Emiganzo 20 - AMASAKO ABOYTRTRE WA NYAMUHANGA AWAKAHULAWA MO BIBLIA

Oluholo lwa Mĩrĩamũ

¹ Neryo abana ba Ĩsraelĩ, endeko yosĩ, mobahĩka omo mbwarara yʼeSĩnĩ oko mukera wʼerĩtsũka; nʼabandu mobĩkala eKadesĩ. Neryo Mĩrĩamũ mwaholeraho, mwatabwaho.

Abandu bakatonga Musa

² Naho sihabya magetsi busana nʼendeko; neryo mobayĩhĩndanĩa eritonga Musa nʼeritonga Harũnĩ.

³ Nʼabandu mobalwa na Musa, bati, Kumbe twahola omugulu abalĩkyetu baholera embere syʼOmwami Mukulu!

⁴ Busana nakĩ mwabirireta endeko yʼOmwami Mukulu omo mbwarara eyĩ eriholeramo, ĩtwe nʼesyonyama syetu kwehĩ?

⁵ Kandi busana nakĩ momwatũhetũkya erĩtũlũsya eMĩsĩrĩ, erituleta ahabi hano kwehĩ? Sihali embuto yʼengano, kutse emĩtĩnĩ, kutse emĩrĩkĩ yʼebĩnyũ, kutse amakomamanga; kandi sihali amagetsi wʼerĩpũlya.

⁶ Na Musa na Harũnĩ mobalũa embere wʼendeko erĩhĩka oko lũkyo lwʼeHema yʼerĩhĩndanamo, mobawa nʼerĩtũlama ahisi. Neryo olukengerwa lwʼOmwami Mukulu molwahulukirabo.

Amagetsi wʼeMerĩba

⁷ Kandi Omwami Mukulu mwabũga na Musa ati,

⁸ Wĩmaye omũtso, ũhĩndanaye endeko, uwe na Harũnĩ mugala wenyũ, mũbũge nʼerĩbwe emuliro wʼameso wabo, lĩhũlũkaye amagetsi walyo. Nawe wasyahũlũkĩryabo amagetsi erĩlũa omwʼĩbwe; ko wasyanywĩsya utya endeko nʼesyonde syabo.

⁹ Neryo Musa mwĩmya omũtso embere syʼOmwami Mukulu, ngoko amuhana.

¹⁰ Neryo Musa na Harũnĩ mobahĩndanĩa endeko embere wʼerĩbwe. Neryo mwabũga nabo ati, Lino muhulikirire, Ĩnywe mukatupona, tũkandĩbahũlũkĩrya amagetsi erĩlũa omwʼĩbwe erĩ kwehĩ?

¹¹ Neryo Musa mwasumba ebyala biwe, mwaswĩrya erĩbwe ngendo ĩbĩrĩ omo mũtso wuwe; nʼamagetsi mangi mwalũamo, nʼendeko moyapũlya nʼesyonde syabo.

¹² Neryo Omwami Mukulu mwabũga na Musa na Harũnĩ ati, Kusangwa simwetanyĩkĩrĩrya nʼerinyihigula ngoko nyĩbũyĩrĩre omo meso wʼabana ba Ĩsraelĩ, neryo simwendĩsyalyatya endeko eyĩ omo kihugo ekyo nahabo.

¹³ Aya wa magetsi wʼeMerĩba; kusangwa abana ba Ĩsraelĩ mobalwa nʼOmwami Mukulu, naye mwayĩkangya kubo kwʼali mũbũyĩrĩre.

Abaedomũ bakakakĩraya Abaĩsraelĩ erilaba

¹⁴ Neryo eKadesĩ, Musa mwatuma abakwenda eriya oko mwami wʼeEdomũ ati, Mugala wenyũ Ĩsraelĩ akabũga ati, Ũnasĩ amalĩge gosĩ awabiritutogerako;

¹⁵ ngoko abotata wetu bandagalira eMĩsĩrĩ, kandi motwĩkala eMĩsĩrĩ yʼomugulu muli; nʼAbanya Mĩsĩrĩ mobatukola nabi, ĩtwe nʼabotata wetu.

¹⁶ Nĩkwa omugulu twalakira Omwami Mukulu, iye mowa omulenge wetu, mwatuma omũlaĩka, kandi mwatũlũsya eMĩsĩrĩ, neryo lebaya, tuli eKadesĩ, omũyĩ gʼoko ndũlĩ yʼomutano wawe.

¹⁷ Tukakusaba tuti, Uleke tulabe omo kihugo kyawe; sitwendilaba omo malima kutse omo malima wʼebĩnyũ; sĩtwendĩpũlya oko magetsi awali omo bitehero. Twasyalaba omo nzira yʼOmwami, sĩtwendĩsyalolya oko byala byʼamali kutse oko byʼamalembe, tute twabilaba emitano yawe.

¹⁸ Na Edomũ mwamũsũbĩrya ati, Siwendisyanyilabako, ngasyakuhulukako nʼomũyalĩ.

¹⁹ Nʼabana ba Ĩsraelĩ mobabũga naye bati, Tukandisyahetuka omo nzira nene; kandi twamapũlya oko magetsi wawe, ĩngye nʼesyonde syage, neryo nasyakuha enzwere yago; ekyo kisa. Uleke nyilabe omo bisando byage butsira ekindi kindu.

²⁰ Nĩkwa Edomũ mwabũga ati, Siwendisyalaba. Neryo Edomũ mwamuhongokera nʼabandu bangi, nʼebyala bĩkalĩre.

²¹ Neryo Edomũ mwagana Ĩsraelĩ erilaba omo kihugo kiwe; neryo Ĩsraelĩ mwalolya handi mwamuleka.

Oluholo lwa Harũnĩ

²² Neryo omugulu bahongoka erĩlũa eKadesĩ; abana ba Ĩsraelĩ, nʼendeko yosĩ, mobahĩka oko kitwa kyʼeHorĩ.

²³ Neryo Omwami Mukulu mwabũga na Musa na Harũnĩ oko kitwa kyʼeHorĩ, hakũhĩ nʼomutano wʼeEdomũ, ati,

²⁴ Harũnĩ asyeya abĩse-kulu wuwe; kusangwa siendisyingira omo kihugo ekyo nabiriha abana ba Ĩsraelĩ, kusangwa momwapona erihana lyage oko magetsi wʼeMerĩba.

²⁵ Wĩmaye Harũnĩ na Eleazarĩ mugala wuwe, uletebo oko kitwa kyʼeHorĩ;

²⁶ wambule Harũnĩ yʼesyongimba siwe nʼerĩambalyasyo Eleazarĩ mugala wuwe. Neryo Harũnĩ asyeya abĩse-kulu wuwe, neryo asyaholeraho.

²⁷ Neryo Musa mwakola ngoko Mwami Mukulu amuhana, neryo mobahetukira oko kitwa kyʼeHorĩ embere syʼameso wʼendeko yosĩ.

²⁸ Neryo Musa abere abiambula Harũnĩ yʼesyongimba siwe, mwambalyasyo Eleazarĩ mugala wuwe; na Harũnĩ mwaholeraho oko singi yʼekitwa. Neryo Musa na Eleazarĩ mobakĩma oko kitwa.

²⁹ Nʼomugulu endeko yosĩ yalangira ko Harũnĩ amabihola, enyũmba yosĩ ya Ĩsraelĩ mobalira busana na Harũnĩ ebiro makũmĩ asatu.