Emibiri 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩhĩka lyʼOmũlĩmũ Abũyĩrĩre

¹ Neryo ekiro kyʼePentekote kyabere kyahĩka, abosĩ mobabya hagumaguma.

² Neryo-neryo omulenge mwalũa elubula eribuhirira ngʼerihunga erĩkalĩre, molyũsũlya enyũmba yosĩ yʼaho babya bĩkere.

³ Neryo mobahulukirwako ebirimi ngʼebyʼomuliro, ebikagabanawa oko buli mundu, mobyĩkala kubo.

⁴ Nʼabosĩ mobũsũlĩbwa nʼOmũlĩmũ Abũyĩrĩre, neryo mobatsũka erĩbũga omo yindi mĩbũge, ngʼOmũlĩmũ kwʼahabo erĩbũga.

⁵ Nĩkwa habya Bayũda abĩkere eYerũsalema, babya bandu bʼekisomo abalũa omo buli kihanda muna-kihugo.

⁶ Neryo omugulu bowa omulenge oyũ, endeko moyahĩndana. Neryo mobahanga-hangya emitima kusangwa obuli mundu mowabo bakabũga omo mũbũge wuwe.

⁷ Neryo mobatsũka erisweka nʼerĩsĩsĩra bati, Kwʼabosĩ abakabũga si Banya Galĩlaya kwehĩ?

⁸ Kandi netu tũkowabo bakabũga omo mũbũge wetu ogo twabutawamo tuti kwehĩ?

⁹ Ĩtwe tuli bʼePartĩ, nʼabʼeMedĩ, nʼabʼeElamũ, nʼabandu bʼeMesopotamia, nʼeYũdea, nʼeKapodokĩa; nʼePonto, nʼeAsĩa,

¹⁰ nʼeFũrũgĩa, nʼePamfĩlĩa, nʼeMĩsĩrĩ, nʼebihugo byʼeLĩbĩa hakũhĩ nʼeKũrene, nʼababunga bʼeRoma, Abayũda, nʼabʼebihanda ababiribinduka eribya Bayũda,

¹¹ Abakrete nʼAbaarabu. Nĩkwa tũkowabo bakabũga omo mĩbũge yetu emĩbĩrĩ yʼamaka ya Nyamuhanga!

¹² Neryo mobabya bakahanga-hangya emitima, bakasweka, bakabũlanĩa bati, Kwe ni kyahi kwehĩ?

¹³ Nĩkwa abandi mobasekererya bati, babĩrĩkũnda omo bĩnyũ bihya-bihya.

Erĩtũlago lya Petero

¹⁴ Nĩkwa Petero mwahangana nʼabandi bakwenda erĩkũmĩ nʼomuguma, neryo mwatsũka erĩbũga nʼendeko omo mulenge munene ati, Ĩnywe bandu bʼeYũdea, nenyũ ĩnywe bosĩ abĩkere eYerũsalema, mowe ebĩnywa byage, muminye ekĩ.

¹⁵ Abandu aba sĩbakũndĩre, ngoko mũkaganĩraya, kusangwa ni saa ĩsatu yʼengyakya.

¹⁶ Kusangwa ebĩ byo byabũgawa nʼomũmĩnyererĩ Yoelĩ ati,

¹⁷ Nyamuhanga ati, Ekĩ kyasyabya oko biro byʼenyũma-nyũma, Nasyũtũlĩra Omũlĩmũ wage oko bandu bosĩ; Abagala benyũ nʼabali benyũ basyaminyerera, Nʼabalwana benyũ basyalola oko syonzolĩ, Nʼabasyakulu benyũ basyalota esyonzolĩ.

¹⁸ Nage nasyũtũlĩra Omũlĩmũ wage oko biro ebyo, Oko bagombe bage bʼobulume nʼabʼobũkalĩ, Nabo basyaminyerera.

¹⁹ Nasyakanganĩa ebyʼeriswekera omo kyanya endata, Nʼebĩmĩnyĩsyo muna-kihugo eyĩkwa: Omusasi, nʼomuliro, nʼerĩtũmba lyʼomũkĩ.

²⁰ Eryuba lyasyabindulwa mo mwĩrĩmya, Nʼomukera iniabya ngula ngʼomusasi, Embere wʼerĩhĩka lyʼeKiro kikulu kyʼolukengerwa lʼOmukama.

²¹ Neryo, obuli mundu oyukalakira oko lĩna lyʼOmwami Mukulu asyalamĩbwa.

²² Ĩnywe, balume bʼeĨsraelĩ! muhulikirire ebĩnywa ebĩ! Yesu wʼeNazaretĩ, abya mundu oyo Nyamuhanga asĩma embere syenyũ omo bitiko-tiko, nʼebyʼeriswekera, nʼebĩmĩnyĩsyo ebyo Nyamuhanga akola omo byala bya Yesu omo katĩkatĩ kenyũ, ngoko mũnasĩ.

²³ Nyamuhanga abya asĩ, kandi mwategekanĩa ati, Yesu ahĩrawe omo byala byenyũ, kandi ĩnywe momwamwĩta, imukaleka abandu babi ibamukongomerera oko musalaba.

²⁴ Nĩkwa Nyamuhanga mwamũlũbũkya, ĩnĩamabĩlũsya amagalĩ wʼoluholo, kusangwa oluholo silwangatoka erimuboha omo maka walo.

