Emibiri 23 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Neryo Paũlo mwatungerera bandu bʼerĩbũgĩro bo ndeke, neryo mwabũga nabo ati, Ĩnywe balĩkyetu! Nabiribyaho embere sya Nyamuhanga erĩhĩka mũnabwĩre nʼobunya-mutima bubuya.

² Neryo omũhererĩ mukulu oko bahererĩ bosĩ, ye Anania, mwahamula ababya bimene hakũhĩ naye ati baswĩraye Paũlo yʼoko buno.

³ Neryo Paũlo mwabũga naye ati, Nyamuhanga asyakũswĩrya, uwe lũhĩmbo lũhakabĩrye embemba! Uwe wĩkere aho erinyitswera omo Migambo, nĩkwa ukakota Emigambo uti banyĩswĩraye!

⁴ Nĩkwa abandu ababya bimeneho mobabũga bati, Ukatsuma omũhererĩ mukulu oko bahererĩ bosĩ ba Nyamuhanga kwehĩ?

⁵ Nĩkwa Paũlo mwabũga ati, Balĩkyetu sĩndwe nyasĩ kwʼali mũhererĩ mukulu oko bahererĩ bosĩ. Kusangwa kĩsakĩre kiti, Sũsyebũga ekibi busana nʼomũtabalĩ wʼabandu benyu.

⁶ Nĩkwa Paũlo abere abiminya kwʼekihande kiguma kyabya kyʼAbasadũkayo nʼekindi kyabya kyʼAbafarĩsayo, mwabũgĩra omwʼĩbũgĩro ati, Balĩkyetu! Ĩngye indi Mũfarĩsayo, omugala wʼAbafarĩsayo. Ngaletawa oko lubanza embere syʼerĩbũgĩro busana nʼamaha wʼerĩlũbũka lyʼabaholĩ!

⁷ Neryo abere abĩbũga atya, mohabya erinegena omo katĩkatĩ kʼAbafarĩsayo nʼAbasadũkayo, nʼendeko moyagabana.

⁸ Kusangwa Abasadũkayo bati, Sihali erĩlũbũka, kandi sihali omũlaĩka, kutse sihali ekĩrĩmũ; nĩkwa Abafarĩsayo bakalĩga ebyosĩ.

⁹ Neryo mohabya obogo bunene, nʼabandi bakangĩrĩrya bʼEmigambo bʼekihanda kyʼAbafarĩsayo mobahangana mobakuba obuhaka bo kutsibu bati, Sitwetabana oko mundu oyũ kwʼekibi. Kyanganabya ĩnĩ kĩrĩmũ kutse omũlaĩka akabũga naye kwehĩ?

¹⁰ Neryo erinegena lĩnene molyatsũka, nĩkwa omukulu wʼabasĩrĩkanĩ mubaha ati bakanditulanga Paũlo mo bihande-bihande, neryo mwahana abasĩrĩkanĩ ati bandagalireho basagulebo ye Paũlo nʼamaka omo byala byabo, bamulete omo nyũmba yʼabasĩrĩkanĩ.

¹¹ Oko kiro ekĩkwamĩre ekyo, Omukama mwahangana hakũhĩ na Paũlo ati, Uhande omutima! Wabĩrĩtũla omwatsi wage wʼeYerũsalema, litya litolere ĩwatũla omwatsi wage wʼeRoma nibya.

Embĩta yʼerĩĩta Paũlo

¹² Neryo bwabere bwabikya, Abayũda mobamuyira embĩta. Mobayisema bati sibendirya kutse erĩpũlya bate bĩta Paũlo.

¹³ Abandu abaya embĩta eyĩ babya bangi kwilaba makũmi ani.

¹⁴ Neryo mobaya oko bahererĩ bakulu nʼabakulu bati, Twabiriyisema erĩtendĩgerya akalyo tute twĩta Paũlo.

¹⁵ Neryo ĩnywe haguma nʼabʼerĩbũgĩro mubwire omukulu wʼabasĩrĩkanĩ elfu muti abaletere Paũlo, ngoko mukasonda eriminya ndeke-ndeke omwatsi wuwe. Nĩkwa ĩtwe tũsĩkĩre erĩmwĩta ate ahĩka na hano.

¹⁶ Nĩkwa omũhwa wa Paũlo mowa embĩta yʼerimulamba, neryo mwasa, mwingira omo nyũmba yʼabasĩrĩkanĩ, mwabwira Paũlo.

