Emiganzo 11 - AMASAKO ABOYTRTRE WA NYAMUHANGA AWAKAHULAWA MO BIBLIA

Emiyitongo ya Ĩsraelĩ

¹ Neryo abandu mobabya ngʼabandu abakayikuna, ibakalaka nʼobũlĩge omo matwĩ wʼOmwami Mukulu; neryo omugulu Omwami Mukulu owabyo, erihitana liwe molyaka; nʼomuliro wʼOmwami Mukulu mwahĩsya omo katĩkatĩ kabo, nʼomuliro oyo mwabuga abandi erĩhĩka oko kitswe kyʼekilaliriro.

² Neryo abandu mobalakira Musa; na Musa mwasaba Omwami Mukulu, neryo omuliro mũmbya.

³ Nʼerĩna lyʼaho molyahulwa mo Tabera, kusangwa omuliro wʼOmwami Mukulu mwagulumira omo katĩkatĩ kabo.

⁴ Nʼendeko eyĩtũlũngene nʼabandi ababya haguma nabo mobakwa esyongumbu kutsibu; nʼabana ba Ĩsraelĩ mobalira kandi, bati, Nindi wasyatuha esĩswĩ tukalyasyo kwehĩ?

⁵ Twamibuka amahere, ago twalya buyira omo kihugo kyʼeMĩsĩrĩ; nʼamatango, nʼebyobe, nʼesyoporo, nʼamatũngũlũ, na layĩ;

⁶ nĩkwa lino emitima yetu yamuma; sihali kindu kyʼerisamalira, wa nʼamana aya.

⁷ Nʼamana ayo abya ngʼembuto yʼobuhemba, nʼerilolwako lyago ĩnĩasosĩre ebedola.

⁸ Nʼabandu mobatĩmba-tĩmba, nʼerikuma-kumago nʼeriswago oko nyuso, kutse erisekulago omo sĩsekulo, kandi mobahũkago omo syonyungu, mobatsumbago mo bibambali; nʼerisiha lyago lyabya ngʼerisiha lyʼotutole eritsumikato omo magũta mahya-mahya.

⁹ Neryo omugulu ekimi kyalembaya oko kilaliriro omo kiro, neryo amana ayo mwalembya kukyo.

Obũlĩge bwa Musa busana nʼemiyikuno yʼabandu

¹⁰ Neryo Musa mwowa abandu bakalira omo bihanda byabo, obuli mundu oko lũkyo lwʼehema yiwe; nʼerihitana lyʼOmwami Mukulu molyagulumira kutsibu; na Musa naye mwatatsema.

¹¹ Neryo Musa mwabũga nʼOmwami Mukulu ati, Busana nakĩ wabirikala oko mugombe wawe kwehĩ? Kandi, busana nakĩ sinditabana erĩsĩmwa omo meso wawe uti ũkanyĩhĩra kwʼomuheke wʼabandu bosĩ aba kwehĩ?

¹² Ko nĩ ngye nakeka obukule bwʼabandu bosĩ aba kwehĩ? Ko nĩ ngye nabutabo neryo iwambwira uti, Hekabo oko kĩkũba kyawe, ngʼomũlemberĩ oyukabagalira omwana oyukonga, erĩhĩka oko kihugo walahĩraya abotata wabo kwehĩ?

¹³ Nangabana esĩswĩ syo hahi erihasyo abandu bosĩ aba kwehĩ? Kusangwa bakanyiririrako, bati, Utuhe esĩswĩ tulye.

¹⁴ Sinangatoka eriheka abandu bosĩ aba ĩngyowene, kusangwa nĩ bũlĩto bũkanyĩta.

¹⁵ Kandi wamanyikola utya, ngakusaba ũnyĩtĩre hano, namabibana eriganyira omo meso wawe; kandi Suleke ngalangira obũlĩge bwage.

Erĩhĩra abakulu makũmĩ alinda erĩwatĩkya Musa

¹⁶ Neryo Omwami Mukulu mwabũga na Musa ati, Ũnyĩhĩndanĩraye abandu makũmĩ alinda oko bakulu ba Ĩsraelĩ, abo wasĩ ko bali bakulu bʼabandu nʼabasondolĩ ba kubo; uletebo oko Hema yʼerĩhĩndanamo, bahanganeho haguma nawe.

¹⁷ Nage nasyandagala nʼerĩkanĩa nawe aho; kandi nasyĩmya oko Mũlĩmũ owali ukʼuwe, nasyahĩrago kubo; nabo basyaheka omuheke wʼabandu haguma nawe, isiwahekaga ĩgowene.

¹⁸ Kandi Ubwire abandu uti, Muyihigule busana nʼomo ngyakya, neryo mwasyalya esĩswĩ; kusangwa mwabiriririra omo matwĩ wʼOmwami Mukulu, ĩmũkabũga muti, Nindi wasyatuha esĩswĩ tukalyasyo? Kusangwa twabya tutsemere eMĩsĩrĩ; busana nʼekyo, Omwami Mukulu asyabaha esĩswĩ, lero mwasyalyasyo.

