Emiganzo 16 - AMASAKO ABOYTRTRE WA NYAMUHANGA AWAKAHULAWA MO BIBLIA

Eriyisamambula lya Kora

¹ Neryo Kora, mugala wa Ĩzĩharĩ, mugala wa Kohatĩ, mugala wa Lawĩ, haguma na Datanĩ na Abĩramũ, abagala ba Elĩabũ, na Onĩ, mugala wa Peletĩ, abagala ba Rũbenĩ, mobĩmya bandu,

² mobahangana embere sya Musa, haguma nʼabandi bandu ba Ĩsraelĩ, abasondolĩ magana abiri nʼamakũmĩ atanu bʼendeko abayisogawa okwʼĩhĩndana lyʼendeko, abandu abakengĩrwe;

³ mobayĩhĩndanĩa haguma eripona Musa, nʼeripona Harũnĩ, nʼeribwirabo bati, mukayibagala kutsibu, ĩmũnasĩ kwʼendeko yosĩ ĩbũyĩrĩre, nʼobuli muguma wa kubo, kandi Omwami Mukulu ali omo katĩkatĩ kabo; busana nakĩ mũkayĩhamaya endata oko ndeko yʼOmwami Mukulu kwehĩ?

⁴ Neryo omugulu Musa owa ekyo, mwawa oko bũsũ buwe;

⁵ neryo mwabũga na Kora nʼendeko yiwe yosĩ, ati, Omo ngyakya-ngyakya Omwami Mukulu asyakanganĩa abuwe nga ni bahi, nʼoyũbũyĩrĩre nga nindi, kandi asyamuleta hakũhĩ naye; yo nʼoyo asyayisoga asyamuleta hakũhĩ naye.

⁶ Mukole ekĩ: Mwĩmaye esyoruho, Kora, nʼendeko yiwe yosĩ;

⁷ kandi mũhĩre omuliro go musyo, mũhĩre nʼobukwa endata kugo embere syʼOmwami Mukulu engyakya; neryo omundu oyo Mwami Mukulu asyayisoga, yo wanasyabya oyũbũyĩrĩre; mwamabikola ebitolere, Ĩnywe bagala ba Lawĩ.

⁸ Kandi Musa mwabwira Kora ati, Muhulikirire lino, Ĩnywe bagala ba Lawĩ;

⁹ si mwatsi munene kwĩnywe kwehĩ, Nyamuhanga wa Ĩsraelĩ amabahigula oko ndeko ya Ĩsraelĩ, eribaleta hakũhĩ naye, erikola omũbĩrĩ wʼahʼerĩĩkala lyʼOmwami Mukulu, nʼerihangana embere syʼendeko erikolerabo kwehi?

¹⁰ Kandi ngoko abiri kuleta hakũhĩ uwe Kora, nʼabagala benyũ bosĩ abagala ba Lawĩ haguma nawe kwehĩ? Kandi nenyũ mukasonda obũhererĩ nibya kwehĩ?

¹¹ Neryo uwe nʼendeko yawe yosĩ mwabĩrĩhĩndana haguma eripona Omwami Mukulu. Nĩkwa Harũnĩ nindi, muti yo mukatonga nabi kwehĩ?

¹² Neryo Musa mwatumira uku Datanĩ na Abĩramũ, bagala ba Elĩabũ, eribirikirabo nĩkwa mobabũga bati, Sitwendisyayayo.

¹³ Ko si mwatsi munene erĩtũlũsya omo kihugo ekyoswĩre mwʼamasabũ nʼobuki nʼerĩtwĩtĩra omo mbwarara kwehĩ? Nĩkwa kandi ukayiyira mo mukama endata kwĩtwe kwehĩ?

¹⁴ Kandi kwenene sulitatuleta omo kihugo kyoswĩre mwʼamasabũ nʼobuki, kutse sulitatuha omwandu wʼesyombibi nʼamalima wʼebĩnyũ. Wanzĩre erilola ameso wʼabandu aba kwehĩ? Sitwendyasa!

¹⁵ Neryo Musa mwahitana kutsibu, mwabwira Omwami Mukulu ati, Sũlĩge obuhere bwabo; Sĩndĩtĩmya nʼepunda nʼenguma kubo, kutse erĩhũtalya muguma wa kubo.