¹⁷ Nĩkwa Paũlo mwabirikira omukulu wʼerĩgana, mwamubwira ati, Utwale omũlwana oyũ oko mukulu wʼeelfu, kusangwa awite ekyʼerimubwira.

¹⁸ Neryo omukulu oyo mwamutwala oko mukulu wʼeelfu mwabũga ati, Paũlo, omundu wʼomũlĩkĩ, mwakanyibirikira ati, nyirete, omũlwana oyũ yʼukʼuwe kusangwa awite ekyʼerikubwira.

¹⁹ Neryo omukulu wʼeelfu mwamuwata oko byala nʼerimutwala omo ngonde, mwamũbũlya omo bũbĩso-bĩso, ati, Ni mwatsi wahi ukasonda erinyibwira kwehĩ?

²⁰ Neryo mwabũga ati, Abayũda babirihanana bati bakakũbũlaya ũsyendagalaya ye Paũlo omo ngyakya okwʼĩbũgĩro ngʼukasonda erĩbũlya eyindi myatsi yiwe.

²¹ Nĩkwa sũlĩgĩrebo, kusangwa abalume bangi kwilaba makũmĩ ani bakamulambira omo nzira. Nabo babĩrĩlahĩrya bati sibendirya kutse erĩpũlya bate bĩta Paũlo. Na lino babĩrĩyĩtegekanĩa eririnda endagane yawe.

²² Neryo omukulu wʼeelfu mwaleka omũlwana erigenda abimubwira ati, Subwire mundu nʼomuguma ko wabirinyibwira emyatsi eyĩ.

Paũlo akatumawa oko mũtabalĩ ye Felĩkĩ

²³ Neryo omukulu wʼeelfu oyo Mwabirikira abakulu babiri bʼamagana, mwabwirabo ati, Mũtegekanaye abasĩrĩkanĩ magana abiri, nʼabandu bʼesyosabayĩrĩ makũmĩ alinda, nʼabandu bʼamatũmo magana abiri, babye ĩbabĩrĩyĩtegekanĩa oko saa ĩsatu syʼekiro.

²⁴ Kandi mubane esyosabayĩrĩ busana na Paũlo erimutwala ndeke oko mũtabalĩ Fe­lĩkĩ.

²⁵ Neryo mwasaka ebarua, ati,

²⁶ Ĩngye Klaũdĩo Lũsĩa, ngakutu­mira Obuholo, uwe Mũtabalĩ mukulu mubuya, Felĩkĩ.

²⁷ Abayũda mobahamba omundu oyũ ibakasonda erĩmwĩta. Nage monowa kwʼali Muroma, neryo monahĩkaho nʼabasĩrĩkanĩ erĩmũlamya.

²⁸ Kandi monasonda eriminya ekyaleka ĩbamũhandĩkĩrĩrya, monamuleta okwʼĩbũ­gĩro lyabo.

²⁹ Neryo monabana ĩbakamũhandĩkĩrĩraya busana nʼemyatsi yʼEmigambo yabo, isibawite ekyangamwĩtĩsya, kutse isibawite ekyangamũbohesya.

³⁰ Kandi namabibwirwa kwʼAbayũda babiriya embĩta busana nʼomundu oyũ, namakutumiraye lũba. Nĩkwa namabwira abakamũhandĩkĩrĩraya nyiti, bamuhandikirire embere syawe.

³¹ Neryo abasĩrĩkanĩ mobakola ngoko babwirawa. Mobatwala Paũlo yʼomo kiro oko Antĩpatĩrĩ.

³² Neryo engyakya abasĩrĩkanĩ mobasuba omo manyũmba wabo, ĩbakasĩga bandu bʼesyosabayĩrĩ eritwala Paũlo eKaĩsarĩa.

³³ Neryo babere babĩhĩka eKaĩsarĩa, mobaha omũtabalĩ mukulu yʼebarua, kandi mobahĩra Paũlo embere siwe.

³⁴ Omũtabalĩ mukulu oyo mwasoma ebarua, neryo mwabũlya Paũlo nga ni wʼekihugo kyahi, neryo mwaminya kwʼali wʼekihugo kyʼeKĩlĩkĩa.

³⁵ Neryo mwabũga ati, Nasyakuhulikirira abahandĩkĩrĩrĩ bawe bahĩka. Neryo mwahana ati Paũlo ateyĩbawe omo kikali kya Herode.