Emiganzo 15 - AMASAKO ABOYTRTRE WA NYAMUHANGA AWAKAHULAWA MO BIBLIA

Ekihano kyʼamahere wʼeyĩsyano nʼawʼerĩpũlya

¹ Neryo Omwami Mukulu mwabũga na Musa ati,

² Ũbũge nʼabandu ba Ĩsraelĩ, ubwirebo uti, Omugulu mwasyahĩka omo kihugo kyʼerĩĩkala lyenyũ, ekyo ngabaha,

³ neryo muyire ehongo oko muliro busana nʼOmwami Mukulu, obuhere bwʼerĩokererya, kutse obuhere bwʼerikera erĩberererya erĩlahĩrya, kutse ehongo yʼeriyitswa kutse omo biro bikulu byenyũ ebyahamulawa, eriyirira Omwami Mukulu yʼekikumbo kĩsĩhĩre, omo syonde, kutse oko mbũlĩ.

⁴ Neryo oyo wasyahera ehongo yiwe asyaletera Omwami Mukulu yʼobuhere bwʼeyĩsyano bwʼekihande kiguma kyʼomwʼĩkũmĩ kyʼekitiri kyʼeyĩsyano yʼenzelele eyĩtũlũngene nʼekihande kiguma kyʼomo bini kyʼetsũpa yʼamagũta.

⁵ Neryo wasyakokotya ebĩnyũ busana nʼobuhere bwʼerĩpũlya, ekihande kiguma kyʼomo bini kyʼetsũpa, wasyakokotyabyo haguma nʼobuhere bwʼerĩokererya, kutse busana nʼobuhere bwʼerikera, busana nʼobuli kyana kyʼembũlĩ.

⁶ Kutse busana nʼembangale, wasyakokotya busana nʼobuhere bwʼeyĩsyano ebihande bibiri byʼomwʼĩkũmĩ byʼekitiri kyʼeyĩsyano yʼenzelele eyĩtũlũngene nʼekihande kyʼomo bisatu kyʼetsũpa yʼamagũta.

⁷ Kandi busana nʼobuhere bwʼerĩpũlya wasyahonga ekihande kyʼomo bisatu kyʼetsũpa yʼebĩnyũ byʼekikumbo ekĩsĩhĩre oko Mwami Mukulu.

⁸ Nʼomugulu ũkakokotaya enume yʼende mo buhere bwʼerĩokererya, kutse obuhere bwʼerikera erĩberererya erĩlahĩrya, kutse busana nʼamahere wʼobuholo oko Mwami Mukulu,

⁹ asyahonga haguma nʼenume yʼende eyo, obuhere bwʼeyĩsyano bwʼebihande bisatu byʼomwʼĩkũmĩ byʼekitiri kyʼeyĩsyano yʼenzelele eyĩtũlũngene nʼekitswe kyʼetsũpa yʼamagũta.

¹⁰ Kandi wasyahonga ekitswe kyʼetsũpa yʼebĩnyũ busana nʼobuhere bwʼerĩpũlya, busana nʼobuhere obukayirawa omo muliro, obwʼekikumbo kĩsĩhĩre oko Mwami Mukulu.

¹¹ Ko kyasyakolwa kitya busana nʼobuli nume yʼende, kutse oko buli mbangale, kutse busana nʼobuli hibangale, kutse busana nʼobuli tuhaya.

¹² Ngʼemiganzo eyo mũkakokotaya, ko mwasyakola mutya busana nʼobuli mundu ngʼemiganzo yabo.

¹³ Abosĩ ababũtĩrwe eka basyakola emyatsi eyĩ omo mibere eyo, okwʼihonga obuhere obukayirawa omo muliro, ngʼekikumbo kĩsĩhĩre oko Mwami Mukulu.

¹⁴ Kandi owʼehandi oyukabungira ewenyũ, kutse Omundundi oyuli omo katĩkatĩ kenyũ, omo syondengo syenyũ syosĩ, iniakasonda erihonga obuhere obukayirawa omo muliro, ngʼerikumba erĩsĩhĩre oko Mwami Mukulu; asyakola ngoko mukakola.

¹⁵ Busana nʼendeko, hasyabya ekilayiro kiguma busana nenyũ, na busana nʼowʼehandi oyukabungira ewenyũ, ekilayiro kya kera na kera omo syondengo syenyũ; ngoko mune, ko mubunga asyabya atya emuliro wʼOmwami Mukulu.

¹⁶ Hasyabya omugambo muguma nʼeritswera liguma busana nenyũ, kandi busana nʼowʼehandi oyukabungira ewenyũ.

Ebihano byʼobuhere

¹⁷ Kandi Omwami Mukulu mwabũga na Musa, ati,

¹⁸ Ũbũge nʼabana ba Ĩsraelĩ ubwirebo uti, Omugulu mũkahĩka omo kihugo eyo ngabatwala,

¹⁹ neryo kyasyabya, omugulu mukalya akalyo kʼekihugo, mwasyahongera Omwami Mukulu yʼobuhere bwʼerisumba.

²⁰ Oko buyilula bwʼesĩsyano syenyũ mwasyahonga akatole eribya buhere bwʼerisumba; ngʼobuhere bwʼerisumba bwʼekibuga kyʼerĩhũmbĩrako, ko mwasyasumba bo mutya.

