Emiganzo 18 - AMASAKO ABOYTRTRE WA NYAMUHANGA AWAKAHULAWA MO BIBLIA

Emĩbĩrĩ yʼabahererĩ

¹ Neryo Omwami Mukulu mwabũga na Harũnĩ ati, Uwe nʼabagala bawe nʼekĩtũnga kyʼabotata wawe mwasyaheka olubanza lwʼahabũyĩrĩre; uwe nʼabagala bawe mwasyaheka olubanza lwʼobũhererĩ bwenyũ.

² Nĩkwa mulete haguma abagala benyũ nibya, ekihanda kya Lawĩ, ekihanda kya tata wawe, ibatoka eribegerana nawe, nʼerikukolera; nĩkwa uwe nʼabagala bawe mwasyabya embere syʼeHema yʼerĩtũlago.

³ Nabo basyawatĩkya omũbĩrĩ wawe, nʼobũteya bwʼeHema yosĩ; nĩkwa ĩsĩbahĩka hakũhĩ nʼebindu byʼahabũyĩrĩre nʼoko kiherero, bakasyahola, haguma nawe.

⁴ Kandi basyasangira nawe, nʼerikola omũbĩrĩ; wʼeHema yʼerĩhĩndanamo, busana nʼomũbĩrĩ gosĩ wʼeHema; nʼowʼehandi isiasegera hakũhĩ nenyũ.

⁵ Nenyũ mwasyakwama omũbĩrĩ wʼahabũyĩrĩre, nʼomũbĩrĩ wʼekiherero; erihitana likasyaswabya oko bana ba Ĩsraelĩ.

⁶ Nage, nabĩrĩmya abagala benyũ Abalawĩ omo bana ba Ĩsraelĩ; mwabirihabwabo mo lũsũnzo bakahabawa oko Mwami Mukulu, erikola omũbĩrĩ wʼeHema yʼerĩhĩndanamo.

⁷ Uwe nʼabagala bawe mwasyakola obũhererĩ bwenyũ busana nʼobuli kindu kyʼekiherero, na busana nʼekiri enyũma wʼolukimba olũkasũkũlĩraya; nenyũ mwasyakola omũbĩrĩ. Ngabaha obũhererĩ eribya ngʼomũbĩrĩ wʼolũsũnzo; nʼowʼehandi oyũkahĩka hakũhĩ asyĩtwa.

⁸ Kandi Omwami Mukulu mwabũga na Harũnĩ ati, Nage, tungerera, nabirikuha obũteya bwʼamahere wage, esyo sye syonzũnzo syosĩ sĩbũyĩrĩre syʼabana ba Ĩsraelĩ; namakuhasyo ngʼerĩgabo, nʼoko bagala bawe, eribya igabo kera na kera.

⁹ Ebĩ byasyabya byawe oko syonzũnzo sĩbũyĩrĩre kutsibu, esikabikawa oko syʼomuliro; obuli hongo yabo, obuli buhere bwʼeyĩsyano bwabo bwʼengano, nʼobuli buhere bwʼebibi, nʼobuli buhere bwʼolubanza, ago basyamba, asyabya abũyĩrĩre kutsibu busana nawe na busana nʼabagala bawe.

¹⁰ Wasyalya kugo ngʼolũsũnzo lũbũyĩrĩre kutsibu; obuli mulume asyalya kugo; byasyabya bĩbũyĩrĩre busana nawe.

¹¹ Nʼekĩ nakyo ni kyawe; obuhere bwʼerisumba bwʼolũsũnzo lwabo, amahere gosĩ wʼerĩhũnga-hũngya wʼabana ba Ĩsraelĩ; nabirikuhago, nʼoko bagala bawe nʼoko bali bawe, eribya erĩgabo kera na kera; obuli mundu oyo werĩre omo nyũmba yawe asyalya kulyo.

¹² Ebyowenenga omo magũta, nʼebyowenenga byʼerioha byʼebĩgũma byʼebĩnyũ, nʼoko ngano, Obuyilula bwabo obo bakaha Omwami Mukulu, nabirikuhabyo.

¹³ Nʼobuyilula bosĩ obuli omo kihugo kyabo obo bakaletera Omwami Mukulu, byasyabya byawe; nʼobuli mundu oyo werĩre omo nyũmba yawe asyalya kubyo.

¹⁴ Obuli kindu ekyabirihigulwa omo Ĩsraelĩ kyasyabya kyawe.

¹⁵ Obuli kindu ekĩkatsũka eributwa kyʼemibiri yosĩ, ekyo bakahongera Omwami Mukulu, ekyʼabandu nʼekyʼesyonyama kyasyabya kyawe; nĩkwa akambere kʼomundu wasyatongolyako, nʼakambere kʼesyonyama esĩtowene wasyatongolyako.

¹⁶ Nabyo byasyatongolĩbwa omo katĩkatĩ kabyo, ebyʼomukera muguma wasyatongolyabyo ngʼeriganza lyawe, busana nʼebĩtsĩpa byʼesyosekelĩ ĩtanu omo lulengo lwʼesekelĩ yʼahabũyĩrĩre, ebyo ni gera makũmĩ abiri.

