Emibiri 17 - AMASAKO ABOYTRTRE WA NYAMUHANGA AWAKAHULAWA MO BIBLIA

Paũlo akaya eTesalonĩka

¹ Neryo Paũlo na Sila mobalaba eAmfĩpolĩ nʼeApolonĩa, mobahĩka eTesalonĩka ahabya enyũmba yʼerĩhĩndanamo yʼAbayũda.

² Paũlo mwingira omo nyũmba yʼerĩhĩndanamo ngoko atula akakola. Neryo mwakanĩryabo emilondo yʼAmasako oko Sabato ĩsatu.

³ Mwabya akakũmbũlĩrabo nʼerĩkangyabo ndeke ngoko lyabya litolere Kristo iniagalwa, nʼerĩlũbũka oko baholĩ. Paũlo ati, Yesu oyo ngabowĩsaya, yona Kristo.

⁴ Neryo abandi ba kubo mobasĩngwa, mobayitomekera uku Paũlo na Sila, haguma nʼendeko nene yʼAbagĩrĩkĩ ababya bakubaha Nyamuhanga, nʼabangi bʼoko bakalĩ abasĩkĩbwe.

⁵ Nĩkwa Abayũda mobabya nʼeritsuro mobahĩndanĩa bandu babi bʼekatale, neryo mobayira endeko yʼerĩbũgya olukanda omo mũyĩ. Kandi mobayabambira enyũmba ya Yasonĩ ibakasonda erireta Paũlo na Sila oko bandu bʼomwaga.

⁶ Neryo babere babulabo, mobakura Yasona, nʼabandi balĩkyetu embere syʼabakulu bʼomũyĩ bati, Abandu aba babiribindula ekihugo kyosĩ! Na lino babĩrĩhĩka na hano nibya.

⁷ Kandi Yasona abĩrĩkokyabo. Abosĩ bakapona amahano wa Kaĩsarĩ, bati hali ogundi mwami ye Yesu.

⁸ Neryo mobahahũkya endeko nʼabakulu bʼomũyĩ omo bĩnywa ebĩ.

⁹ Neryo babere babĩmya omuwato uku Yasona nʼabandi mobalwĩkabo.

Paũlo na Sila bakahĩka eBeroya

¹⁰ Neryo abalĩkyetu mobatuma Paũlo na Sila omo kiro eBeroya. Neryo babere babĩhĩkayo mobaya omo nyũmba yʼerĩhĩndanamo yʼAbayũda.

¹¹ Nĩkwa abandu bʼeBeroya babya bandu babuya kwilaba bandu bʼeTesalonĩka. Mobangirira ekĩnywa kya Nyamuhanga nʼomũhwa, ĩbakasondaya omo Masako obuli kiro erĩrebya emyatsi eyĩ nga ni kwenene.

¹² Neryo abangi ba kubo mobĩkĩrĩrya, abakalĩ bʼAbagĩrĩkĩ abasĩkĩbwe nʼabalume bʼAbagĩrĩkĩ.

¹³ Nĩkwa Abayũda bʼeTesalonĩka babere bowa ko Paũlo mwatũlaganĩa ebĩnywa bya Nyamuhanga eBeroya, mobayayo, mobatsotsererya nʼerĩkola-kolya esyondeko.

¹⁴ Neryo abalĩkyetu mobatuma Paũlo yo lũba eriya oko ngetsi, nĩkwa Sila na Tĩmoteo mobasĩgala eBeroya.

¹⁵ Nĩkwa bandu abatwala Paũlo, mobamũkolya eAtene. Neryo mobasuba eBeroya; Paũlo abere abilayira ati Sila na Tĩmoteo bamũhĩkeko lũbalũba.

Paũlo eAtene

¹⁶ Neryo omugulu Paũlo abya akalinda Sila na Tĩmoteo, ekĩrĩmũ kiwe mokyabya nʼobũlĩge, kusangwa alangira omũyĩ wʼeAtene ĩnĩoswĩre mwʼesyosanamu.

¹⁷ Neryo mwabya akakanĩrya omo nyũmba yʼerĩhĩndanamo haguma nʼAbayũda nʼabandu bʼEbihanda ababya bakubaha Nyamuhanga, kandi mwaya ekatale obuli kiro akakanĩranĩa nʼabandu ababyaho.

