Emiganzo 28 - AMASAKO ABOYTRTRE WA NYAMUHANGA AWAKAHULAWA MO BIBLIA

Ebihano byʼerihongera Nyamuhanga

¹ Neryo Omwami Mukulu mwabũga na Musa, ati

² Uhane abagala ba Ĩsraelĩ, ubwirebo uti, Erihonga lyage, akalyo kage busana nʼamahere wage awakokĩbawa oko muliro, awʼerikumba lĩsĩhĩre busana nage, mwasyateya erinyiherera oko mugulu wago owatolere.

³ Kandi wasyabũga nabo uti, Obũ bo buhere obũkokĩbawa oko muliro obo mwasyaherera Omwami Mukulu: ehibangale hibiri hyʼomwaka muguma ehite ko bulema, ehibiri obuli kiro, eribya buhere bwʼerĩokererya emigulu yosĩ.

⁴ Ekyana kiguma kyʼembũlĩ mwasyaherakyo omo ngyakya-ngyakya, kandi omwĩgolo-golo mwasyahera ekindi kyana kyʼembũlĩ.

⁵ Nʼekihande kiguma kyʼomwʼĩkũmĩ kyʼekitiri kyʼeyĩsyano yʼenzelele eribya obuhere bwʼeyĩsyano yʼengano, ĩbũtũlũngene nʼekihande kiguma kyʼomo bini kyʼetsũpa yʼamagũta awengĩre.

⁶ Bo buhere bwʼerĩokererya emigulu yosĩ, obwahamulirawa omo kitwa kyʼeSĩnaĩ eribya bumba bũsĩhĩre, obuhere obũkokĩbawa busana nʼOmwami Mukulu omo muliro.

⁷ Nʼobuhere bwʼerĩpũlya bwago bwasyabya bwʼekihande kiguma ekyʼomo bini kyʼetsũpa busana nʼekyana kiguma kyʼembũlĩ; wasyũtũlĩrabo oko Mwami Mukulu omo habũyĩrĩre, obuhere bwʼerĩpũlya obwabũ obũhĩre.

⁸ Wasyahonga ekindi kyana kyʼembũlĩ omwʼĩgolo-golo, ngʼobuhere bwʼeyĩsyano yʼengano obwʼomo ngyakya-ngyakya, kandi ngʼobuhere bwago bwʼerĩpũlya, wasyaherabo, obuhere obũkokĩbawa oko muliro, obwʼerikumba lĩsĩhĩre oko Mwami Mukulu.

⁹ Nʼoko kiro kyʼeSabato ehibangale hibiri ehyʼomwaka muguma, ehite ko bulema; nʼebihande bibiri byʼomwʼĩkũmĩ ebyʼekitiri kyʼeyĩsyano yʼenzelele busana nʼobuhere bwʼeyĩsyano yʼengano, obũtũlũngene nʼamagũta, nʼobuhere bwago bwʼerĩpũlya;

¹⁰ obũ bo buhere bwʼerĩokererya bwʼobuli Sabato, obute oko buhere bwʼerĩokererya bwʼobuli kiro, nʼobuhere bwago bwʼerĩpũlya.

¹¹ Kandi oko nzũko yʼemikera yenyũ mwasyahongera Omwami Mukulu yʼobuhere bwʼerĩokererya; esyonume ĩbĩrĩ, nʼembangale nguma, ehibangale hirinda ehyʼomwaka muguma ehite ko bulema.

¹² Nʼebihande bisatu bʼomwʼĩkũmĩ byʼekitiri kyʼeyĩsyano yʼenzelele busana nʼobuhere bwʼeyĩsyano, eyĩtũlũngene nʼamagũta, busana nʼobuli nume yʼende; nʼebihande bibiri byʼomwʼĩkũmĩ byʼeyĩsyano yʼenzelele, eyĩtũlũngene nʼamagũta, busana nʼembangale nguma;

¹³ nʼekihande kiguma kyʼomwʼĩkũmĩ kyʼeyĩsyano yʼenzelele yʼengano eyĩtũlũngene nʼamagũta busana nʼobuhere bwʼeyĩsyano yʼengano oko buli kyana kyʼembũlĩ; eribya buhere bwʼerĩokererya bwʼerikumba erikasiha, obuhere obũkokĩbawa oko muliro oko Mwami Mukulu.

