Emiganzo 24 - AMASAKO ABOYTRTRE WA NYAMUHANGA AWAKAHULAWA MO BIBLIA

Eriminyerera lya Balama

¹ Neryo omugulu Balama alangira ngoko kyatsemesaya Omwami Mukulu eritsumula Ĩsraelĩ, mwatagenda ngʼeyindi migulu, erĩsondya obulagu, nĩkwa mwalolya obũsũ buwe oko luhande lwʼembwarara.

² Na Balama mwasumba ameso wuwe, mwalangira Ĩsraelĩ ĩbĩkere mo kihanda kihanda; nʼOmũlĩmũ wa Nyamuhanga mwamũhĩkako.

³ Neryo mwatsũka omũsyo wuwe, ati, Enzumwa ya Balama mugala wa Beorĩ, Enzumwa yʼomundu oyo erĩso liwe rĩrĩbũkere;

⁴ Enzumwa yʼoyũkowa ebĩnywa bya Nyamuhanga, Oyukalangira esyonzolĩ syʼOmũtokĩ Wʼebyosĩ, Eriwa ahisi, nĩkwa ĩnĩalĩbũkere kwʼameso.

⁵ Amahema wawe ni mabuya ati, Uwe Yakobo, Nʼahʼerĩĩkala hawe, uwe Ĩsraelĩ!

⁶ Ngʼemisya eyibonderere, Ngʼamalima oko mũsĩke wʼolũsĩ, Ngʼemĩsũbĩrĩ Omwami Mukulu abirihera, Ngʼekĩlagũ oko mũsĩke wʼamagetsi.

⁷ Amagetsi asyasenda akalũa omo bisya biwe, Nʼembuto yiwe yasyabya omo magetsi mangi, Nʼomwami wuwe asyabya mukulu kwilaba Agagĩ, Nʼobwami buwe bwasyahamĩbwa.

⁸ Nyamuhanga akamũlũsaya eMĩsĩrĩ; Akamwimira ngʼamahembe wʼenganda yʼomolĩ. Asyalya ebihanda byʼesyonzĩgũ siwe, Asyatsũtsanga amakũha wabo mo bitswe-bitswe, Nʼeritsimitabo omo misoha yiwe.

⁹ Akũnama, akabundama ngʼendale, Ngʼebuguma yʼendale; nindi wasyamũbũkya kwehĩ? Atsumulawe obuli mundu oyukakutsumula, Kandi atakirawe obuli mundu oyukakutakira.

¹⁰ Nʼerihitana lya Balaka molyaka uku Balama, neryo mwahumanga omo byala biwe; kandi Balaka mwabwira Balama ati, Nakubirikira eritsuma esyonzĩgũ syage, neryo, lebaya, ukinatsumulasyo esyongendo ĩsatu esĩ.

¹¹ Lino utibite ewawe; nalengekanaya erĩkũhĩra ahʼerĩsĩkya ĩnene; nĩkwa Omwami Mukulu abĩrĩkũkakĩrya okwʼĩsĩkĩbwa.

¹² Neryo Balama mwabũga na Balaka ati, Mondabwira abakwenda bawe, abo wanyitumira kwehĩ nyiti,

¹³ Balaka nomo angamba enyũmba yiwe eyoswĩre mwʼebĩtsĩpa nʼesyamagetsi, sinangatoka erĩkolakĩ kite kye kihano kyʼOmwami Mukulu, erikola ekibuya kutse ekibi omo bũlengekanĩa bwage ĩngyowene-wene. Ekyo Mwami Mukulu akabũga, kyo nasyabũga.

¹⁴ Na lino lebaya, ngaya oko bandu bage; Wase, ngandikubwira ebyo abandu aba basyakolera abandu bawe oko biro byʼenyũma.

¹⁵ Neryo mwatsũka omũsyo wuwe ati, Enzumwa ya Balama mugala wa Beorĩ akabũga, Enzumwa yʼomundu oyo erĩso liwe rĩrĩbũkere;

¹⁶ Enzumwa yʼoyũkowa ebĩnywa bya Nyamuhanga, Nʼeriminya amenge wʼOwendata Kutsibu, Oyukalangira esyonzolĩ syʼOmũtokĩ Wʼebyosĩ, Eriwa ahisi, nĩkwa ĩnĩalĩbũkere kwʼameso;

¹⁷ Ngamulangira, nĩkwa si lino; Ngamusamalira, nĩkwa sĩ hakũhĩ. Engũnũnũ yasyahulukira umu Yakobo, Nʼekyako kyasyahangana erĩlũa omo Ĩsraelĩ, Kyasyahĩnola embũmo ya Moabũ, Nʼerĩbũnangira ahisi abagala bosĩ ba Setĩ.

¹⁸ Na Edomũ yasyasĩgalĩbwa, Seĩrĩ yasyabya nzĩgalĩbwa nibya, yabya nzĩgũ yiwe; Omugulu Ĩsraelĩ akakola nʼamaka.

¹⁹ Nʼomuguma oyũkalũa uku Yakobo asyatabala, Kandi asyaherya abasĩgalira omo mũyĩ.

²⁰ Neryo mwatungerera Amalekĩ, kandi mwatsũka omũsyo wuwe, ati, Amalekĩ abya wʼerĩmbere omo bihanda; Nĩkwa endũlĩ yiwe yasyahĩkerera okwʼihera.

²¹ Neryo mwasamalira Omũkenĩ, mwatsũka omũsyo wuwe ati, Aherĩĩkala hawe hawite amaka, Nʼolutu lwawe lwabĩrĩhĩrwa oko kikwangwa kyʼerĩbwe.

²² Nomo bine bitya Abakenĩ basyaherĩbwa, Erĩhĩka biro bingahi Asũrĩ asyababika omo bunyegwa.

²³ Kandi mwatsũka omũsyo wuwe ati, Ĩlolo, nindi angatoka eribya aho Nyamuhanga atetahamula kwehĩ?

²⁴ Nĩkwa amato asyasa akalũa oko mũsĩke wʼeKĩtĩmũ, Basyagalya Asũrĩ, nʼerĩagalya Eberĩ; Nabo basyahĩka okwʼĩherĩbwa nibya.

²⁵ Neryo Balama mwahangana, mwalũaho nʼerisuba ewuwe; Balaka mwayigendera, omo nzira yiwe nibya.