Emibiri 27 - AMASAKO ABOYTRTRE WA NYAMUHANGA AWAKAHULAWA MO BIBLIA

Paũlo akaya eRoma omo bwato

¹ Neryo babere babisoha bati tuye eĨtalĩa omo bwato, mobahĩra Paũlo nʼabandi bandu bʼomũlĩkĩ uku Yũlĩo, omukulu wʼomulondo wʼabasĩrĩkanĩ bʼAbaroma owakahulawa mo Mulondo wa Aũgũsto.

² Kandi motwingira omo bwato bwʼeAdaramĩtĩ, obwasonda eriya oko bihugo ebiri oko mũsĩke wʼeAsĩa. Neryo motwahongoka omo ngetsi. Kandi Arĩstarĩko, Omunya Makedonĩa wʼeTesalonĩka, abya haguma netu.

³ Engyakya motwahĩka eSĩdona. Yũlĩo mwakola Paũlo yo ndeke, mwamuha ehamũlĩ eriyabana abĩra buwe nʼerĩwatĩkĩbwa.

⁴ Neryo motwalũa eSĩdona motwaya hakũhĩ nʼeKĩpũro kusangwa erihunga lyabya lĩkalĩre.

⁵ Neryo twabere twabisoka engetsi eyĩhererenĩe nʼeKĩlĩkĩa nʼePamfũlĩa, motwahĩka eMĩra omũyĩ wʼeLĩkĩa:

⁶ Neryo eyo eMĩra omukulu wʼerĩgana, mweya obwato bwʼeAlesandũrĩa obukaya eĨtalĩa, neryo mwatũhĩra mubo.

⁷ Neryo motwagenda mubo mo bolobolo ebiro bingi, motwahĩka eKĩnĩdo nʼobũlĩge, kusangwa erihunga molĩtalĩga tukagenda, motwalaba eyĩkwa kwʼeKrete, hakũhĩ nʼeSalmone.

⁸ Neryo motwatwanganaho nʼobũlĩge, motwahĩka ahakahulawa mo Ahabonderere Ndeke, ahabya hakũhĩ nʼomũyĩ wʼeLasea.

⁹ Neryo omugulu muli abere abilaba, olugendo molwakala busana nʼobwĩko, kusangwa Ekiro kikulu Kyʼeritsira Kalyo ikyamabilaba. Neryo Paũlo mwahanabo

¹⁰ ati, Ĩnywe balume! Namalebya olugendo lukandikala busana nʼeritsanda, nʼerihera lyʼebindu omo bwato, nʼobwato, nʼobwĩko bwʼesyongebe syetu nibya.

¹¹ Nĩkwa omukulu wʼabasĩrĩkanĩ erĩgana mwalĩga ebĩnywa byʼomũsondolĩ wʼobwato, nʼomwenye obwato, kwilaba ebĩnywa Paũlo abũga.

¹² Kandi ahʼerĩhĩra obwato sihabya howene busana nʼerĩkalaho omo mikera yʼeritsuku, neryo abandu bangi mobasoha bati balweho, bagende, bahĩke eFoĩnĩkĩ. EFoĩnĩkĩ ni kiharo kyʼeKrete kibondere ndeke busana nʼamato. Nʼaho hakalola omo katĩkatĩ kʼesyondambi ĩbĩrĩ syʼebwanga bwʼendata, bati bĩkaleho omo mikera yʼeritsuku.

Ekihunga omo ngetsi

¹³ Neryo omugulu erihunga lyʼelutambi lwʼeyĩkwa lyabuhirira bolo-bolo, mobaganĩrya bati bamabana ekyo babya banzĩre, mobasumba engomo yʼobwato, mobalaba hakũhĩ nʼeKrete, ibakalandalanda oko na mũsĩke.

¹⁴ Nĩkwa oko kandi katambĩ ekihunga kinene kyʼakanyabungu ekikahulawa mo Eryʼelutambi lwʼendata, mokyabuhirira kĩkalũa oko mũsĩke.

¹⁵ Nĩkwa mokyayĩswĩrya oko bwato, nʼobwato mobwataluka erĩlolya omo kihunga ekyo, motwalekabo tutya, nʼerihunga molyatuheka.

¹⁶ Neryo motwalaba hakũhĩ nʼakatsira kake akakahulawa mo Kaũda aho erihunga likabondera hake, neryo motwaboha akato kake kʼoko bwato, ĩhakalĩre nibya.

¹⁷ Neryo babere babisumbako oko bwato, neryo mobaboha obwato omo bikoba. Neryo mobubaha bati bakandihatira omo misege hakũhĩ nʼomũsĩke wʼeLĩbĩa, mobakĩmya esyongimba esĩkakũna obwato. Neryo ekihunga mokyaheka obwato.

¹⁸ Neryo enyũma wʼekiro kiguma ekihunga mokyatugusanga kutsibu, neryo mobatsũka erigusa ebindu ebyabya omo bwato byʼomo ngetsi.

¹⁹ Nĩkwa enyũma wʼebiro bisatu mobagusa esyongimba syʼobwato syʼomo ngetsi omo byala byabo.

²⁰ Kandi motutalangira eryuba kutse esyongũnũnũ omo biro bingi, nʼekihunga kinene ĩkĩkĩnatũkũna-kũna, motwabula amaha wʼerĩlamĩbwa.

