Emibiri 24 - AMASAKO ABOYTRTRE WA NYAMUHANGA AWAKAHULAWA MO BIBLIA

Abayũda bakahandikirira Paũlo

¹ Enyũma wʼebiro bitanu, omũhererĩ mukulu oko bahererĩ bosĩ, ye Anania, mwaya eKaĩsarĩa haguma nʼabandi bakulu, nʼembũyĩ oyukahulawa mo Tertũlo. Neryo mobahandikirira Paũlo embere wʼomũtabalĩ mukulu ye Felĩkĩ.

² Neryo babere babibirikira Paũlo, Tertũlo mwatsũka erimuhandikirira, ĩnĩakabũga nʼomũtabalĩ ati, Uwe Felĩkĩ mubuya! Busana nawe tukabuyahirawa nʼobuholo bunene, nʼakandi busana nʼerilembera lyawe, ebibi byabirikungwa, nʼebibuya byabirikolwa busana nʼekihanda ekĩ.

³ Tũkasĩma omwatsi oyũ ehosĩ emigulu yosĩ, kandi tukaleta ewasĩngya.

⁴ Nĩkwa sĩnyanzĩre erĩkũlũhya, ngakulemba-lemba Ũtowe hake busana nʼobubuya bwawe.

⁵ Kusangwa twabĩrĩrebya omundu oyũ kwʼali mũtĩngĩtya, kandi nĩ mũkatĩsanĩa omo katĩkatĩ kʼAbayũda omo kihugo kyosĩ, kandi nĩ mũhanganĩrĩ wʼekihanda kyʼAbanazaretĩ.

⁶ Kandi mwalenga erĩtsandya eHekalũ, neryo motwamuhamba. [Twabya twanzĩre erimutswera ngʼEmigambo yetu.

⁷ Nĩkwa Lũsĩa omukulu wʼeelfu yʼabasĩrĩkanĩ mwasa, mwatusagulaye nʼamaka manene.

⁸ Neryo Lũsĩa mwahamula ati abahandĩkĩrĩrĩ buwe bahĩke embere syawe.] Nawe wamamũbũlya ndeke wasyatoka eriminya emyatsi eyo tukamuhandikirira.

⁹ NʼAbayũda nabo mobamuhandikirira bati emyatsi eyo ni kwenene.

Paũlo akatonda ebiwe embere sya Felĩkĩ

¹⁰ Neryo omũtabalĩ mukulu mwakoherya Paũlo ati abũge. Neryo Paũlo mwasũbĩrya ati, Nyĩnasĩ wabiribya mũtswerĩ wʼekihanda ekĩ omo myaka mingi, neryo ngatonda ebyage ĩnyĩnatsemĩre.

¹¹ Nawe wanganatoka eriminya ngoko hamatalaba biro ĩkũmĩ na bibiri bisa omugulu naya eYerũsalema erĩyaramĩrĩayo.

¹² Abayũda mobatanyibana ngakanĩa nʼomundu kutse erĩtwa eyĩsesĩ omo Hekalũ, kutse omo manyũmba wʼerĩhĩndanamo, kutse omo mũyĩ.

¹³ Kandi sibangatoka erĩkũkangya kwenene emyatsi eyo bakanyihandikirira lino.

¹⁴ Nĩkwa ekiguma ngakubwira nyiti, ngakolera Nyamuhanga wʼaboso-kulu wetu omo Nzira yʼomukama, eyo yo bakahula mo kindi kisomo. Kandi ngĩkĩrĩraya ebyosĩ ebiri omo Migambo ya Musa, nʼebyosĩ ebĩsakĩre omo bamĩnyererĩ.

¹⁵ Kandi nyiwite amaha uku Nyamuhanga, awʼabandu aba nabo bakasĩmago, ngoko hasyabya erĩlũbũka lyʼabatunganene nʼababi.

¹⁶ Neryo ngayitsinga eribya ebiro byosĩ nʼobunya-mutima bubuya, embere sya Nyamuhanga, nʼembere syʼabandu.

¹⁷ Na lino enyũma wʼeyindi myaka, monahĩka eYerũsalema erireta olũsũnzo busana nʼekihanda kyetu, nʼerireta amahere.

¹⁸ Neryo omugulu nabya ngakola nyitya mobanyeya omo Hekalũ inabiribuga emitsye yʼeriera, isihali endeko kutse olukanda.

¹⁹ Nĩkwa habya abandi Bayũda bʼeAsĩa, nabo kumbe bangahĩka embere syawe ibanyihandikirira, bamabya bawite omwatsi ũkwʼingye.

²⁰ Kutse abandu aba nabo batũlego nga babana emĩbĩrĩ mibi omugulu nahangana embere wʼErĩbũgĩro.

²¹ Monabũga omwatsi muguma omugulu nahangana omo katĩkatĩ kabo, nyiti, Ngaletawa oko lubanza embere syenyũ mũnabwĩre busana nʼerĩlũbũka lyʼabaholĩ.

²² Nĩkwa Felĩkĩ, ĩnĩanasĩ ndeke omwatsi wʼeNzira eyo, mwabwirabo ati, balinde, Omukulu wʼabasĩrĩkanĩ elfu ye Lũsĩa, asyabya abiasa, nasyatwa olubanza lwenyũ.

²³ Neryo mwahana omukulu wʼerĩgana ati, ategaye Paũlo, nĩkwa amuhe obwĩranda, kandi syakakĩrĩraye abĩra buwe erĩmũwatĩkya.

Paũlo embere sya Felĩkĩ na Derũsĩla

²⁴ Nĩkwa enyũma wʼebindi biro, Felĩkĩ mwahĩka nʼomũkalĩ wuwe Mũyũda. Neryo mwatumira uku Paũlo, kandi mwamuhulikirira akabũga omwatsi wʼerĩkĩrĩrya Kristo Yesu.

²⁵ Kandi omugulu Paũlo abya akakanĩa omwatsi wʼeritunganene nʼowʼerĩyĩteya, nʼomwatsi wʼeritswera erikandisyasa, Felĩkĩ mubaha ati, Lino ukatagenda, neryo nasyabya nabibana omugulu nasyaswakubirikira.

²⁶ Kandi mwabya akahĩra amaha uku Paũlo, ati Paũlo asyamuha ekyũtũlĩro. Kyaleka iniamutumirako engendo nyingi, nʼerĩkanĩa naye.

²⁷ Nĩkwa emyaka ĩbĩrĩ yabere yabilaba, Porkĩo Festo mwaya oko ngoma ya Felĩkĩ ngʼomũtabalĩ. Nĩkwa Felĩkĩ mwanza erĩsĩmwa nʼAbayũda, kyaleka ĩnĩasĩga Paũlo yʼomo mũlĩkĩ.