Emiganzo 10 - AMASAKO ABOYTRTRE WA NYAMUHANGA AWAKAHULAWA MO BIBLIA

Esyongubi syʼebĩtsĩpa

¹ Kandi Omwami Mukulu mwabwira Musa, ati,

² Ũyĩkokoteraye esyongubi ĩbĩrĩ syʼebĩtsĩpa; wasyakokotyasyo omo mũbĩrĩ wʼobuhese; kandi wasyayirasyo busana nʼeribirikira endeko, na busana nʼerihongoka lyʼebilaliriro

³ Nʼomugulu basyabuhasyo esĩbĩrĩ syosĩ, endeko yosĩ yasyayikumira ukʼuwe oko lũkyo lwʼeHema yʼerĩhĩndanamo.

⁴ Kandi bamabuha enguma nyisa, neryo abakulu, abasondolĩ bʼamaelfu wa Ĩsraelĩ, basyayikumira ukʼuwe.

⁵ Nʼomugulu mukabuha eyʼendulo ebilaliriro ebiri oko luhande lwʼendata byasyahongoka.

⁶ Nʼomugulu mukabuha endulo yʼengendo yʼakabiri, ebilaliriro ebiri oko luhande lwʼelutambi lwʼeyĩkwa byasyahongoka; basyabuha endulo busana nʼolugendo lwabo.

⁷ Nĩkwa omugulu endeko ĩkahĩndanĩbawa haguma, isimwabuha engubi yʼendulo.

⁸ Nʼabagala ba Harũnĩ, abahererĩ, basyabuha esyongubi; nasyo syasyabya ekilayiro kwĩnywe kera na kera omo syondengo syenyũ syosĩ.

⁹ Kandi omugulu mukayalwa nʼenzĩgũ omo kihugo kyenyũ eyĩkabanũbaya, mwasyabuha endulo yʼomo syongubi; neryo imwatoka eryibukwa embere syʼOmwami Mukulu Nyamuhanga wenyũ, kandi, mwasyalamĩbwa oko syonzĩgũ syenyũ.

¹⁰ Nĩkwa oko kiro kyʼobutseme bwenyũ, nʼoko biro bikulu byenyũ ebyo mwahamulirawa, nʼoko nzũko syʼemikera yenyũ mwasyabuha esyongubi oko mahere wenyũ wʼerĩokererya, nʼendata oko mahere wenyũ wʼobuholo; nasyo syasyabya busana nenyũ eryibukwa embere sya Nyamuhanga wenyũ. Ĩngye indi Mwami Mukulu Nyamuhanga wenyũ.

Erihongoka erĩlũa eSĩnaĩ

¹¹ Neryo oko mwaka wʼakabiri, omo mukera wʼakabiri, oko kiro kyʼamakũmĩ abiri kyʼomukera, ekĩtũ mokyasumbwa erĩlũa oko Hema yʼerĩtũlago.

¹² Nʼabana ba Ĩsraelĩ mobahongoka omo lugendo lwabo erĩlũa omo mbwarara yʼeSĩnaĩ; nʼekĩtũ mokyĩkala omwʼirunga lyʼeParanĩ.

¹³ Kandi mobahongoka ngʼerihana lyʼOmwami Mukulu busana na Musa.

¹⁴ Nʼebendera yʼekilaliriro kyʼabana ba Yũda mobatsũka erihongoka nʼemilondo yabo; na Nasonĩ mugala wa Amĩnadabũ abya mukulu wʼemilondo yiwe.

¹⁵ Na Netanelĩ mugala wa Zũarĩ abya mukulu wʼemilondo yʼekihanda kyʼabana ba Ĩsakarĩ.

¹⁶ Na Elĩabũ mugala wa Helonĩ abya mukulu wʼemilondo yʼekihanda kyʼabana ba Zebũlũnĩ.

¹⁷ Neryo ahʼerĩĩkala mohahandulwa; nʼabagala ba Gerĩsonĩ nʼabagala ba Merari abakaheka ahʼerĩĩkala, mobahongoka.

