Emibiri 18 - AMASAKO ABOYTRTRE WA NYAMUHANGA AWAKAHULAWA MO BIBLIA

Paũlo eKorĩnto

¹ Enyũma wʼemyatsi eyĩ Paũlo mwalũa eAtene, mwaya eKorĩnto.

² Neryo mweyayo Omũyũda muguma, erĩna liwe iyo Akwĩla, omundu wʼePonto, oyo walũa eĨtalĩa oko mugulu oyo haguma na mũkalĩwe, Pĩrĩsĩla. Kusangwa Omũtabalĩ mukulu ye Klaũdĩo abya iniabirihana ati Abayũda bosĩ balũe eRoma. Neryo Paũlo mwayabanabo,

³ mwĩkala nabo, nʼerikola omũbĩrĩ haguma nabo, kusangwa abosĩ babya balũkĩ bʼamahema.

⁴ Nĩkwa Paũlo abya akakanĩrya omo nyũmba yʼerĩhĩndanamo omo buli Sabato, iniakalenga eribindula Abayũda nʼAbagĩrĩkĩ.

⁵ Omugulu Sila na Tĩmoteo bahĩka eMakedonĩa, Paũlo mwasiba omugulu gosĩ akatũla Engulu Yowene, ĩnĩakatũlĩrago Abayũda ati, Yesu ni Kristo.

⁶ Nĩkwa omugulu balwa naye nʼeritsuma, Paũlo mwakungutirabo esyongimba siwe ati, Omusasi wenyũ abye oko mitwe yenyũ! Sindi ko lubanza lwenyũ. Erĩtsũka lino ngaya oko Bihanda.

⁷ Neryo mwalũa kubo, mwaya omo nyũmba yʼomundu muguma oyukahulawa mo Tĩto Yũsto, oyũkaramaya Nyamuhanga, nʼenyũmba yiwe yabya ĩyĩhererenĩe nʼenyũmba yʼerĩhĩndanamo.

⁸ Neryo Krĩspo, omukulu wʼenyũmba yʼerĩhĩndanamo, mwĩkĩrĩrya Omukama, haguma nʼabʼenyũmba yiwe bosĩ. Kandi Abanya Korĩnto bangi babere bowa Paũlo, mobĩkĩrĩrya, mobabatĩsĩbwa.

⁹ Kandi Omukama mwabũga na Paũlo omo kiro omwʼilota ati, Sigubahe, nĩkwa ũbũge, subye bũkũtũ.

¹⁰ Kusangwa indi haguma nawe. Sihali mundu oyo wasyakubambira, nʼerikukola nabi, kandi ngwite bandu bangi omo mũyĩ oyũ.

¹¹ Neryo Paũlo mwĩkalayo mwaka muguma nʼemikera ndatu, ĩnĩakakangĩrĩraya abandu ekĩnywa kya Nyamuhanga.

¹² Nĩkwa omugulu Galĩo abya mũtabalĩ wʼAbaroma omo kihugo kyʼAbagĩrĩkĩ, Abayũda mobaya embĩta yʼeribambira Paũlo nʼerimutwala omo nyũmba yʼolubanza.

¹³ Abayũda abo mobabũga bati, Omundu oyũ akabindula bandu erĩramya Nyamuhanga omo mũsĩndo owate oko Migambo.

¹⁴ Nĩkwa Paũlo abere akasonda eritonda, neryo Galĩo mwabwira Abayũda ati, Ĩnywe Bayũda kumbe omwatsi oyũ alwe wʼerikola nabi kutse ekibi kĩkalĩre, lyangatolere ĩnabowa.

¹⁵ Nĩkwa kumbe ni mwatsi busana nʼebĩnywa nʼamena omo migambo yenyũ, mũtwebyo ĩnywebene. Sĩnangalĩga eribya mũtswerĩ wʼemyatsi eyĩ!

¹⁶ Neryo Galĩo mwahigabo omo nyũmba yʼolubanza.

¹⁷ Neryo abosĩ mobatsimba Sosĩtenĩ, omukulu wʼenyũmba yʼerĩhĩndanamo, mobatsũka erĩmũswĩrĩrya emuliro wʼekĩtũmbĩ kyʼolubanza. Kandi Galĩo mwatatsomana emyatsi eyĩ, nʼahake.

Paũlo na Sila bakasuba eAntĩokĩa

¹⁸ Neryo Paũlo mwĩkala eKorĩnto yo biro bingi. Neryo mwalagana nʼabalĩkyetu, mwasokera eSũrĩa omo bwato, haguma na Pĩrĩsĩla na Akwĩla. Neryo eKenkũrĩa Paũlo mwasĩswa, kusangwa abya akaberererya erĩlahĩrya liwe.

¹⁹ Neryo mobahĩka eEfeso, nĩkwa mwasĩgayo Pĩrĩsĩla na Akwĩla. Kandi mwingira omo nyũmba yʼerĩhĩndanamo, nʼerĩkanĩa nʼAbayũda.

²⁰ Kandi Abayũda mobamũbũlya bati ĩkale nabo ebindi biro, nĩkwa mwatalĩga.

²¹ Nĩkwa mwalagana nabo ati, Nasyaswasa kandi ũkwʼĩnywe, Nyamuhanga amanza. Neryo mwalũa eEfeso omo bwato.

²² Neryo Paũlo abere ahĩka eKaĩsarĩa, mwaya eYerũsalema erĩkerya ekanĩsa, neryo mwandagalira eAntĩokĩa.

²³ Neryo abere abĩkalayo katambĩ, mwalũayo. Kandi mwalaba omo bihugo byʼeGalatĩa nʼeFũrĩgĩa, mĩraya abiga bosĩ.

Apolo oko mũyĩ wʼeEfeso nʼeKorĩnto

²⁴ Neryo Omũyũda muguma erĩna liwe iyo Apolo oyo wabutawa eAlũsandũrĩa, mwahĩka eEfeso. Apolo abya mundu oyo wasĩ erĩbũga ndeke-ndeke, kandi abya asĩ kutsibu emyatsi yʼAmasako.

²⁵ Abya ĩnĩabĩrĩkangĩrĩrĩbwa omo nzira yʼomukama, kandi ĩnĩakwĩre omũhwa wʼerĩbũga nʼerĩkangĩrĩrya ndeke emyatsi ya Yesu. Nĩkwa abya asĩ olũbatĩso lwa Yoane lusa.

²⁶ Neryo mwatsũka erĩbũga butsira eriubaha omo nyũmba yʼerĩhĩndanamo. Nĩkwa Pĩrĩsĩla na Akwĩla babere bamowa, mobagenda haguma naye, mobamũkũmbũlĩra enzira ya Nyamuhanga yo ndeke-ndeke.

²⁷ Neryo Apolo mwasonda erisokera omo kihugo kyʼAbagĩrĩkĩ. Nĩkwa abalĩkyetu bʼeEfeso mobasakira abiga bʼeyo bati bamũkokaye. Neryo abere ahĩkayo, mwawatĩkya kutsibu abĩkĩrĩraya olukogo lwa Nyamuhanga.

²⁸ Kusangwa Apolo mwasĩnga Abayũda bo kutsibu embere syʼabandu, ĩnĩakakangayabo omo Masako Yesu kwʼali Kristo.