¹⁸ Kandi abandi bʼamenge ba Epĩkũrĩo na Bastoĩko mobakanĩa na Paũlo. Abandi ba kubo bati Omũbũyĩ wʼebingi oyũ, akasonda erĩbũgakĩ kwehĩ? Abandi bati, Ni mundu wʼerĩtũla emyatsi yʼesyonyamuhanga syʼehandi, kusangwa Paũlo abya akatũla omwatsi wa Yesu nʼerĩlũbũka oko baholĩ.

¹⁹ Neryo mobatwala Paũlo oko Areopago bati, Twanzĩre eriminya erĩkangĩrĩrya lihya-lihya eryo ũkakangĩrĩraya nga ni ryahi.

²⁰ Emyatsi eyo tũkowa ũkabũga ni yʼehandi eyo tũtasĩ, neryo twanzĩre eriminya omũsĩndo wayo,

²¹ Kusangwa Abanya Atene nʼabʼehandi ababya bakabungiraho, mobasiba omugulu gosĩ bakabũga kutse bakowa emyatsi mihya-mihya misa-misa.

²² Neryo Paũlo mwahangana omo katĩkatĩ kʼeAreopago, mwabũga ati, Inywe balume bʼeAtene! Ngalebaya ko muli bandu bʼekisomo kutsibu omo myatsi yosĩ.

²³ Kusangwa nabere ngalaba omo mũyĩ wenyũ, inyinemũlebya ebindu ebyo mũkaramaya, moneya ekiherero ekĩsakĩrweko kiti, Uku Nyamuhanga oyũtasĩbwe. Neryo oyo mũkaramaya ĩsĩmũmwasĩ, yo nʼoyo ngabatũlaganaya.

²⁴ Nyamuhanga oyo wahangika ekihugo, nʼebindu byosĩ birimo, iye ni Mukama wʼolubula nʼekihugo, sĩalĩkala omo syohekalũ esĩkahĩmbawa omo byala byʼabandu.

²⁵ Kandi syalikolerawa nʼebyala byʼabandu, ngʼali nʼobwaga bwʼekindu, kusangwa akaha engebe nʼomuka nʼebindu byosĩ oko bandu bosĩ.

²⁶ Kandi omo mundu muguma mwahangika ebihanda byosĩ byʼabandu erĩĩkala omo kihugo ehosĩ. Kandi mwasoha emigulu yabo, nʼemitano yʼobwĩkalo bwabo.

²⁷ Akola atya ati, kumbe bangasonda-sonda Nyamuhanga, ati mbino bangamumata-mata nʼerimubana, nĩkwa Nyamuhanga syali hali ũkwʼĩtwe oko buli mundu.

²⁸ Kusangwa bakabũga bati: ‘Eriwatana naye tuliho, kandi tukalendera, ituneho.’ Ngʼabandi basakĩ benyũ bʼesyonyimbo balĩbĩrĩbũga bati, ‘Netu tuli bana buwe nibya.’

²⁹ Neryo twamabya tuli bana ba Nyamuhanga, siritolere tũkaganĩrya tuti Nyamuhanga ali ngʼesyosanamu syʼesyamagetsi, kutse syʼekĩtsĩpa, kutse syʼerĩbwe esikabumbawa omo menge nʼobũlengekanĩa bwʼabandu.

³⁰ Nyamuhanga abĩrĩkĩrũkya ameso oko migulu eyo bandu bataminya, nĩkwa lino akahana bandu bosĩ, ehosĩ, bangabindula emitima yabo erireka ebibi.

³¹ Kusangwa Nyamuhanga abĩrĩhĩra ekiro ekyo asyatswera ekihugo omo litunganene omo Mundu oyo abiriyisoga, ĩnĩakamĩnyĩsayakyo oko bandu bosĩ ĩnĩakalũbũkaya Omundu oyo yʼoko baholĩ!

³² Neryo babere bowa omwatsi wʼerĩlũbũka oko baholĩ, abandi mobanegula, nĩkwa abandi bati, Twasyaswakowa omo mwatsi oyũ.

³³ Nĩkwa Paũlo mwalũa omo katĩkatĩ kabo.

³⁴ Nĩkwa abandi bandu mobayitomeka uku Paũlo mobĩkĩrĩrya. Dĩonĩsĩo Omũareopago abya muguma wa kubo, nʼomũkalĩ erĩna liwe iyo Damarĩa, nʼabandi haguma nabo.