¹⁸ Neryo ebendera yʼekilaliriro kya Rũbenĩ mobahongoka erĩlolya embere omo milondo yabo; na Elĩzũrĩ mugala wa Sedeũrĩ abya mukulu wʼomulondo wuwe.

¹⁹ Na Selũmĩelĩ mugala wa Sũrĩsadaĩ abya mukulu wʼomulondo wʼekihanda kya Sĩmeonĩ.

²⁰ Na Elĩsafũ mugala wa Deũelĩ abya mukulu wʼomulondo wʼekihanda kya Gadĩ.

²¹ Neryo Abakohatĩ mobahongoka, ĩbanahekĩre ebindu bĩbũyĩrĩre; Kandi ahʼerĩĩkala mohasingikwa bate basa.

²² Nʼebendera yʼekilaliriro kyʼabana ba Efũraĩmũ mobahongoka erĩlolya embere nʼemilondo yabo; na Elĩsama mugala wa Amĩhũdĩ abya mukulu wʼomulondo wuwe.

²³ Na Gamalĩelĩ mugala wa Pedazũrĩ abya mukulu wʼomulondo wʼekihanda kyʼabana ba Manase.

²⁴ Na Abĩdanĩ mugala wa Gĩdeonĩ abya mukulu wʼomulondo wʼekihanda kya Benyamĩna.

²⁵ Neryo ebendera yʼekilaliriro kyʼabana ba Danĩ, ngʼemilondo yabo, eyabya mũlemberĩ; oko ndũlĩ yʼebilaliriro byosĩ, mobahongoka omo milondo yabo; na Ahĩezerĩ mugala wa Amĩsadaĩ abya mukulu wʼomulondo wuwe.

²⁶ Kandi Pagĩelĩ mugala wa Okranĩ, abya mukulu wʼomulondo wʼekihanda kyʼabana ba Aserĩ.

²⁷ Kandi Ahĩra mugala wa Enanĩ, abya mukulu wʼomulondo wʼekihanda kyʼabana ba Nafũtalĩ.

²⁸ Olugendo lwʼabana ba Ĩsraelĩ ko lwabya lutya omo milondo yabo.

²⁹ Neryo Musa mwabũga na Hobabũ, mugala wa Reũelĩ Omunya Mĩdĩanĩ, ĩsebyala wa Musa, ati, Tukaya aho Mwami Mukulu ahula ati, Nasyabahaho; Wase haguma netu, twasyakukola ndeke; kusangwa Omwami Mukulu abirilaga ebibuya busana na Ĩsraelĩ.

³⁰ Naye mwamubwira ati, Sindiendigenda; nĩkwa ngandisuba oko kihugo kyage, nʼoko kĩtũnga kyage.

³¹ Naye mwabũga ati, Ngakusaba sũtũsĩganaye; kusangwa uwe ũnasĩ eyo tukandisyalalirira omo mbwarara, nawe Wasyabya ameso wetu.

³² Kandi wamagenda haguma netu, ekibuya ekyo Mwami Mukulu asyatukolera, kye nʼekyo twasyakukolera.

³³ Neryo mobahongoka erĩlolya embere erĩlũa oko kitwa kyʼOmwami Mukulu olugendo lwʼebiro bisatu; nʼerĩsandũkũ lyʼerilaga lyʼOmwami Mukulu molyagenda embere syabo olugendo lwʼebiro bisatu, erĩsonderyabo ahʼeriluhukira.

³⁴ Nʼekĩtũ kyʼOmwami Mukulu mokyabya endata kubo omo musibo, omugulu bahongoka erĩlũa omo kilaliriro.

³⁵ Neryo omugulu erĩsandũkũ lyahongoka, Musa mwabũga ati, Uhangane, Uwe Mwami Mukulu, nʼesyonzĩgũ syawe sipanza-panzawe; nʼabakakũkwa obusu basage embere syawe.

³⁶ Nʼomugulu lyahangana, mwabũga ati, Usubule, Uwe Mwami Mukulu oko maelfu makũmĩ wʼamaelfu wa Ĩsraelĩ.