¹⁶ Neryo Musa mwabwira Kora ati, Uwe nʼendeko yawe yosĩ mubye embere syʼOmwami Mukulu engyakya, uwe, nabo, haguma na Harũnĩ.

¹⁷ Kandi obuli mundu ĩmaye oruho luwe, nʼerĩhĩra kwʼobukwa, obulĩ mundu alete oruho luwe embere syʼOmwami Mukulu, esyoruho magana abiri nʼamakũmĩ atanu; uwe nibya, na Harũnĩ, mwasyaleta obuli mundu oruho luwe.

¹⁸ Neryo mobĩmya obuli mundu oruho luwe, mobahĩra omuliro kusyo, kandi mobahĩra obukwa bo kusyo, mobahangana oko lũkyo lwʼeHema yʼerĩhĩndanamo haguma na Musa na Harũnĩ.

¹⁹ Neryo Kora mwahĩndanĩa endeko yosĩ eriponabo oko lũkyo lwʼeHema yʼerĩhĩndanamo. Neryo olukengerwa lwʼOmwami Mukulu molwahuluka oko ndeko yosĩ.

²⁰ Neryo Omwami Mukulu mwabũga na Musa na Harũnĩ, ati,

²¹ Muyihigule oko ndeko eyĩ, inatoka erĩtĩndabo omo katambĩ kake.

²² Nĩkwa Musa na Harũnĩ mobawa oko mũsũ wabo, bati, Uwe Nyamuhanga, Nyamuhanga wʼebĩrĩmũ byʼemibiri yosĩ, omundu muguma amahalya, wasyahitana oko ndeko yosĩ kwehĩ?

²³ Neryo Omwami Mukulu mwabũga na Musa ati,

²⁴ Ubwire endeko, uti, Musage ahali amahema wa Kora, Datanĩ, na Abĩramũ.

²⁵ Neryo Musa mwahangana mwaya eyiri Datanĩ na Abĩramũ; nʼabakulu ba Ĩsraelĩ mobamukwama.

²⁶ Neryo Musa mwabwira endeko ati, Ngabasaba, mũlũe hakũhĩ nʼamahema wʼabandu babi aba, kandi sĩmũtũle oko kindu kyabo nʼekiguma, mukasyahwa omo malolo wabo gosĩ.

²⁷ Neryo mobalũaho hakũhĩ nʼamahema wa Kora, Datanĩ na Abĩramũ, oko syombande syosĩ; neryo Datanĩ na Abĩramũ mobahuluka, mobahangana oko lũkyo lwʼamahema wabo, haguma nʼabakalĩ babo, nʼabana babo, nʼabana babo balere.

²⁸ Neryo Musa mwabũga ati, Ũkwʼekĩ mwasyaminya ngoko Mwami Mukulu abirinyituma erikola emĩbĩrĩ yosĩ eyĩ; kusangwa omwatsi oyũ sĩ ngye ngakola.

²⁹ Abandu aba bamahola omuhanda wʼerihola lyʼabandu bosĩ, kutse omwatsi amahĩka kubo ngoko akahĩka oko bandu bosĩ; kwesĩ Omwami Mukulu isialitanyituma.

³⁰ Nĩkwa Omwami Mukulu amahangika omwatsi muhya-muhya, nʼekitaka kikatanda obuno bwakyo, nʼerimerabo haguma nʼebyosĩ byabo, bakandagalira omo Kũlĩmũ ibaneho; neryo mwasyaminya abandu aba ko babiripona Omwami Mukulu.

Erisuyirwa lyʼabandu abayitonga

³¹ Neryo abere abĩbũga ebĩnywa byosĩ ebĩ, ekitaka ekyabya eyĩkwa kubo mokyatulika;

³² mokyatanda obuno bwakyo, mokyamerabo, nʼebĩtũnga byabo, nʼabandu bosĩ ba Kora, nʼebindu byabo byosĩ.