¹⁹ Simwendisyalyasyo kiro kiguma, kutse biro bibiri, kutse biro bitanu, kutse biro ĩkũmĩ, kutse biro makũmĩ abiri,

²⁰ nĩkwa omukera muguma gosĩ, erĩhĩka aho syasyahulukira omo mihuli yenyũ, kandi syasyabagamba; kusangwa mwabirigana Omwami Mukulu oyuli omo katĩkatĩ kenyũ, imwabiriririra embere siwe muti, Busana nakĩ twalũa eMĩsĩrĩ kwehĩ?

²¹ Neryo Musa mwabũga ati, Abandu abo nyiri nabo, ni bandu elfu magana ndatu (600,000) abakagenda omo bisando; nawe wabĩrĩbũga uti, Nasyahabo esĩswĩ, ibalyasyo omukera mugumaguma.

²² Ebihangulo byʼesyombũlĩ nʼesyonde byasyakerwa busana nabo, eritolerabo kwehĩ? Kutse amahere gosĩ gʼomo ngetsi asyakuma-kumwa busana nabo nʼeritolerabo kwehĩ?

²³ Neryo Omwami Mukulu mwabũga na Musa ati, Kwʼebyala byʼOmwami Mukulu byabĩrĩkũhĩha kwehĩ? Ukandilangira lino ekĩnywa kyage nga kyasyabererera ukʼuwe kutse iyihi.

²⁴ Neryo Musa mwahuluka, mwabwira abandu ebĩnywa byʼOmwami Mukulu. Kandi mwahĩndanĩa abandu makũmĩ alinda bʼabakulu bʼabandu, mwahĩrabo erĩtĩmba oko Hema.

²⁵ Neryo Omwami Mukulu mwandagala omo kĩtũ, mwakanĩa naye, neryo mwĩmya oko Mũlĩmũ owamubyako, mwahĩrago oko bakulu makũmĩ alinda; neryo enyũma wʼaho, Omũlĩmũ abere abĩkala kubo, mobaminyerera. Nĩkwa mobataswakola batya.

²⁶ Nĩkwa abandu babiri mobasĩgalira omo kilaliriro, erĩna lyʼomuguma lyabya Eldadĩ, nʼerĩna lyʼogundi lyabya Medadĩ; neryo Omũlĩmũ mwabya kubo; (nabo babya oko bandu abasakawa, oko mũbĩrĩ wʼobũmĩnyererĩ nĩkwa babya isibetahuluka eriya oko Hema); mobaminyerera omo kilaliriro.

²⁷ Neryo omũlwana muguma mwatibita lũba, eriyabwira Musa, ati, Eldadĩ na Medadĩ bakaminyerera omo kilaliriro.

²⁸ Na Yosũa mugala wa Nũnĩ, omugombe wa Musa, omuguma gʼoko bayisogawa buwe, mwasũbĩrya mwabũga ati, Mukama wage Musa, ukagebo.

²⁹ Na Musa mwabũga naye ati, Uli nʼobũha busana nage kwehĩ? Kumbe abandu bosĩ bʼomwami Mukulu nĩ bamĩnyererĩ, kumbe Omwami Mukulu angahĩra Omũlĩmũ guwe go kubo!

³⁰ Neryo Musa mwaya omo kilaliriro, iye nʼabakulu ba Ĩsraelĩ.

Esyongwali nʼekĩhũnzo

³¹ Neryo ekihunga mokyahuluka kĩkalũa eyiri Omwami Mukulu, mokyaleta esyongwali erĩlũa omo ngetsi, mokĩkĩryasyo hakũhĩ nʼekilaliriro, ngʼolugendo lwʼekiro kiguma oko luhande olũ, kandi ngʼolugendo lwʼekiro kiguma oko lundi luhande, erĩtĩmba oko kilaliriro, kandi ngʼemetere nguma oko kitaka.

³² Neryo abandu mobasiba omusibo gosĩ oyo nʼomo kiro kyosĩ, nʼomo ngyakya yosĩ, erikuma-kuma esyongwali; (oyo wakuma-kuma esyonge mwakuma-kuma homerĩ ĩkũmĩ); neryo mobasanzasyo oko mbande syosĩ erĩtĩmba oko kilaliriro.

³³ Omugulu esĩswĩ syabya sikine omo meno wabo emuliro wʼerĩtakũnyasyo, erihitana lyʼOmwami Mukulu molyaka oko bandu, neryo Omwami Mukulu mwaswĩrya bandu nʼekĩhũnzo kinene kutsibu.

³⁴ Nʼerĩna lyaho molyahulwa mo Kĩbrotĩ-hatawa kusangwa mobataho abandu abakwa esyongumbu nyibi.

³⁵ Nʼabandu mobahongoka eriya eHaserotĩ bakalũa eKĩbrotĩ-hatawa; mobĩkala eHaserotĩ.