bĩtũnga byʼAbalawĩ ngʼebĩtũnga byʼabotata wabo ko biri.

²¹ Uku Gerĩsonĩ habya ekĩtũnga kyʼAbalĩbũnĩ, nʼekihanda kyʼAbasĩmeĩ; ebĩ bye bihanda byʼAbagerĩsonĩ.

²² Abaganzawa kubo ngʼemiganzo yʼabalume bosĩ erĩtsũka oko mukera muguma nʼabakulu kwʼaho, babya elfu irinda nʼamagana atanu (7,500).

²³ Ebĩtũnga byʼAbagerĩsonĩ basyahanda amahema wabo enyũma wʼeHema ebwanga bwʼeyĩkwa.

²⁴ Nʼomukulu wʼekĩtũnga kyʼabotata wʼAbagerĩsonĩ asyabya Elĩsafũ mugala wa Laelĩ.

²⁵ Neryo emĩbĩrĩ yʼabagala ba Gerĩsonĩ omo Hema yʼerĩhĩndanamo yabya ahʼerĩĩkala nʼeHema, nʼolukimba olũkasũkũlĩraya olũkyo lwʼeHema yʼerĩhĩndanamo,

²⁶ nʼesyongimba sĩrerembĩre syʼekibuga nʼolukimba olũkasũkũlĩraya lwʼoko lũkyo lwʼekibuga, ekĩkatĩmba oko hʼerĩĩkala, nʼekiherero, nʼemikoba yakyo busana nʼomũbĩrĩ wabyo gosĩ.

²⁷ Nʼuku Kohatĩ kyabya kĩtũnga kyʼAbaamũramũ, nʼekĩtũnga kyʼAbaĩsĩharĩa, nʼekĩtũnga kyʼAbahebronĩ, nʼekĩtũnga kyʼAbaũzĩelĩ; ebĩ bye bĩtũnga byʼAbakohatĩ.

²⁸ Emiganzo yʼabalume bosĩ erĩtsũka oko mukera muguma nʼabakulu kwʼaho, babya elfu munani nʼamagana ndatu (8,600), abakola emĩbĩrĩ yʼahabũyĩrĩre.

²⁹ Ebĩtũnga byʼabagala ba Kohatĩ babya bakasyahanda amahema wabo oko luhande lwʼelutambi lwʼeyĩkwa lwʼeHema.

³⁰ Nʼomũsondolĩ wʼebĩtũnga byʼabotata bʼekĩtũnga kyʼAbakohatĩ abya Elĩsafanĩ mugala wa Ũzĩelĩ.

³¹ Neryo emĩbĩrĩ yabo yabya yʼerĩsandũkũ eryo nʼemesa, nʼomutagala wʼesyotala nʼebiherero, nʼebindu byʼahabũyĩrĩre ebyo bakakolamo, nʼolukimba olũkasũkũlĩraya, nʼomũbĩrĩ wago gosĩ.

³² Na Eleazarĩ mugala wa Harũnĩ omũhererĩ mukulu asyabya mũsondolĩ wʼabakulu bʼAbalawĩ asyahanganira abakakola emĩbĩrĩ yʼahʼerĩĩkala.

³³ Uku Merarĩ habya ekĩtũnga kyʼAbamalĩ, nʼekĩtũnga kyʼAbamũsĩ; ebĩ bye bĩtũnga bya Merarĩ.

³⁴ Nʼabaganzawa kubo, ngʼemiganzo yʼabalume bosĩ erĩtsũka oko mukera muguma nʼabakulu kwʼaho babya elfu ndatu nʼamagana abiri (6,200).

³⁵ Nʼomukulu wʼekĩtũnga kyʼabotata kyʼebĩtũnga bya Merarĩ abya Zũrĩelĩ mugala wa Abĩahalĩ; basyahanda amahema wabo gʼoko luhande lwʼelutambi lwʼendata lwʼahʼerĩĩkala.

³⁶ Nʼemĩbĩrĩ eyahamulirawa abagala ba Merarĩ yabya ebisayi byʼeHema, nʼebibatsi byayo, nʼesyondũyĩ syayo, nʼebitindo byayo, nʼebindu byosĩ byayo, nʼomũbĩrĩ wabyo gosĩ,

³⁷ nʼesyondũyĩ syʼekibuga oko mbande syosĩ, nʼebitindo byasyo, nʼemĩsũmalĩ yasyo, nʼemikoba yasyo.

