Emiganzo 21 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩkĩnda Aradĩ

¹ Omugulu omwami wʼeAradĩ, Omunya Kanana, oyo wabya ĩkere elutambi lwʼeyĩkwa, owa engulu ngoko Abaĩsraelĩ bakasa omo nzira yʼeAtarĩmũ; neryo mwalwa na Ĩsraelĩ, mwahamba abandi ba kubo eribya banyegwa

² Na Ĩsraelĩ mwalahĩrya oko Mwami Mukulu mwabũga ati, Wamahĩra abandu aba bʼomo byala byage, neryo nasyaherya emĩyĩ yabo yo kutsibu.

³ Neryo Omwami Mukulu mowa omulenge wa Ĩsraelĩ, mwahabo Abakanana; mobaheryabo kutsibu nʼemĩyĩ yabo; neryo erĩna lyaho molyahulwa mo Horma.

Enzoka yʼomulinga

⁴ Kandi mobahongoka erĩlũa oko kitwa kyʼeHorĩ omo nzira yʼEngetsi yʼOmunyama, erĩtĩmba oko kihugo kyʼeEdomu; nʼabandu mobaluha omo mitima busana nʼolugendo.

⁵ Nʼabandu mobabũga ebyʼeripona Nyamuhanga na Musa, bati, Busana nakĩ mwabĩrĩtũlũsya omo Mĩsĩrĩ eriholera omo mbwarara kwehĩ? Kusangwa sihali bundu, sihali magetsi; nʼemitima yetu yamagambwa akalyo katyakatya.

⁶ Neryo Omwami Mukulu mwatuma esyonzoka syʼomuliro omo katĩkatĩ kʼabandu, kandi mosyalumanga abandu; nʼabandu bangi omo katĩkatĩ kʼAbaĩsraelĩ mobahola.

⁷ Nʼabandu mobahĩka uku Musa, bati, Twabĩrĩhalya, busana nʼerĩbũga ebyʼeripona Omwami Mukulu, nʼerikupona; usabe oko Mwami Mukulu, alũsaye esyonzoka ũkwʼĩtwe. Neryo Musa mwasabira bandu.

⁸ Neryo Omwami Mukulu mwabũga na Musa ati, Uyikolere enzoka yʼomulinga, ũhĩreyo oko muti; neryo kyasyabya, obuli mundu oyo wabirilumwa, omugulu akasamalirayo, asyabyaho.

⁹ Neryo Musa mwakola enzoka yʼomulinga, mwahĩrayo oko muti; neryo mokyabya omugulu enzoka yaluma omundu, omugulu asamalira enzoka yʼomulinga, mwabyaho.

Olugendo lwa Ĩsraelĩ

¹⁰ Nʼabana ba Ĩsraelĩ mobahongoka, mobalalirira eObotĩ.

¹¹ Kandi mobahongoka erĩlũa eObotĩ mobalalirira eĨyeAbarĩmũ, omo mbwarara eyiri embere syʼeMoabũ, oko luhande lwʼeyo eryuba likasira.

¹² Neryo mobahongoka, mobalalirira omo musya wʼeZeredĩ.

¹³ Erĩlũa eyo mobahongoka, mobalalirira eyisirya wʼeArnonĩ, owali omo mbwarara eyĩkalũa oko mutano wʼAbaamorĩ; kusangwa Amonĩ ni mutano wʼeMoabũ, omo katĩkatĩ kʼeMoabũ nʼAbaamorĩ.

¹⁴ Neryo kĩkabũgawa omo Kitabu kyʼAmalwa wʼOmwami Mukulu, kiti, EWahebũ omo Sũfa, Nʼemisya yʼeArnonĩ,

¹⁵ Nʼobwandagala bwʼemisya, Eyikandagalira ahʼerĩĩkala lya Arĩ, Nʼeryegemera oko mitano yʼeMoabũ,

¹⁶ Nʼerĩlũa aho mobagenda eBerĩ; ekyo kye kitehero ekyo Mwami Mukulu abwira Musa ati, Hĩndanaya abandu bo haguma ngandihabo amagetsi.

¹⁷ Neryo Abaĩsraelĩ mobimba Olwimbo olũ: Kũnũnũka, uwe ĩsoko; mwimbireyo;

¹⁸ Eyĩsoko eyo abakulu batakula, Eyo abakama bʼabandu batakula, Omo kyako kyʼOmwami, haguma nʼemyũtso yabo. Erĩlũa omo mbwarara mobahongoka erĩhĩka eMatana.

