Emibiri 13 - AMASAKO ABOYTRTRE WA NYAMUHANGA AWAKAHULAWA MO BIBLIA

Bakayisoga Barnaba na Saũlo nʼeritumabo

¹ Nĩkwa eAntĩokĩa yabya abamĩnyererĩ nʼabakangĩrĩrya omo kanĩsa eyabyayo. Ye Barnaba, na Sĩmeonĩ oyukahulawa mo Mwĩragũlũ, na Lũkĩo wʼeKũrene, na Manaenĩ oyo walemberawa haguma nʼomwami Herode, na Saũlo.

² Neryo omugulu babya bakakolera Omukama nʼeritsira akalyo, Omũlĩmũ Abũyĩrĩre mwabũga ati, Munyisombolere Barnaba na Saũlo busana nʼomũbĩrĩ ogo nabirikirirabo.

³ Neryo babere batsira akalyo nʼerisaba, mobahĩra kubo kwʼebyala, mobatumabo.

EKĩpũro

⁴ Neryo Omũlĩmũ Abũyĩrĩre abere abituma Barnaba na Saũlo, mobandagalira eSeleũkĩa, nʼerĩlũa eyo mobaya omo bwato oko kitsira kyʼeKĩpũro.

⁵ Neryo babere bahĩka eSalamĩ, mobatũla ekĩnywa kya Nyamuhanga omo manyũmba wʼerĩhĩndanamo wʼAbayũda. Kandi Yoane Marĩko abya mũwatĩkya wabo oko mũbĩrĩ.

⁶ Neryo babere babirendera omo kitsira ekyo kyʼeKĩpũro kyosĩ erĩhĩka ePafo, mobahĩndana nʼomũkũmũ muguma, omũmĩnyererĩ wʼamabehĩ wʼAbayũda, erĩna liwe Bara-Yesu.

⁷ Omũkũmũ oyo abya haguma nʼomũtabalĩ Sergĩo Paũlo, omundu wʼamenge. Nĩkwa Sergĩo Paũlo oyo mwabirikira Barnaba na Saũlo iniakasonda erĩowa ekĩnywa kya Nyamuhanga.

⁸ Nĩkwa omũkũmũ Elema (erĩna liwe omo Kĩgĩrĩkĩ lyabya litya) mwalwa nabo, iniakasonda eribindula omũtabalĩ oyo syĩkĩrĩraye.

⁹ Nĩkwa Saũlo, oyo wahulawa mo Paũlo, ĩnĩoswĩre nʼOmũlĩmũ Abũyĩrĩre, mwatungerera Elema,

¹⁰ nʼerimubwira ati, Uwe, goswĩre mwʼeriteba lyosĩ nʼobũlĩbalĩbanĩa, uwe mugala wʼeSatanĩ, uwe nzĩgũ yʼebitunganene byosĩ! Sĩwendĩsyũmbya erĩhengemya esyonzira situnganene syʼOmukama kwehĩ?

¹¹ Na lino lebaya! ebyala byʼomukama bikalwa nawe, Ukandibya ndĩmatĩme isiwendisyalangira ekyakakala oko katambĩ. Neryoneryo ekihohe nʼomwĩrĩmya mobyamubyako, neryo Elema mwalendera akamatamata oyo wangamuwatako oko byala erimusondola.

¹² Neryo omũtabalĩ oyo mwĩkĩrĩrya, abere alangira ebyakolawa. Kandi mwasweka busana nʼerĩkangĩrĩrya lyʼomukama.

Paũlo na Barnaba bakahĩka eAntĩokĩa yʼePĩsĩdĩa

¹³ Nĩkwa Paũlo nʼabalĩkyabo mobalũa ePafo omo bwato mobahĩka ePerga omo kihugo kyʼePamfĩlĩa, nĩkwa Yoane Marĩko mwasĩgabo mwasuba eYerũsalema.

¹⁴ Kandi mobalũa ePerga mobaya eAntĩokĩa yʼePĩsĩdĩa. Neryo oko kiro kyʼeSabato mobaya omo nyũmba yʼerĩhĩndanamo, mobĩkala.

