Emibiri 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Ekirema kĩkalamĩbawa

¹ Nĩkwa Petero na Yoane babya bakaya omo Hekalũ oko saa mwenda, oko saa yʼerisaba.

² Neryo oko lũkyo lwʼeHekalũ olukahulawa mo Lubuya habya amundu oyo wabutawa inina kirema. Obuli kiro babya bakahekera omundu oyo yʼoko lũkyo olo busana nʼerĩsabĩrĩrya ebindu oko bandu ababya bakingira omo Hekalũ.

³ Neryo abere alangira Petero na Yoane bakasonda eriingira omo Hekalũ, mwasababo ati bamuhe.

⁴ Neryo Petero na Yoane mobamuhanda kwʼameso, neryo Petero mwamubwira ati, Ũlũlebaye!

⁵ Naye mwayĩtegereryabo, ĩnĩakaganĩraya ati asyabana kubo kwʼekindu.

⁶ Nĩkwa Petero mwamubwira ati, Singwite esyʼebĩtsĩpa nʼesyamagetsi, nĩkwa ekyo ngwite ngandikuhakyo. Omo lĩna lya Yesu Kristo wʼeNazaretĩ, uyigendere!

⁷ Neryo mwamuwata oko byala biwe byʼamali, mwamũhanganĩa. Neryo-neryo ebisando biwe nʼehĩkongũlo hiwe mobyabana amaka.

⁸ Neryo mwatwa ekyika, nʼeriimana ndeke, mwatsũka eriyigendera. Kandi mwingira omo Hekalũ haguma nabo, akayigendera, nʼerĩtwa ebika, nʼeripipa Nyamuhanga.

⁹ Nʼabandu bosĩ mobamulolako iniakayigendera nʼeripipa Nyamuhanga.

¹⁰ Neryo mobamuminyerera kwʼali yo mundu wabya akĩkala oko Lũkyo Lubuya lwʼeHekalũ akasabĩrĩrya ebindu. Neryo mobũsũla nʼerisweka nʼerigasama busana nʼemyatsi eyamũhĩkako.

Erĩtũlago lya Petero omo Hekalũ

¹¹ Neryo omundu oyo mwamakirira uku Petero na Yoane. Nʼabandu bosĩ mobasweka kutsibu, mobatibitirabo omo baraza eyikahulawa mo ya Solomono.

¹² Nĩkwa Petero abere alangira omwatsi oyo, mwabwira bandu abo ati, Ĩnywe balume ba Ĩsraelĩ, mukaswekera omwatsi oyo busana nakĩ, kutse mukatusamalirakĩ kwehĩ? Mũkaganĩraya muti ni busana nʼobũtokĩ bwetu kutse obũbũyĩrĩre bwetu tukaleka omundu oyũ iniayigendera kwehĩ?

¹³ Nyamuhanga wa Abrahamũ, na Ĩsaka, na Yakobo, Nyamuhanga wʼabotata wetu, abiriha olukengerwa oko Mugombe wuwe Yesu. Nĩkwa ĩnywe momwamuhotera oko batabalĩ, kandi momwamugana embere sya Pilato omugulu asonda erimubohola.

¹⁴ Nĩkwa ĩnywe momwagana Oyũbũyĩrĩre nʼoyutunganene, momwasaba Pilato abahe omwĩtĩ wʼabandu.

¹⁵ Kandi momwĩta Omwenye engebe, oyo Nyamuhanga alũbũkaya oko baholĩ. Netu tuli balangĩrĩ bʼebyo.

¹⁶ Nĩkwa busana nʼerĩkĩrĩrya omo lĩna lya Yesu, erĩkĩrĩrya uku Yesu lyo lyamaha omundu oyũ yʼamaka, oyo mukalangira, ĩmũnamwasĩ nibya. Erĩkĩrĩrya Yesu lyo lyamalamya omundu oyũ embere wenyũ ĩnywe bosĩ.

¹⁷ Neryo lino, balĩkyetu, nyĩnasĩ ebyo, ĩnywe nʼabasondolĩ benyũ mwakola uku Yesu, momwakolabyo omo butaminya.

¹⁸ Nĩkwa Nyamuhanga mwakanganĩa kera omo buno bwʼabamĩnyererĩ bosĩ ati, Kristo wuwe asyagalwa; neryo mwaberereryago atya.

¹⁹ Neryo ĩnywe mubindule emitima yenyũ mulolaye eyiri Nyamuhanga, ebibi byenyũ bisangulawe,

²⁰ neryo emigulu yʼerĩyĩsyandira iyatoka erĩhĩka ĩkalũa embere syʼOmukama, kandi atoke eritutumira Yesu, oyuli Kristo oyo ayisoga busana nenyũ.

²¹ Naye atolere erĩkokĩbwa elubula erĩhĩka oko mugulu wʼerisuba lyʼemyatsi yosĩ eyo Nyamuhanga ahula kera omo buno bwʼabamĩnyererĩ buwe ababũyĩrĩre.

²² Kusangwa Musa mwabũga ati, Omwami Mukulu Nyamuhanga asyabatumira omũmĩnyererĩ, ngoko anyituma. Asyabya muguma gʼoko bandu benyũ. Nenyũ mwasyamowa omo myatsi yosĩ asyababwira.

²³ Neryo obuli mundu oyũtendĩsyowa omũmĩnyererĩ oyo, asyaherĩbwa erĩlũa omo katĩkatĩ kʼabandu.

²⁴ Kandi nibya, abamĩnyererĩ haguma nʼabosĩ ababũga erĩtsũka uku Samwelĩ nʼabamukwama, abosĩ mobahula ebiro ebĩ.

²⁵ Kandi esyondagane sya Nyamuhanga omo bamĩnyererĩ nĩ syenyũ, nenyũ mukasangira erilagana eryo Nyamuhanga ayira nʼabotata-kulu wenyũ. Ngoko abwira Abrahamũ ati, Nasyatsumula abandu bosĩ bʼekihugo omo bana bawe.

²⁶ Neryo Nyamuhanga mwahanganĩa Omugombe wuwe, neryo mwatsũka erimutuma ũkwʼĩnywe eribatsumula nʼeribindula obuli mundu, mũlũe omo syonzira syenyũ nyibi.