¹⁷ Nĩkwa akambere kʼende, kutse akambere kʼembũlĩ, kutse akambere kʼembene, sĩwendĩsyatongolyahyo; kusangwa hĩbũyĩrĩre; wasyatsatsanga omusasi wahyo gʼoko kiherero, nʼerĩokererya ebĩsabũ byahyo byʼomo mũkĩ eribya buhere obũkokĩbawa oko muliro, busana nʼerikumba lĩsĩhĩre oko Mwami Mukulu.

¹⁸ Nʼesĩswĩ syahyo syasyabya syawe, ngʼekĩkũba kyasyo kyʼerĩhũnga-hũngya ngʼekihinga kyʼamali, byasyabya byawe.

¹⁹ Amahere gosĩ wʼesyonzũnzo sĩbũyĩrĩre, esyo abana ba Ĩsraelĩ bakahongera Omwami Mukulu nabirikuhago, nʼabagala bawe nʼabali bawe, ngʼerĩgabo lya kera na kera. Ni ndagano yʼomũnyũ kera na kera embere syʼOmwami Mukulu ukʼuwe nʼoko bana bawe.

²⁰ Neryo Omwami Mukulu mwabwira Harũnĩ ati, Siwendisyabya nʼomwandu omo bitaka byabo, kutse, siwendisyabya nʼerĩgabo omo katĩkatĩ kabo; Ĩngye indi ĩgabo lyawe nʼomwandu wawe omo katĩkatĩ kʼabana ba Ĩsraelĩ.

²¹ Nʼoko bana ba Lawĩ, tungerera, nabirihabo ekihande kiguma kyʼomwʼĩkũmĩ kyosĩ omo Ĩsraelĩ eribya mwandu busana nʼomũbĩrĩ wabo ogo bakakola, omũbĩrĩ wʼeHema yʼerĩhĩndanamo.

²² Nʼerĩtsũka lino abana ba Ĩsraelĩ sĩbahĩke hakũhĩ nʼeHema yʼerĩhĩndanamo, bakasyaheka ebibi byabo nʼerihola.

²³ Nĩkwa Abalawĩ ĩbobene basyakola omũbĩrĩ wʼeHema yʼerĩhĩndanamo, nabo basyaheka ebibi byabo; kyasyabya kihano kera na kera omo syondengo syenyũ syosĩ; nʼomo katĩkatĩ kʼabana ba Ĩsraelĩ sibendisyabya nʼomwandu.

²⁴ Kusangwa ekihande kiguma kyʼabana ba Ĩsraelĩ, ekyo bakahonga eribya buhere oko Mwami Mukulu, nabirihakyo oko Balawĩ eribya mwandu; neryo nabĩrĩbũga busana nabo nyiti, sibendisyabya nʼomwandu omo katĩkatĩ kʼabana ba Ĩsraelĩ.

²⁵ Kandi Omwami Mukulu mwabũga na Musa ati,

²⁶ Wasyabũga nʼAbalawĩ, nʼeribwirabo uti, Omugulu mũkĩmaya ekihande kiguma kyʼomwʼĩkũmĩ oko bana ba Ĩsraelĩ ekyo nabiribaha erĩlũa kubo eribya mwandu wenyũ, neryo mwasyaleta oko Mwami Mukulu obuhere bwa kukyo, ekihande kiguma kyʼomwʼĩkũmĩ omo kihande kiguma kyʼomwʼĩkũmĩ.

²⁷ Nʼobuhere bwenyũ bwasyaganzirwa kwĩnywe ngʼengano yʼekĩhũmbĩro, kandi ngʼerĩũsũla lyʼekikamiro kyʼebĩnyũ.

²⁸ Ko mwasyaletera Omwami Mukulu yʼobuhere oko bihande byʼomwʼĩkũmĩ byenyũ byosĩ mutya, ebyo mukangirira oko bana ba Ĩsraelĩ, neryo umwʼebyo mwasyaha Harũnĩ omũhererĩ yʼobuhere bʼomwami Mukulu.

²⁹ Omo syonzũnzo syenyũ syosĩ mwasyaha Omwami Mukulu obuli buhere obumutolere, ebyowenenga byasyo, ekitswe kyabo ekyabirihigulwa mo kĩbũyĩrĩre.

³⁰ Neryo wasyabwirabo uti, Omugulu mwabirihera kubyo ebyowene musyo, neryo ebikasaka byasyaganzirwa oko Balawĩ ngʼendũndĩ yʼekĩhũmbĩro, kandi ngʼendũndĩ yʼekikamiro kyʼebĩnyũ.

³¹ Nenyũ mwasyalirayo ehosĩ, Ĩnywe nʼebĩtũnga byenyũ; kusangwa nĩ ndũndĩ yenyũ eririha omũbĩrĩ wenyũ omo Hema yʼerĩhĩndanamo.

³² Nenyũ simwendisyaheka erĩlolo busana nayo, omugulu mwamabihera kubo ebyowenenga byabo. Nĩkwa sĩmũsyetsandaya esyonzũnzo sĩbũyĩrĩre syʼabana ba Ĩsraelĩ, mukasyahola.