¹⁵ Neryo enyũma wʼerisoma omo Migambo ya Musa, nʼamasako wʼabamĩnyererĩ, abakulu bʼenyũmba yʼerĩhĩndanamo mobatuma uku Paũlo na Barnaba bati, Balĩkyetu, mwamabya muwite ekĩnywa kyʼerihana bandu, mũbũgekyo.

¹⁶ Neryo Paũlo mwahangana, mwakoheryabo omo byala ati, Ĩnywe balume ba Ĩsraelĩ, ĩnywe mukakenga Nyamuhanga, muhulikirire!

¹⁷ Nyamuhanga wʼabandu ba Ĩsraelĩ, mwayisoga abotata-kulu wetu, mwayirabo mo bandu bakulu omugulu babya babunga omo kihugo kyʼeMĩsĩrĩ, omo maka wuwe manene.

¹⁸ Neryo omo myaka makũmĩ ani mwalemberabo omo mbwarara.

¹⁹ Neryo Nyamuhanga abere abĩherya ebihanda birinda omo kihugo kyʼeKanana, neryo mwaha Ĩsraelĩ ebitaka byabo omo myaka magana ani nʼamakũmĩ atanu.

²⁰ Kandi enyũma wʼemyatsi eyĩ, mwahabo abatswerĩ erĩhĩka oko mũmĩnyererĩ Samwelĩ.

²¹ Neryo mobabũlya bati bahabawe omwami, neryo Nyamuhanga mwahabo Saũlo omugala wa Kĩsĩ, omundu wʼekihanda kya Benyamĩna eribya mwami wabo emyaka makũmĩ ani.

²² Neryo abere abĩmũlũsyaho, Nyamuhanga mwayira Dawĩdĩ mo mwami wabo. Kandi Nyamuhanga mwabũga busana na Dawĩdĩ ati, Nabiribana Dawĩdĩ mugala wa Yese mo mundu oyo nyanzĩre, oyo wasyakola erisonda lyage lyosĩ.

²³ Neryo ni Yesu wʼoko lubuto lwa Dawĩdĩ, oyo Nyamuhanga aha oko Baĩsraelĩ eribya Mũlamya, ngoko alagabo.

²⁴ Embere wʼerĩhĩka lya Yesu, Yoane mwatũla omwatsi oko bandu ba Ĩsraelĩ bosĩ, ati babindule emitima yabo erireka ebibi, babatĩsĩbawe.

²⁵ Neryo Yoane abere asonda eribuga omũbĩrĩ wuwe, mwabũlya bandu ati, Mũkaganĩraya muti Ĩngyendi kwehĩ? Ĩngye Sindi oyo mũlĩndĩrĩre. Nĩkwa mũlebaye! Oyukasa enyũma kwĩngye, sinyitolere erĩkũndũla esyongendero syʼebisando biwe.

²⁶ Balĩkyetu, abana bʼekĩtũnga kya Abrahamũ, nenyũ abandi mukakenga Nyamuhanga, engulu eyĩ yʼerĩlamya yabiritumwa ũkwʼĩtwe.

²⁷ Kusangwa bandu abĩkere eYerũsalema, nʼabatabalĩ babo, mobataminya Yesu, kutse ebĩnywa byʼabamĩnyererĩ ebikasomawa obuli kiro kyʼeSabato. Nĩkwa mobaberererya Amasako ibakatswera Yesu yo lubi.

²⁸ Kandi nomo banabula ekyangamwĩtĩsya, mobabũlya Pilato bati, Ĩtawe.

²⁹ Neryo babere babĩberererya ebyosĩ ebyasakawa busana naye, mobamubambula oko musalaba, mobamũhĩra omwʼisinda.

³⁰ Nĩkwa Nyamuhanga mwamũlũbũkya oko baholĩ.

³¹ Neryo oko biro bingi mwabutukira abandu abasa naye eYerũsalema bakalũa eGalĩlaya. Nabo nĩ balangĩrĩ buwe lino oko bandu.

