Emiganzo 23 - AMASAKO ABOYTRTRE WA NYAMUHANGA AWAKAHULAWA MO BIBLIA

Balama akatsumula Abaĩsraelĩ

¹ Neryo Balama mwabũga na Balaka ati, Ũnyĩhĩmbĩre hano ebiherero birinda, ũnyĩkokoteraye hano esyonume sirinda nʼesyombangale sirinda.

² Neryo Balaka mwakola ngoko Balama abũga; neryo Balaka na Balama mobahonga oko buli kiherero enume nguma yʼende nʼembangale nguma.

³ Na Balama mwabũga na Balaka, ati, Hangana hakũhĩ nʼobuhere bwawe bwʼerĩokererya, nage ngandigenda; kwamũhwa Omwami Mukulu akandĩmbĩkako, nʼekĩndũkĩ akandĩnyĩkangya, ngandikubwira. Neryo mwaya oko kitwa kite ko kindu.

⁴ Na Nyamuhanga mwahĩndana na Balama, neryo Balama mwabũga naye ati, Nabirisingika ebiherero birinda, kandi nabirihonga enume nguma yʼende nʼembangale nguma oko buli kiherero.

⁵ Neryo Omwami Mukulu mwahĩra ekĩnywa omo buno bwa Balama, ati, Usube eyiri Balaka, neryo wasyabũga ebĩnywa ebĩ.

⁶ Neryo Balama mwasuba ewa Balaka, neryo lebaya, inianimene hakũhĩ nʼobuhere buwe bwʼerĩokererya, iye nʼabakulu bosĩ ba Moabũ.

⁷ Neryo Balama mwatsũka omũsyo wuwe, ati, Balaka abirinyireta erĩlũa eAramũ, Omwami wʼeMoabũ erĩlũa oko bitwa byʼendata; ati, Wase, unyitsumire Yakobo, Wase, uhayire Ĩsraelĩ!

⁸ Nasyatsuma nyiti abo Nyamuhanga atetatsuma kwehĩ? Kandi nangatoka erihayira nyiti, abo Mwami Mukulu atetahayira kwehĩ?

⁹ Ngoko ngamulolako oko singi yʼamabwe, Kandi ngamulangira oko bitwa; Lebaya, ni bandu bĩkere ĩbobene, Kandi sibendisyaganzirwa omo bihanda.

¹⁰ Nindi wangatoka eriganza olũtũtũ lwa Yakobo, Kutse oyo wangaganza oluhande luguma lwʼomo bini lwa Ĩsraelĩ kwehĩ? Uleke nyihole oluholo lwʼomutunganene, Nʼendũlĩ yage ibye ngʼeyiwe!

¹¹ Neryo Balaka mwabũga na Balama ati, Wamangolerakĩ kwehĩ? Monakuleta eritsuma esyonzĩgũ syage, nĩkwa lebaya, wabiritsumulasyo kũndũ.

¹² Naye mwamũsũbĩrya ati, Sirinyitolere erĩrebya ndeke nyĩbũge ekyo Mwami Mukulu akahĩra omo buno bwage kwehĩ?

¹³ Na Balaka mwabũga naye, ati, Kĩsĩ-kĩsĩ, nyiti wase haguma nage ehandi, aho wangatoka erilola kubo; wasyalangira oluhande lwʼendũlĩ yabo nyisa, siwendilangirabo abosĩ; neryo unyitsumirebo aho.

¹⁴ Neryo mwamutwala omo bwerere bwʼeZopĩmũ, erĩhĩka oko singi yʼePĩsĩga, kandi mwahĩmba ebiherero birinda, mwahonga enume yʼende nguma nʼembangale nguma oko buli kiherero.

¹⁵ Neryo mwabũga na Balaka ati, Hangana hano hakũhĩ nʼobuhere bwawe bwʼerĩokererya, omugulu ngayahĩndana nʼOmwami Mukulu halya.

¹⁶ Neryo Omwami Mukulu mwahĩndana na Balama, mwahĩra ekĩnywa kyʼomo buno buwe, neryo mwabũga ati, Usube eyiri Balaka, kandi Ũkandĩbũga ebĩ.

¹⁷ Neryo Balama mwahĩka eyiri Balaka, neryo inianimene hakũhĩ nʼobuhere buwe bwʼerĩokererya, nʼabakulu bʼeMoabũ haguma naye. Neryo Balaka mwabũga naye ati, Omwami Mukulu amabũga atĩkĩ kwehĩ?

¹⁸ Naye mwatsũka erigusa omũsyo wuwe, ati, Hangana uwe Balaka, uhulikirire; Unyihulikirire, uwe mugala wa Zĩporĩ;

¹⁹ Nyamuhanga si mundu, uti angabiha, Kutse mugala wʼomundu, uti angayibindukako; Amabũga, isiendisyakolakyo kwehĩ? Kutse amabĩgũga, ĩsĩendĩsyaberereryakyo kwehĩ?

²⁰ Lebaya, nabirihabwa ekihano kyʼeritsumula; Omugulu abiritsumula, nage sinangatoka eribindulalyo.

²¹ Sialitalangira obubi uku Yakobo; Kutse sialitalangira omwaga uku Ĩsraelĩ; Omwami Mukulu Nyamuhanga wuwe ali haguma naye, Nʼobogo bwʼomwami buli omo katĩkatĩ kabo.

²² Nyamuhanga akalũsayabo omo Mĩsĩrĩ; Akimirabo ngʼamahembe wʼenganda yʼomolĩ.

²³ Kusangwa sihali busaki uku Yakobo; Kutse sihali erilagula uku Ĩsraelĩ. Oko mugulu atolere Yakobo asyabwirwa, Na Ĩsraelĩ asyabwirwa ebyo Nyamuhanga abirikola!

²⁴ Lebaya, abandu bakahangana ngʼebuguma yʼendale, Kandi bakayisumba ngʼendale. Isiyendibundama ahisi ite yabirya obuhiyi, Nʼerĩpũlya omusasi wʼeyĩtawa.

²⁵ Na Balaka mwabwira Balama ati, Sutsumebo nʼahake, kutse sutsumulebo nʼahake.

²⁶ Nĩkwa Balama mwasũbĩrya nʼeribwira Balaka ati, Mondakubwira nyiti ebyosĩ ebyo Mwami Mukulu akabũga, byo nyitolere inakola kwehĩ?

²⁷ Na Balaka mwabũga na Balama ati, Kĩsĩ-kĩsĩ Wase, ngandikutwala ehandi; kwamũhwa kyasyatsemesya Nyamuhanga iwanyitsumira abandu aba erĩlũa eyo.

²⁸ Neryo Balaka mwatwala Balama oko singi yʼePeorĩ, ekitungerere eyĩkwa omo mbwarara.

²⁹ Na Balama mwabwira Balaka ati, Ũnyĩhĩmbĩre hano ebiherero birinda, ũnyĩkokoteraye esyonume syʼesyonde sirinda nʼesyombangale sirinda.

³⁰ Neryo Balaka mwakola ngoko Balama abũga, mwahonga enume yʼende nguma nʼembangale nguma oko buli kiherero.