³⁸ Nĩkwa abangahandĩre amahema embere syʼahʼerĩĩkala oko luhande lwʼendata embere wʼeHema yʼerĩhĩndanamo erĩlolya eyo eryuba likahuluka, ni Musa, na Harũnĩ nʼabagala buwe, erikola emĩbĩrĩ yʼahabũyĩrĩre, ibakakolera ebitolere busana nʼabana ba Ĩsraelĩ; nʼowʼehandi oyũkahĩka hakũhĩ asyĩtwa.

³⁹ Neryo abandu bosĩ abaganzawa omo Balawĩ, abo Musa na Harũnĩ baganza busana nʼerihana lyʼOmwami Mukulu, omo bĩtũnga byabo, obuli mulume erĩtsũka oko mukera muguma nʼabakulu kwʼaho, babya elfu makũmĩ abiri nʼĩbĩrĩ (22,000).

⁴⁰ Neryo Omwami Mukulu mwabwira Musa ati, Uganze otumbere tosĩ twʼobulume twʼabana ba Ĩsraelĩ erĩtsũka oko mukera muguma nʼabakulu kwʼaho, uganze amena wabo.

⁴¹ Kandi wasyĩmya Abalawĩ busana nage, Ĩngye indi Mwami Mukulu, omo mwanya wʼehimbere hyosĩ omo katĩkatĩ kʼabana ba Ĩsraelĩ; nʼesyonde syʼAbalawĩ omo mwanya wʼotumbere tosĩ tʼomo nde syʼabana ba Ĩsraelĩ.

⁴² Neryo Musa mwaganza ehimbere hyosĩ omo katĩkatĩ kʼabana ba Ĩsraelĩ, ngoko Mwami Mukulu amuhana.

⁴³ Nʼehimbere hyosĩ hyʼobulume ngʼemiganzo yʼamena, erĩtsũka oko mukera muguma nʼabakulu kwʼaho, abaganzawa kubo babya elfu makũmĩ abiri nʼĩbĩrĩ nʼamagana abiri bʼamakũmĩ alinda nʼabasatu (22,273).

⁴⁴ Neryo Omwami Mukulu mwabwira Musa ati,

⁴⁵ Wĩmaye Abalawĩ omo mwanya wʼehimbere hyosĩ omo bana ba Ĩsraelĩ, nʼesyonde syʼAbalawĩ omo mwanya wʼesyonde syabo; nʼAbalawĩ basyabya bage. Ĩngye indi Mwami Mukulu.

⁴⁶ Na busana nʼerĩtongolya lyʼehimbere hyʼabana ba Ĩsraelĩ amagana abiri nʼamakũmĩ alinda nʼabasatu (273) abalabĩre emiganzo yʼAbalawĩ,

⁴⁷ wasyĩmya esyo sekelĩ ĩtanu busana nʼobuli mundu; oko lulengo lwʼesekelĩ yʼahabũyĩrĩre wasyĩmyasyo, esekelĩ nguma ni gera makũmĩ abiri;

⁴⁸ kandi wasyaha Harũnĩ nʼabagala buwe esyofranka esyo, erĩtongolya lyʼabandu abalaba emiganzo yʼabandi.

⁴⁹ Neryo Musa mwĩmya esyofranka syʼendongolya yʼabandu abalaba emiganzo yʼabatongolĩbawa nʼAbalawĩ;

⁵⁰ mwĩmya esyofranka oko himbere hyʼabana ba Ĩsraelĩ, esyosekelĩ elfu nguma nʼamagana asatu nʼamakũmĩ ndatu nʼesĩtanu (1,365), ngʼolulengo lwʼesekelĩ yʼahabũyĩrĩre.

⁵¹ Neryo Musa mwaha esyofranka syʼendongolya eyo uku Harũnĩ nʼoko bagala buwe, ngʼerihana lyʼOmwami Mukulu, ngoko Mwami Mukulu ahana Musa.