¹⁴ Nʼamahere wago wʼerĩpũlya asyabya kitswe kyʼetsũpa yʼebĩnyũ busana nʼenume nguma yʼende, nʼekihande kyʼomo bisatu kyʼetsũpa busana nʼembangale, nʼekihande kyʼomo bini kyʼetsũpa busana nʼekyana kyʼembũlĩ; obũ bo buhere bwʼerĩokererya bwʼobuli mukera oko mikera yosĩ yʼomwaka.

¹⁵ Nʼembaya nguma busana nʼobuhere bwʼebibi oko Mwami Mukulu; yasyaherwa ikatomekwa oko buhere bwʼerĩokererya bwʼemigulu yosĩ, kandi haguma nʼobuhere bwago bwʼerĩũtũlĩra ahisi.

¹⁶ Nʼoko mukera wʼerĩtsũka, oko kiro kyʼerĩkũmĩ nʼebini kyʼomukera, hasyabya Erikiruka lyʼOmwami Mukulu.

¹⁷ Nʼoko kiro kyʼerĩkũmĩ nʼebitanu kyʼomukera ono, hasyabya ekiro kikulu; obundu obute mo kĩhamya bwasyalibwa ebiro birinda.

¹⁸ Oko kiro kyʼerĩtsũka hasyabya erĩhĩndana lĩbũyĩrĩre; simusyekola mũbĩrĩ wʼerĩlũhya.

¹⁹ Nĩkwa mwasyaleta obuhere bʼoko muliro, obuhere bwʼerĩokererya busana nʼOmwami Mukulu; esyonume ĩbĩrĩ syʼesyonde nʼembangale nguma, nʼehibangale hirinda hyʼomwaka muguma; ehite ko bulema.

²⁰ Nʼobuhere bwasyo bwʼeyĩsyano yʼengano bwasyabya bwʼeyĩsyano yʼenzelele eyĩtũlũngene nʼamagũta; mwasyahonga ebihande bisatu byʼomwʼĩkũmĩ busana nʼenume nguma, nʼebihande bibiri byʼomwʼĩkũmĩ busana nʼembangale.

²¹ Ekihande kiguma kyʼomwʼĩkũmĩ wasyaherakyo busana nʼobuli kyana kyʼembũlĩ oko byana birinda byʼembũlĩ;

²² nʼembaya nguma busana nʼobuhere bwʼebibi, eriyirwa mo ndĩhĩ yʼembanulo busana nenyũ.

²³ Mwasyahonga esĩ eritomekwa oko buhere bwʼerĩokererya obwʼengyakyangyakya, obũ bo buhere bwʼerĩokererya bwʼemigulu yosĩ.

²⁴ Omo mũsĩndo oyo mwasyaleta obuli kiro, oko biro birinda, akalyo kʼobuhere oko muliro, obwʼerikumba ndeke oko Mwami Mukulu; kasyaletwa eritomeka oko buhere bwʼerĩokererya bwʼemigulu yosĩ, haguma nʼobuhere bwago bwʼerĩũtũlĩra ahisi.

²⁵ Nʼoko kiro kyʼebirinda mwasyabya nʼerĩhĩndana lĩbũyĩrĩre; simusyekola mũbĩrĩ wʼendũhĩ.

²⁶ Nibya oko kiro kyʼobuyilula, omugulu mukaletera Omwami Mukulu yʼobuhere bwʼeyĩsyano nyihya-nyihya yʼengano omo biro bikulu byenyũ byʼamayenga, mwasyabya nʼerĩhĩndana lĩbũyĩrĩre; simusyekola mũbĩrĩ wʼendũhĩ.

²⁷ Kandi mwasyahonga obuhere bwʼerĩokererya eribya erikumba lĩsĩhĩre busana nʼOmwami Mukulu, ehinume hibiri hyʼende, nʼembangale nguma, nʼehibangale hirinda hyʼomwaka muguma.

²⁸ Nʼobuhere bwʼeyĩsyano yʼengano bwasyo, eyĩsyano yʼenzelele eyĩtũlũngene nʼamagũta, ebihande bisatu byʼomwʼĩkũmĩ busana nʼobuli nume, ebihande bibiri byʼomwʼĩkũmĩ busana nʼembangale nguma,

²⁹ ekihande kiguma kyʼomwʼĩkũmĩ busana nʼobuli kabangale oko hibangale hirinda;

³⁰ kandi embaya nguma, eriyira endĩhĩ yʼembanulo busana nenyũ.

³¹ Eritomekera kubo obuhere bwʼerĩokererya bwʼemigulu yosĩ, nʼobuhere bwabo bwʼeyĩsyano yʼengano, mwasyaletabyo haguma nʼamahere wabyo wʼerĩũtũlĩra ahisi. Syasyabya butsira bulema.