²⁵ Kusangwa Dawĩdĩ mwabũga busana na Yesu ati, Monalangira Omukama embere syage emigulu yosĩ; Kusangwa ali oko byala byage byʼamali, ĩsĩnangatũndwa.

²⁶ Neryo omutima wage mwatsema, Nʼebĩnywa byage bĩkayĩsyandira, Kandi omubiri wage asyabana amaha,

²⁷ Kusangwa sĩwendĩsyasĩga ekĩrĩmũ kyage omo Kũlĩmũ, Kutse siwendisyaleka Omũbũyĩrĩre wawe erilola okwʼihonda.

²⁸ Wabĩrĩnyĩmĩnyĩsya esyonzira syʼengebe, Kandi embere syawe Wasyanyĩgũlya nʼobutseme.

²⁹ Balĩkyetu, nanga babwira ndekendeke busana na tata-kulu Dawĩdĩ. Iye mwahola kandi mwatabwa, nʼamahero wuwe akine haguma netu hano mũnabwĩre.

³⁰ Abya mũmĩnyererĩ, kandi abya asĩ ko Nyamuhanga amulaga endagane. Nyamuhanga mwamũlahĩrya ati akasyahĩra omundu muguma gʼoko bana buwe mo mwami.

³¹ Dawĩdĩ mwalangira ekyo Nyamuhanga akandisyakola, neryo mwahula erĩlũbũka lya Kristo ati, Sĩendĩsyasĩga ekĩrĩmũ kiwe kyʼomo Kũlĩmũ, Kutse omubiri wuwe siendisyalola okwʼihonda.

³² Nyamuhanga abĩrĩlũbũkya Yesu oyo oko baholĩ, netu ĩtwe bosĩ tuli balangĩrĩ bʼomwatsi oyo.

³³ Yesu abĩrĩhamĩbwa oko byala byʼamali bya Nyamuhanga, kandi abiribana uku Tata erilaga lyʼOmũlĩmũ Abũyĩrĩre, nʼebyo mukalangira lino nʼerĩowa nĩ lũsũnzo luwe abĩrĩtũtũlĩra.

³⁴ Kusangwa Dawĩdĩ mwatahetukira elubula, nĩkwa mwabũga ati, Omwami Mukulu mwabwira Omukama wage ati, Wĩkale oko byala byage byʼamali,

³⁵ Erĩhĩka aho nasyahĩrĩra esyonzĩgũ syawe, Mo kĩtũmbĩ kyʼebisando byawe.

³⁶ Neryo abandu bosĩ ba Ĩsraelĩ baminye ndeke ngoko Nyamuhanga abiriyira Yesu oyo mwabamba oko musalaba, mo Mukama na Kristo.

³⁷ Neryo omugulu abandu bowa ebĩ, mobabya nʼobũlĩge bunene, mobabwira Petero nʼabandi bakwenda bati, Balĩkyetu, tuyire tuti kwehĩ?

³⁸ Petero mwabwirabo ati, Mubindule emitima yenyũ, muleke ebibi, kandi obuli mundu abatĩsĩbawe omo lĩna lya Yesu Kristo busana nʼeribuyirwa lyʼebibi byenyũ, neryo mwasyabana olũsũnzo lwa Nyamuhanga yo Mũlĩmũ Abũyĩrĩre.

³⁹ Kusangwa endagane ya Nyamuhanga ni busana nenyũ nʼabana benyũ na busana nʼabosĩ abali ehali, abosĩ abo Mukama Nyamuhanga wetu asyabirikira.

⁴⁰ Neryo Petero mwatũlago omo bindi bĩnywa bingi, kandi mwahatikanabo ati, Mũyĩlamaye oko lulengo lubi olũ!

⁴¹ Neryo abo, abĩkĩrĩraya ekĩnywa kiwe mobabatĩsĩbwa. Neryo oko kiro ekyo, abandu nga elfu ĩsatu (3,000), mobatomekerwa oko ndeko yabo.

⁴² Neryo mobasiba bakiga erĩkangĩrĩrya lyʼabakwenda nʼeribya buguma nabo. Kandi babya bakahĩka oko mesa yʼomukama nʼokwʼisaba.

Emigendere yʼabĩkĩrĩrye

⁴³ Neryo abakwenda mobakola ebyʼeriswekera nʼebitiko-tiko bingi, nĩkwa obuli mundu mwabya nʼobuba.

⁴⁴ Neryo abĩkĩrĩraya bosĩ mobabya haguma, mobasangira ebindu byosĩ byo haguma.

⁴⁵ Kandi mobagũlya esyombibi syabo nʼebindu byabo, ibakasangira ebindu byosĩ ebyo nʼabandi bosĩ, ngʼobwaga bʼobuli mundu.

⁴⁶ Kandi obuli kiro mobasiba bakahĩndana omo Hekalũ nʼomutima muguma. Neryo mobahĩka oko mesa yʼomukama omo buli nyũmba, ibakalira ebyalya byabo haguma-guma, nʼobutseme nʼomutima wʼerĩyĩkehya.

⁴⁷ Babya bakapipa Nyamuhanga nʼerĩsĩmwa nʼabandu bosĩ. Kandi Omukama mwatomekera eko ndeko yabo obuli kiro abalamĩbawa.