Emiganzo 27 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwandu wʼabali ba Zelofehadĩ

¹ Nʼoko mugulu oyo abali ba Zelofehadĩ, mugala wa Heferĩ, mugala wa Gĩleadĩ, mugala wa Makĩrĩ, mugala wa Manase, abʼebihanda bya Manase mugala wa Yosefũ, mobahĩka hakũhĩ; nʼaya wa mena wʼabali buwe; Mala, Noa, na Hogla, na Mĩlka, na Tĩrza.

² Mobahangana embere sya Musa, nʼembere syʼomũhererĩ Eleazarĩ nʼembere wʼabasondolĩ nʼendeko yosĩ, oko lũkyo lwʼeHema yʼerĩhĩndanamo bati,

³ Tata wetu mwaholera omo mbwarara, kandi naye siabya omo ndeko yʼabandu bayĩhĩndanaya erilwa nʼOmwami Mukulu kera omo ndeko ya Kora; nĩkwa mwahola nʼamalolo wuwe ĩyowene-wene; kandi isiawite bagala.

⁴ Ko busana nakĩ erĩna lya tata wetu libulirane omo kihanda kiwe, kusangwa siawite mugala kwehĩ? Mutuhe esyombibi haguma nʼabagala bʼabotata wetu.

⁵ Na Musa mwaleta omwatsi wabo embere syʼOmwami Mukulu.

⁶ Neryo Omwami Mukulu mwabũga na Musa ati,

⁷ Balĩ ba Zelofehadĩ bamabũga ebyʼekwenene; kwenene wasyahabo esyombibi syʼomwandu omo katĩkatĩ kʼabagala bʼabotata wabo; wasyahabo omwandu wa tata wabo.

⁸ Kandi wasyabwira abana ba Ĩsraelĩ uti, Omundu amahola, atawite mugala wasyawatya mwali wuwe yʼomwandu wuwe.

⁹ Kandi atawite mwali, neryo mwasyaha omwandu wuwe gʼoko bagala babo.

¹⁰ Kandi atawite bagala babo, neryo mwasyaha omwandu wuwe ukwʼabo nyĩnya-lume.

¹¹ Kandi tata wuwe amabya atawite bagala babo, neryo mwasyaha omwandu wuwe gʼoko bandu bʼekĩtũnga kiwe oyuli hakũhĩ naye omo kihanda kiwe, naye asyalyago; nakyo kyasyabya kihano nʼekilayiro busana nʼabana ba Ĩsraelĩ, ngoko Mwami Mukulu ahana Musa.

¹² Neryo Omwami Mukulu mwabũga na Musa ati, Hetukira oko kitwa kyʼeAbarĩmũ, Ũlebaye ekihugo ekyo nabiriha bagala ba Ĩsraelĩ.

¹³ Ukandibya wabilangirakyo, nawe nibya wasyeya abotatakulu bawe, ngoko Harũnĩ mugala wenyũ egayabo;

¹⁴ kusangwa momwapona ekihano kyage omo mbwarara yʼeSĩnĩ, omo mwaga wʼendeko, momutanyiganza mo mũbũyĩrĩre oko magetsi embere syʼameso wabo. [Ayo wa magetsi wʼeMerĩba wʼeKadesĩ omo mbwarara yʼeSĩnĩ.]

Eriyisogwa lya Yosũa

¹⁵ Neryo Musa mwabwira Omwami Mukulu, ati,

¹⁶ Omwami Mukulu Nyamuhanga wʼebĩrĩmũ byʼemibiri yosĩ, ahĩre omundu oko ndeko,

¹⁷ oyo wangahongoka embere syabo, nʼoyo wangingyira embere syabo, nʼoyo wangatoka erisondolabo erihuluka, nʼerĩĩngĩryabo; endeko yʼOmwami Mukulu siyibye ngʼesyombũlĩ sitawite mũlĩsya.

¹⁸ Neryo Omwami Mukulu mwabũga na Musa, ati, Ĩmaya Yosũa mugala wa Nũnĩ, omundu oyuli nʼOmũlĩmũ, kandi ũmũhĩre kwʼebyala byawe;

¹⁹ kandi ũmũhanganaye embere syʼomũhererĩ Eleazarĩ, nʼembere syʼendeko yosĩ; kandi umuhamule embere syʼameso wabo.

²⁰ Kandi wasyamũhĩra kwʼekihande kyʼehamũlĩ yawe, neryo endeko yosĩ yʼabana ba Ĩsraelĩ ibatoka erĩmwowa.

²¹ Kandi, asyahangana embere syʼomũhererĩ Eleazarĩ, oyo wasyamũbũlĩrya omwʼitswera lya Ũrĩmũ embere syʼOmwami Mukulu. Omo kihano kiwe basyahuluka, nʼoko kihano kiwe basyingira, iye, nʼabagala ba Ĩsraelĩ, ye ndeko yosĩ.

²² Neryo Musa mwakola ngoko Mwami Mukulu amuhana; neryo mwĩmya Yosũa, mwamũhĩra embere syʼomũhererĩ Eleazarĩ, nʼembere wʼendeko yosĩ.

²³ Neryo Musa mwamũhĩra kwʼebyala, mwamuhamula, ngoko Mwami Mukulu ahana Musa.