¹⁹ Nʼerĩlũa eMatana erĩhĩka eNahalĩelĩ; nʼerĩlũa eNahalĩelĩ erĩhĩka eBamotĩ;

²⁰ nʼerĩlũa eBamotĩ mobahĩka omo musya owali omo bwerere bwʼeMoabũ, erĩhĩka oko singi yʼePĩsĩga, eyĩsamalĩre embwarara.

Ĩsraelĩ akakĩnda Sĩhonĩ

²¹ Neryo Ĩsraelĩ mwatuma abakwenda uku Sĩhonĩ omwami wʼAbaamorĩ, ati,

²² Uleke nyilabe eritwangana omo kihugo kyawe. Sitwendisyakitira emũsĩke omo kisuki kutse omwʼirima lyʼebĩnyũ; sitwendĩsyapũlya oko magetsi wʼebitehero; tukandisyalaba omo nzira nene yʼOmwami, erĩhĩka aho twasyabilabira oko mutano wawe.

²³ Nĩkwa Sĩhonĩ mwatalĩga Ĩsraelĩ erilaba omo mutano wuwe; nĩkwa Sĩhonĩ mwahĩndanĩa abandu buwe bosĩ bo haguma, mwayalwa na Ĩsraelĩ omo mbwarara, nʼerĩhĩka eYasa; mwalwa na Ĩsraelĩ.

²⁴ Neryo Ĩsraelĩ mwamũswĩrya omo boya bwʼomũyalĩ, mwasĩgalya ekihugo kiwe erĩlũa eArnonĩ nʼerĩhĩka eYaboko, erĩhĩka oko bandu ba Amonĩ; kusangwa Omutano wʼabana ba Amonĩ abya eYazerĩ.

²⁵ NʼAbaĩsraelĩ mobĩmya emĩyĩ yosĩ eyĩ; kandi Abaĩsraelĩ mobĩkala omo mĩyĩ yosĩ yʼAbaamorĩ, omo Hesĩbonĩ, nʼomo mĩyĩ yabo yosĩ.

²⁶ Kusangwa Hesĩbonĩ abya mũyĩ wa Sĩhonĩ omwami wʼAbaamorĩ, oyo walwa nʼomwami wʼerĩmbere wʼeMoabũ, ĩnĩamabĩlũsya ekihugo kiwe kyosĩ omo byala biwe, erĩhĩka eArnonĩ.

²⁷ Kikaleka ĩbabũga omo mĩsyo bati, Mwase eHesĩbonĩ; ahĩmbawe! Omũyĩ wa Sĩhonĩ ahĩmbawe nʼerihandwa ndeke;

²⁸ Kusangwa omuliro abirihulukira eHesĩbonĩ, Ekirimi kyʼomuliro kyamalũa oko mũyĩ wa Sĩhonĩ; Amalya Arĩ wʼeMoabũ, Ehitwa ehikulu hyʼeArnonĩ.

²⁹ Obũlĩge kuwe, Moabũ! Mwamahwa, Ĩnywe bandu bʼeKemosĩ; Abiriha abagala buwe eribya basayĩ, Nʼabali buwe omo bunyegwa, Uku Sĩhonĩ omwami wʼAbaamorĩ.

³⁰ Twabirigusabo ahisi; Hesĩbonĩ abirihera erĩhĩka eDĩbonĩ, Twabĩrĩherya erĩhĩka eNofa, Eyĩhĩkĩre eMedeba.

³¹ Neryo Ĩsraelĩ mobĩkala omo kihugo kyʼAbaamorĩ.

³² Na Musa mwatuma eriringa eYazerĩ; kandi mobĩmya emĩyĩ yayo, mobahiga Abaamorĩ ababyayo.

Erĩkwa lya Ogĩ

³³ Neryo mobabũnũkala nʼerihetuka omo nzira yʼeBasanĩ; na Ogĩ omwami wʼeBasanĩ mwahulukirabo, iye nʼabandu buwe bosĩ, erilwira eEdreĩ.

³⁴ Nĩkwa Omwami Mukulu mwabũga na Musa ati, Sigumubahe; kusangwa nabĩrĩmũhĩra omo byala byawe, nʼabandu buwe bosĩ, nʼekihugo kiwe; kandi wasyamukola ngoko wakola Sĩhonĩ omwami wʼAbaamorĩ, oyo wabya ĩkere eHesĩbonĩ.

³⁵ Litya mobamũswĩrya, nʼabagala buwe nʼabandu buwe bosĩ, mobatasĩga mundu nʼomuguma; neryo mobasĩgalya ekihugo kiwe.