²¹ Neryo babere babitsira akalyo ko biro bingi, Paũlo mwahangana omo katĩkatĩ kabo ati, Ĩnywe balume! Kumbe mwalikwama erihana lyage, kandi kumbe sĩmwetalũa eKrete, nga simwetabana eriagalwa erĩ, nʼeritala lyʼebindu.

²² Nĩkwa lino ngabagonga-gonga nyiti muhande emitima! Sihali mundu oyo wasyakwa, bo nʼobwato busa bo bunemwendisyahera.

²³ Kusangwa omo kiro kino, ye Nyamuhanga, nage indi wuwe, kandi ngamukolera, mwatuma omũlaĩka wuwe erihangana hakũhĩ nage.

²⁴ Naye mwambwira ati, Paũlo, Sigubahe! Litolere iwahangana embere sya Kaĩsarĩ. Kandi lebaya, Nyamuhanga abirikuha abandu bosĩ abakagenda haguma nawe omo bwato.

²⁵ Neryo ĩnywe balume, muhande emitima yenyũ! Kusangwa nyĩkĩrĩrye Nyamuhanga, ko binemwendisyabya bitya ngoko indiabwirawa.

²⁶ Nĩkwa twasyaguswa oko kitsira kiguma.

²⁷ Nĩkwa omugulu ekiro kyʼerĩkũmĩ nʼebini kyabere kyabĩhĩka, twabere tunemuhekwa litya-litya omo ngetsi ye Ardĩa, omo katĩ-kanene, abasokya bʼobwato mobaganĩrya nga bamabĩhĩka hakũhĩ nʼekitaka.

²⁸ Neryo mobakĩmya olulengero lʼomo magetsi, mobabana ekitaka kiri metere makũmĩ ani omwisi. Enyũma wʼaho hake mobaswalenga magetsi, mobabana emetere makũmĩ asatu.

²⁹ Nĩkwa mobubaha eriguswa oko mabwe, neryo mobagusa esyongomo ĩnĩ syʼekyuma syʼenyũma wʼobwato, neryo mobasaba bati bukye.

³⁰ Nĩkwa abasokya mobalenga eritibita erĩlũa omo bwato. Neryo mobakĩmĩrya akato kake kʼomo ngetsi, nga bakasonda erĩhĩra esyongomo embere wʼobwato.

³¹ Nĩkwa Paũlo mwabwira abasĩrĩkanĩ nʼomukulu wʼerĩgana lyʼabasĩrĩkanĩ ati, Abasokya aba bamatĩndasĩgala omo bwato, ĩnywe simwenditoka erĩlamĩbwa.

³² Neryo abasĩrĩkanĩ mobatwa ebikoba byʼakato kake ako nako mokalũaho.

³³ Neryo bwabere bwasonda erikya, Paũlo mwalembabo ati balye akalyo, ati, Mũnabwĩre ni kiro kyʼerĩkũmĩ nʼebini ĩmũkategaya nʼeritsira akalyo, isimwetalyakĩ.

³⁴ Neryo ngabalemba-lemba mulye akalyo, kusangwa kakandibaganula. Sihali nʼoluywiri nʼoluguma lʼoko mitwe yenyũ olukandihera.

³⁵ Neryo abere abĩbũga atya, Paũlo mwĩmya obundu, mwaha Nyamuhanga ewasĩngya emuliro wʼabandu bosĩ, neryo mwatsũtsangabo, mwatsũka erirya.

³⁶ Neryo abosĩ mobasĩkya omutima, mobalya akalyo.

³⁷ Ĩtwe bosĩ ko twabya omo bwato, twabya bandu magana abiri nʼamakũmĩ alinda nʼendatu (276).

³⁸ Neryo babere babĩũgũta, mobangũhya obwato, bakagusa engano yʼomo ngetsi.

Erĩkwa lyʼobwato

³⁹ Neryo bwabere bwakya, mobataminya ekihugo ekyo, nĩkwa mobalangira obwerere bwʼekiharo kyʼomusege, neryo mobasonda eritwala obwato bʼoko musege oyo, kyamatokekana.

⁴⁰ Neryo mobagusa esyongomo esyo, mobasĩgasyo omo ngetsi. Kandi mobakũndũla ebikoba ebikaboha omuti owakabindula obwato. Kandi mobasumba olukimba olwʼemuliro wʼobwato, neryo erihunga molyalolyabo oko musege.

⁴¹ Nĩkwa erĩhĩka omo masanga-sangano wʼamagetsi, mobalolya obwato bʼoko kitaka. Kandi omutwe wʼobwato mwahatira, mwataswatoka erigenda, nĩkwa obwato mobwatsũka erisatangika enyũma busana nʼamaka wʼebisunda byʼengetsi.

⁴² Neryo abasĩrĩkanĩ mobayisunasuna erĩĩta bandu bʼomũlĩkĩ, Sihabye oyukatsiha nʼeritswa.

⁴³ Nĩkwa omukulu wʼabasĩrĩkanĩ erĩgana, iniakasonda erĩlamya Paũlo, mwakakĩryabo erĩĩtabo, neryo mwahanabo ati abasĩ eritsiha batsũke eriyigusa omo magetsi, bahĩke oko kitaka.

⁴⁴ Kandi ati abandi bakwamebo oko bisayi, nʼabandi oko bihande-bihande byʼobwato. Neryo abosĩ mobabala, mobahĩka oko kitaka ko ndeke.