²¹ Oko buyilula bwʼesĩsyano syenyũ mwasyaha oko Mwami Mukulu obuhere bwʼerisumba omo syondengo syenyũ syosĩ.

²² Kandi omugulu mukakosa, ĩsĩmwetegaya ebihano byosĩ ebĩ, ebyo Mwami Mukulu abwira Musa,

²³ ebyosĩ ebyo Mwami Mukulu abahana omo byala bya Musa, erĩtsũka ekiro Omwami Mukulu aha ebihano, nʼerĩhĩka oko syondengo syenyũ syosĩ syʼenyũma;

²⁴ neryo kyasyabya, kyamakolwa omo butaminya, nʼendeko ĩsĩyasĩ, endeko yosĩ yasyahonga enume nguma yʼende eribya buhere bwʼerĩokererya, busana nʼerikumba lĩsĩhĩre oko Mwami Mukulu, haguma nʼobuhere bwayo bwʼeyĩsyano, nʼobuhere bwayo bwʼerĩpũlya, ngʼekilayiro ko kiri, nʼembaya nguma busana nʼobuhere bwʼebibi.

²⁵ Nʼomũhererĩ asyakola embanulo busana nʼendeko yosĩ yʼabana ba Ĩsraelĩ, nabo basyabuyirwa; kusangwa lyabya ĩlolo, nabo babirireta ehongo yabo, obuhere obukayirawa omo muliro oko Mwami Mukulu, nʼobuhere bwabo bwʼebibi embere syʼOmwami Mukulu, busana nʼerĩlolo lyabo.

²⁶ Nʼendeko yosĩ yʼabana ba Ĩsraelĩ yasyabuyirwa, nʼowʼehandi oyukabungira omo katĩkatĩ kabo; kusangwa mokyakolwa omo butaminya nʼabandu bosĩ.

²⁷ Kandi omundu muguma amahalya butaminya, neryo asyahonga esũhene yʼomwaka muguma eribya buhere bwʼebibi.

²⁸ Nʼomũhererĩ asyakolera omundu oyũ yʼembanulo oyukatala omugulu akahalaya butaminya emuliro syʼOmwami Mukulu, erimulihira embanulo, naye atoke eribuyirwa.

²⁹ Mwasyabya nʼomugambo muguma oko yũkahalaya oko kyahi butaminya, busana nʼoyũbũtĩrwe eka omo katĩkatĩ kʼabana ba Ĩsraelĩ, na busana nʼowʼehandi oyukabungira omo katĩkatĩ kenyũ.

³⁰ Nĩkwa omundu oyukakola kyahi nʼeriyiririra, kutse amabya embutirwa yʼeka, kutse omubunga, omundu oyukatsuma Omwami Mukulu; omundu oyo asyagabulwa oko bandu buwe.

³¹ Kusangwa abiripona ekĩnywa kyʼOmwami Mukulu, kandi abiriketa ekihano kiwe, omundu oyo asyagabulwa kũndũ; ebibi biwe byasyamubyako.

Erisuyirwa lyʼeriketa eSabato

³² Kandi omugulu abana ba Ĩsraelĩ babya omo mbwarara, mobeya omundu akasenya ekiro kyʼeSabato.

³³ Nʼabamwegaya akasenya mobamuleta uku Musa na Harũnĩ nʼendeko yosĩ.

³⁴ Mobamũhĩra omo mũlĩkĩ, kusangwa isikyekyabũgwa ekyasyakolwa kwiye.

³⁵ Neryo Omwami Mukulu mwabũga na Musa ati, kwenene omundu oyo asyĩtwa; endeko yosĩ yasyamugusa kwʼamabwe ekyaswa kyʼekilaliriro.

³⁶ Nʼendeko yosĩ moyamutwala ekyaswa kyʼekilaliriro, mobamugusa kwʼamabwe erĩmwĩta; ngoko Mwami Mukulu ahana Musa.

Ekiyonga kyʼakanĩki

³⁷ Kandi Omwami Mukulu mwabũga na Musa, ati,

³⁸ Ũbũge nʼabana ba Ĩsraelĩ uhanebo erĩhĩra ebiyonga byʼoko mĩsĩke yʼesyongimba syabo omo syondengo syabo syosĩ, kandi bahĩre oko kiyonga ekyʼobuli mũsĩke omukoba wʼomũsĩndo wʼakanĩkĩ.

³⁹ Kandi kyasyabya ekiyonga busana nenyũ, imwatoka erisamalirakyo, nʼeriswibuka ebihano byosĩ byʼOmwami Mukulu, nʼerikolabyo; imutakwama ebyʼemitima yenyũ nʼameso wenyũ, ngoko mwagenda mukakwama oluteto erĩmbere;

⁴⁰ Imwatoka eriswibuka erikola amahano wage gosĩ, nʼeribya babũyĩrĩre uku Nyamuhanga wenyũ.

⁴¹ Ĩngye indi Mwami Mukulu Nyamuhanga wenyũ, oyo wabalũsaya omo kihugo kyʼeMĩsĩrĩ, eribya Nyamuhanga wenyũ. Ĩngye indi Mwami Mukulu Nyamuhanga wenyũ.