³³ Neryo ibo, nʼabosĩ ababya kubo, mobandagalira omo Kũlĩmũ ibaneho; nʼekitaka mokyakũnĩngĩrabo, mobahera erĩlũa omo ndeko,

³⁴ nʼAbaĩsraelĩ bosĩ ababya emũsĩke wabo mobatibita busana nʼerilaka lyabo; kusangwa babũga bati, ekitaka kikasyatumera!

³⁵ Nʼomuliro mwalũa oko Mwami Mukulu, mwahĩsya abandu abo amagana abiri nʼamakũmĩ atanu ababya bakahonga obukwa.

³⁶ Neryo Omwami Mukulu mwabũga na Musa, ati,

³⁷ Ubwire Eleazarĩ mugala wa Harũnĩ omũhererĩ uti alũsaye esyoruho oko muliro, kusangwa sĩbũyĩrĩre, kandi nawe upanza-panze amakala wʼomuliro.

³⁸ Nĩkwa esyoruho syʼabandu aba abĩtĩsaya esyongebe syabo erikola ebibi sihesawe mo myũko yʼeriswika ekiherero; kusangwa bahongasyo embere syʼOmwami Mukulu: neryo sĩbũyĩrĩre; kandi syasyabya ekiminyikalo oko bana ba Ĩsraelĩ.

³⁹ Neryo Eleazarĩ omũhererĩ mwĩmya esyoruho syʼemiringa esyo abandu abahĩsĩbawa bahongamo; mobahesasyo mo kiswiko kyʼekiherero,

⁴⁰ sibye ekĩbũkyo oko bana ba Ĩsraelĩ, ambu owʼehandi oyute wʼoko bana ba Harũnĩ ĩsyahĩka hakũhĩ erĩhĩsya obukwa embere syʼOmwami Mukulu: akasyabya nga Kora, nʼendeko yiwe; ngoko Mwami Mukulu amubwira busana na Musa.

⁴¹ Nĩkwa omo ngyakya yʼaho, endeko yosĩ yʼabana ba Ĩsraelĩ mobatonga Musa na Harũnĩ, bati, Ĩnywe mwaleka abandu bʼomwami Mukulu ĩbakwa.

⁴² Nĩkwa mokyabya, omugulu endeko yahĩndana eritonga Musa na Harũnĩ bo nabi, mobalebya oko luhande lwʼeHema yʼerĩhĩndanamo; neryo, lebaya, ekĩtũ mokyaswikayo, nʼolukengerwa lwʼOmwami Mukulu molwahuluka.

⁴³ Na Musa na Harũnĩ mobasa embere wʼeHema yʼerĩhĩndanamo.

⁴⁴ Kandi Omwami Mukulu mwabũga na Musa, ati,

⁴⁵ Ũlũe omo ndeko eyĩ, inatoka erĩtĩndabo neryo-neryo. Nabo mobawa nʼerilambama.

⁴⁶ Neryo Musa mwabũga na Harũnĩ ati, Ĩmaya oruho lwawe, ũhĩre omuliro go mulo erĩlũa oko kiherero, ũhĩre obukwa bo kulo, uhekelo lũba oko ndeko, ulihirebo embanulo kusangwa erihitana lyabirihuluka lĩkalũa oko Mwami Mukulu, endwala yʼakasũsũ yamatsũka!

⁴⁷ Neryo Harũnĩ mwatwalalo ngoko Musa abũga, mwatibita omo ndeko kusangwa lebaya, endwala yʼakasũsũ ĩyamabĩtsũka omo katĩkatĩ kʼabandu. Neryo mwahĩra obukwa kulo, mwalihira abandu bʼembanulo.

⁴⁸ Kandi mwahangana omo katĩkatĩ kʼabaholĩ nʼabaliho; neryo endwala yʼakasũsũ moyakakĩrĩbwa.

⁴⁹ Neryo abahola omo ndwala yʼakasũsũ babya elfu ĩkũmĩ nʼĩnĩ nʼamagana alinda (14,700), abate oko bandu abahola omo mwatsi wa Kora.

⁵⁰ Neryo Harũnĩ mwasuba eyiri Musa oko lũkyo lwʼeHema yʼerĩhĩndanamo; kusangwa endwala yʼakasũsũ moyakakĩrĩbwa.