Emibiri 20 - AMASAKO ABOYTRTRE WA NYAMUHANGA AWAKAHULAWA MO BIBLIA

Paũlo eMakedonĩa nʼekihugo kyʼAbagĩrĩkĩ

¹ Neryo olukanda olo lwabere lwabihwa, Paũlo mwabirikira abiga, neryo mwahanabo, nĩkwa abere abilagana nabo, mwahongoka akaya eMakedonĩa.

² Neryo abere abilaba omo bihugo ebyo, mwasĩkyabo emitima omo bĩnywa bingi, neryo mwahĩka omo kihugo kyʼAbagĩrĩkĩ.

³ Neryo Paũlo mwabya eyo yo mikera ĩsatu. Nĩkwa omugulu asonda eriya eSũrĩa omo bwato, mwaminya kwʼAbayũda bakamuyira embĩta, neryo mwayĩsũnza erisubula akalaba eMakedonĩa.

⁴ Nĩkwa Sopaterĩ, mugala wa Pĩrũ, wʼeBeroya, mwagenda naye, haguma na Arĩstarĩko, na Sekũndo wʼeTesalonĩka, na Gayo wʼeDerbe, na Tĩmoteo, na Tĩkĩko, na Trofĩmo wʼeAsĩa.

⁵ Aba mobatsũka erĩmbere, bakatulindirira eTroa.

⁶ Neryo motwalũa eFĩlĩpĩ omo bwato enyũma wʼebiro ebyo byʼobundu Bute mo Kĩhamya. Nʼenyũma wʼebiro bitanu motwahĩka kubo eTroa, nʼeyo motwĩkala ebiro birinda.

Erihĩka lya Paũlo eTroa

⁷ Neryo oko kiro kyʼeyenga motwahĩndana oko mesa yʼomukama. Neryo Paũlo mwakangĩrĩrya bandu, neryo mwabũga bingi erĩhĩka omo katĩkanene, kusangwa abya anzĩre erĩlũaho engyakya.

⁸ Kandi habya esyotala nyingi omo kyumba kyʼendata aho twabya tũhĩndene.

⁹ Neryo habya omũlwana erĩna liwe iyo Eũtĩko oyo wabya ĩkere omo lĩdĩrĩsa mwakwa otũgotserĩ. Neryo Paũlo abere ayitsinga okwʼĩbũga, Eũtĩko mwatsinga omo tũgotsĩ neryo mwatogera ahisi akalũa omo kyumba kyʼakasatu kyʼendata. Mobamutelula iniabirihola.

¹⁰ Nĩkwa Paũlo mwakĩmĩra ahisi mwamũnamĩrako, kandi mwamubagalira ati, simusweke kusangwa akineho.

¹¹ Neryo abere abiswahetukira endata, nʼerirya oko mesa yʼomukama, Paũlo mwakanĩa nabo ndambĩ nene erĩhĩka okwʼikya, neryo mwagenda.

¹² Neryo mobatwala omũlwana oyo yʼeka inianeho, mobakĩranĩbwa ndeke.

Paũlo akaya eMĩletũ

¹³ Nĩkwa ĩtwe motwatangirira embere eriya omo bwato, neryo motwasokera eAsosĩ, itukasonda erĩlabamĩa Paũlo yʼeyo. Kusangwa abya iniabirihana atya, kusangwa asonda eriyayo omo bisando.

¹⁴ Neryo Paũlo mwahĩndana netu eAsosĩ, nʼeyo motwamũkokya omo bwato tukaya eMĩtĩlene.

¹⁵ Nʼerĩlũa eMĩtĩlene omo bwato motwahĩka engyakya eyisirya wʼeKĩo. Neryo engyakya motwasokera eSamosĩ. Nʼenyũma wʼekiro kiguma motwahĩka eMĩleto.

¹⁶ Nĩkwa Paũlo mwayĩsũnza eritwanganira eEfeso omo bwato, kusangwa ĩsĩanzĩre erĩĩkala eAsĩa, iniakanguha eriya eYerũsalema erĩhĩkayo oko kiro kyʼePentekote, lyamatokekana.

Paũlo akasĩgĩra bakulu bʼeEfeso bʼobuholo

¹⁷ Neryo Paũlo mwabirikira abakulu bʼekanĩsa yʼeEfeso ati bamwegaye.

¹⁸ Neryo babere babĩmũhĩkako, mwabwirabo ati, Nenyũ mũnasĩ ngoko nabya nenyũ emigulu yosĩ erĩtsũka ekiro nahĩka eAsĩa.

