Emibiri 15 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩhĩndana lyʼekanĩsa eYerũsalema

¹ Neryo abandi bandu mobandagalira eAntĩokĩa bakalũa eYũdea, Ĩbakakangĩrĩraya abalĩkyetu bati, Mwamatendĩbanĩbwa ngʼemitsye ya Musa, isimwangatoka erĩlamĩbwa.

² Nĩkwa Paũlo na Barnaba mobagabana nabo nʼerikuba obuhaka nabo busana nʼomwatsi oyũ. Neryo abalĩkyetu mobatwa omwatsi bati, Paũlo na Barnaba nʼabandi ba kubo baye eYerũsalema oko bakwenda nʼabakulu busana nʼomwatsi oyũ.

³ Neryo ekanĩsa moyatumabo, kandi mobalaba eFoĩnĩkĩ nʼeSamarĩa, ĩbanemũkanĩryabo ndeke erilama lyʼEbihanda. Neryo omwatsi oyũ mwatsemesya abalĩkyetu bosĩ bo kutsibu.

⁴ Neryo babere bahĩka eYerũsalema mobakokĩbwa nʼekanĩsa nʼabakwenda nʼabakulu, kandi mobakanĩryabo ebyosĩ ebyo Nyamuhanga abirikola haguma nabo.

⁵ Nĩkwa abandi bʼekihanda kyʼAbafarĩsayo abakĩkĩrĩraya, mobahangana bati, Litolere ĩbabanĩbwa, kandi litolere ibahanabo bati bakwame Emigambo ya Musa.

⁶ Neryo abakwenda nʼabakulu mobahĩndana erĩkanĩa omwatsi oyũ.

⁷ Neryo enyũma wʼerĩkanĩa lĩnene, Petero mwahangana, mwabwirabo ati, Balĩkyetu mũnasĩ ngoko Nyamuhanga mwayisoga ngye omo katĩkatĩ kenyũ oko biro byʼerĩmbere, ati nyĩkangĩrĩraye ekĩnywa kyʼEngulu Yowene oko Bihanda, batoke erĩowa nʼerĩkĩrĩrya.

⁸ Neryo Nyamuhanga, oyo wasĩ emitima yʼabandu, mwalĩga Ebihanda iniakahabo Omũlĩmũ Abũyĩrĩre ngoko atuhago.

⁹ Kandi Nyamuhanga mwatalebyandi nandi omo katĩkatĩ ketu nabo, ĩnĩakeraya emitima yabo kwʼebibi, kusangwa bĩkĩrĩraya.

¹⁰ Neryo lino busana nakĩ mukalenga uku Nyamuhanga muti mũkahĩra emiheke oko migongo yʼabiga, eyo aboso-kulu kutse ĩtwe batatoka eriheka kwehĩ?

¹¹ Nĩkwa ĩtwe tũkĩkĩrĩraya tuti tũkalamĩbawa omo lukogo lwʼOmukama Yesu, ngoko nabo bakalamĩbawa.

¹² Neryo endeko yosĩ moyabya bũkũtũ omugulu bowa Barnaba na Paũlo bakakanĩa busana nʼebitiko-tiko nʼebyʼeriswekera ebyo Nyamuhanga ahabo erikola omo katĩkatĩ kʼEbihanda.

¹³ Neryo babe re babuga erĩbũga, Yakobo mwasũbĩrya ati, Balĩkyetu, munyihulikirire!

¹⁴ Sĩmeonĩ abĩrĩbakanĩrya ngoko Nyamuhanga atsũka erĩkangya olwanzo luwe busana nʼEbihanda, eriyisoga omo katĩkatĩ kabo abandu busana nʼerĩna liwe.

¹⁵ Kandi ebĩnywa byʼabamĩnyererĩ byamalĩga omwatsi oyũ. Amasako akabũga ati,

¹⁶ Enyũma wʼemyatsi eyĩ nasyasubula, Omukama atya, Kandi nasyaswahĩmba enyũmba ya Dawĩdĩ eyatera, Nasyaswahĩmba ahasambukala, Kandi nasyaswahanganĩayo.

¹⁷ Litya abandi bandu bosĩ basondaso-ndaye Omukama, NʼEbihanda byosĩ ebikahulawa omo lĩna lyage.

¹⁸ Omukama atya, oyũkamĩnyĩsaya emyatsi eyĩ erĩtsũka kera.

¹⁹ Neryo Yakabo ati, Ĩngye nangatwago nyiti, Sĩtwendereraye abʼEbihanda abakabindukira Nyamuhanga.

²⁰ Nĩkwa tusakirebo tuti, baleke ebyalya ebĩtsandĩre kusangwa bikaherawa oko syosanamu, kandi baleke erĩsĩngĩra, kandi baleke erirya esyonyama esyabĩrĩnĩgwa, kandi baleke, erirya omusasi.

²¹ Kusangwa Emigambo ya Musa yabirisomwa biro bingi erĩtsũka kera omo manyũmba wʼerĩhĩndanamo oko buli Sabato, nʼebĩnywa biwe bĩkatũlawa omo buli mũyĩ.

Ebarua eyatumawa oko bĩkĩrĩrye bʼEbihanda

²² Neryo abakwenda nʼabakulu, haguma nʼekanĩsa yosĩ mobanza eriyisoga abandu omo katĩkatĩ kabo eritumabo eAntĩokĩa haguma na Paũlo na Barnaba. Mobayisoga Yũda oyukahulawa mo Barĩsaba, na Sila, abasondolĩ omo katĩkatĩ kʼabalĩkyetu.

²³ Neryo mobatuma ebarua eyĩ nabo, bati, Ĩtwe bakwenda, nʼabalĩkyetu abakulu, tukabasakira ĩnywe balĩkyetu bʼEbihanda abali eAntĩokĩa, nʼeSũrĩa, nʼeKĩlĩkĩa, Obuholo ũkwʼĩnywe.

²⁴ Twamowa ambu abandi bʼoko wetu babiribahahũkya omo bĩnywa byabo, nʼeriganga-gangya emitima yenyũ. Ĩtwe sitwetabwirabo tutya.

²⁵ Neryo twamabĩhĩndana haguma nʼo­mutima muguma, motwanza eriyisoga bandu nʼeritumabo ũkwʼĩnywe. Tukatumabo haguma nʼabanze betu Barnaba na Paũlo,

²⁶ ababiriyisiga busana nʼerĩna lyʼomukama wetu Yesu Kristo.

²⁷ Kandi twabirituma Yũda na Sila, nabo ĩbobene basyabatũlĩra emyatsi eyĩ omo bĩnywa byabo.

²⁸ Kusangwa Omũlĩmũ Abũyĩrĩre, netu, twamalĩga tuti sĩtwangabahĩra kwʼemiheke eyĩlabĩre emyatsi eyitolere eyĩ:

²⁹ tuti, muleke ebyalya ebĩtsandĩre kusangwa bikaherawa oko syosanamu; kandi muleke erirya omusasi; erirya enyama eyabĩrĩnĩgwa; kandi muleke erĩsĩngĩra. Mwamayĩteya oko myatsi eyĩ, mwasyakola ndeke. Mubye nʼobuholo.

³⁰ Neryo abatumawa mobandagalira eAntĩokĩa. Neryo mobahĩndanĩa endeko yʼekanĩsa, mobahabo ebarua eyo.

³¹ Neryo abandu babere babisoma ebarua eyo, mobatsema busana nʼebĩnywa byʼerĩsĩkyabo.

³² Neryo Yũda na Sila, ababya bamĩnyererĩ nibya, mobahamĩrya abalĩkyetu, nʼerĩsĩkyabo omo bĩnywa bingi.

³³ Neryo babere babisibayo ebindi biro, abalĩkyetu mobakwamanĩsyabo nʼobuholo, neryo mobasuba oko batumabo. [

³⁴ Nĩkwa Sila mwanza erĩsĩgala eAntĩokĩa.]

³⁵ Nĩkwa Paũlo na Barnaba mobasĩgala eAntĩokĩa. Neryo haguma nʼabandi bangi mobakangĩrĩrya, nʼerĩtũla ekĩnywa kyʼomukama.

Paũlo na Barnaba bakagabana

³⁶ Neryo enyũma wʼebindi biro, Paũlo mwabwira Barnaba ati, Tusubule tuyabane abalĩkyetu abali omo mĩyĩ eyo twakangĩrĩraya ekĩnywa kyʼomukama, tũlebaye ngoko babere.

³⁷ Neryo Barnaba mwanza erigenda haguma na Yoane Marĩko.

³⁸ Nĩkwa Paũlo mwagana, ati sibagende nʼoyo watswa kubo ePamfĩlĩa, oyutagenda haguma nabo oko mũbĩrĩ.

³⁹ Neryo mobakũbĩsananĩa obuhaka omo katĩkatĩ kabo, kyaleka ibagabana. Neryo Barnaba mwagenda haguma na Marĩko mobasokera eKĩpũro omo bwato.

⁴⁰ Nĩkwa Paũlo mwayisoga Sila, neryo mobahongoka, abalĩkyetu ĩbamabĩhĩrabo oko lukogo lwʼOmukama.

⁴¹ Neryo Paũlo mwalaba eSũrĩa nʼeKĩlĩkĩa, ĩnĩakahamĩraya esyokanĩsa.