¹⁹ Nabya ngakolera Omukama nʼerĩyĩkehya, omo mĩsonĩa, nʼamalĩge ebyanyĩhĩkako busana nʼesyombĩta syʼAbayũda.

²⁰ Kandi mũnasĩ mondagana erĩbatũlĩra omwatsi owabya nʼendũndĩ, ĩnĩngabakangĩrĩraya embere syʼabandu, kandi omo yindi nyũmba nʼomo yindi nyũmba.

²¹ Monabwira Abayũda nʼAbagĩrĩkĩ bo ndeke nyiti babindule emitima yabo baleke ebibi byabo, babindukire Nyamuhanga nʼerĩkĩrĩrya Omukama wetu Yesu Kristo.

²² Na lino, lebaya ngaya eYerũsalema, ingakenga Omũlĩmũ Abũyĩrĩre, Ĩsĩnyasĩ ebyasyambĩkako eyo.

²³ Nyasĩ kiguma, nyiti, Omũlĩmũ Abũyĩrĩre akambwira ndeke ati omũlĩkĩ nʼamalĩge bikanyirindirira omo buli mũyĩ.

²⁴ Nĩkwa ngaganza engebe yage nga si kindu, inatoka eribuga obukwenda bwage, nʼomũbĩrĩ ogo Mukama Yesu amba erikola, eryo nĩ tũla Engulu Yowene yʼolukogo lwa Nyamuhanga.

²⁵ Neryo lino, lebaya, nabirilaba omo katĩkatĩ kenyũ, ngatũla omwatsi wʼobwami bwa Nyamuhanga. Nyĩnasĩ ĩnywe bosĩ Simwendisyaswanyilolako kandi.

²⁶ Neryo ngabatũlĩrago mũnabwĩre nyiti, Sindi ko lubanza lwʼomundu nʼomuguma.

²⁷ Kusangwa mondasaga erĩbatũlĩra erĩyĩsũnza lyosĩ lya Nyamuhanga.

²⁸ Mũyĩtegaye ĩnywebene, kandi mũtegaye ekĩhyo kyosĩ, ekyo Mũlĩmũ Abũyĩrĩre abiribayira eribya balangĩrĩ. Mubye balĩsya bʼekanĩsa ya Nyamuhanga eyo agula omo musasi wuwe ĩyowene-wene.

²⁹ Kusangwa nyĩnasĩ namabigenda, amakungu awakalĩre asyingira omo katĩkatĩ kenyũ, Ĩsĩendĩsyabalya ekĩhyo.

³⁰ Kandi abandu basyahangana omo katĩkatĩ kenyũ, ĩbakabũga emyatsi yʼamabehĩ, erikura abiga erikwamabo.

³¹ Neryo mũtegaye, mwibuke ngoko nabakangĩrĩraya, obuli mundu omo myaka ĩsatu omwʼitungi nʼomo kiro, omo mĩsonĩa.

³² Neryo lino ngabahĩra omo byala bya Nyamuhanga, nʼomo kĩnywa kyʼolukogo luwe. Iye atoke erĩbahĩmba, nʼeribaha omũyĩsa ogo akabikira abandu buwe bosĩ, abo abirihigula.

³³ Sinditarumwa busana nʼesyofranka, kutse esyamagetsi, kutse esyongimba syʼomundu.

³⁴ Ĩnywebene mũnasĩ ebyala byage ebĩ byabirikolera ebyʼobwaga bwage, nʼobwaga bwʼabandu ababya haguma nage.

³⁵ Nabĩrĩbakangya omo myatsi yosĩ eyĩ, omwʼikola lĩkalĩre lyʼomũsĩndo oyũ, litolere ĩmwawatĩkya abandu bolo, kandi mwibuke ebĩnywa ebyo Mukama Yesu abũga ĩyowenewene ati, Erĩhĩtya likaleta obutseme kwilaba erihabwa.

³⁶ Neryo Paũlo abere abĩbũga emyatsi eyĩ, mwakũkama ahisi, mwasaba nabo abosĩ,

³⁷ Neryo abosĩ mobalira nʼomulenge, mobamubagalira, mobamulyatsirira.

³⁸ Kandi mobabya nʼobũlĩge kutsibu busana nʼekĩnywa ekyo abwirabo ati, sibendisyaswamulolako kandi. Neryo mobamũkwamanĩsya erĩmũkolya oko bwato.