^32-33 Netu tũkabatũlĩra Engulu Yowene eyo Nyamuhanga alaga abotata-kulu wetu. Lino Nyamuhanga abĩrĩberererya erilaga erĩ ũkwʼĩtwe bana babo, ĩnĩakalũbũkaya Yesu omo ngebe. Ngoko kĩsakĩre omo Lwimbo lwʼakabiri kiti, Uli Mugala wage, Namakubuta mũnabwĩre.

³⁴ Kandi Nyamuhanga mwahula erĩmũlũbũkya oko baholĩ, Eritindasuba okwʼihonda ati, Nasyabaha omũyĩsa abũyĩrĩre nʼowʼekwenene Ogo nalaga Dawĩdĩ.

³⁵ Kandi akabũga omo lundi Lwimbo ati, Sĩwendĩsyalĩga Omũbũyĩrĩre wawe akalola okwʼihonda.

³⁶ Kusangwa Dawĩdĩ mwakola erisonda lya Nyamuhanga oko mugulu wuwe, neryo mwahola, neryo mwatabwa hakũhĩ nʼaboso-kulu wuwe, neryo mwahonda.

³⁷ Nĩkwa oyo Nyamuhanga alũbũkaya oko baholĩ mwatahonda.

^38-39 Neryo balĩkyetu, muminye ndeke ngoko busana na Yesu, omwatsi wʼeribuyirwa lyʼebibi akatũlawa ũkwʼĩnywe. Kandi muminye ngoko buli mundu Oyũkĩkĩrĩraya Yesu akaboholawa kwʼebibi byosĩ ebyo Migambo ya Musa itetoka eribabohola.

⁴⁰ Neryo mũtegaye omwatsi ogo abamĩnyererĩ bahula akasyabahĩkako, bati,

⁴¹ Mũlebaye ĩnywe basũnatĩ! Musweke, muhole! Kusangwa omũbĩrĩ ngakola oko biro byenyu Nĩ mũbĩrĩ mũtendĩsyĩkĩrĩrya na kera, Nomo mundu angabakanĩryago!

⁴² Neryo Paũlo na Barnaba babere bakalũa omo nyũmba yʼerĩhĩndanamo, abandu mobahatikanabo bati babwirawe kandi emyatsi eyĩ oko yindi Sabato.

⁴³ Neryo abandu babere babĩlũa okwʼĩhĩndana omo nyũmba yʼerĩhĩndanamo Abayũda bangi nʼabandu bʼEbihanda ababinduka eribya Bayũda, mobakwama Paũlo na Barnaba. Neryo abakwenda mobakanĩa nabo nʼerihatikanabo erikwamirira olukogo lwa Nyamuhanga.

⁴⁴ Nʼoko Sabato yʼakabiri hakũhĩ nʼabandu bosĩ bʼomũyĩ mobahĩndana erĩowa ekĩnywa kya Nyamuhanga.

⁴⁵ Nĩkwa omugulu Abayũda balangira esyondeko, mobũsũla nʼobũha, mobatsũka erĩyĩhanangya bakagana ebĩnywa Paũlo abũga, kandi mobamutsuma.

⁴⁶ Nĩkwa Paũlo na Barnaba mobabũga nʼeritendiubaha bati, Lyabya litolere ekĩnywa kya Nyamuhanga ĩkyatsũka erĩbũgwa ũkwʼĩnywe. Nĩkwa kusangwa mukaganakyo, kandi mũkaganĩraya muti Simutolere engebe yʼerikota, lebaya, tukandibaleka, itwaya oko Bihanda.

⁴⁷ Kusangwa Omukama abirituhana ati, Nabĩrĩkũhĩra eribya kyakakala kyʼEbihanda, Imwaleta omulamo oko kihugo kyosĩ.

⁴⁸ Ebihanda byabere byowa ebĩ, mobatsema nʼeripipa ekĩnywa kyʼomukama, nʼabosĩ abayisogawa busana nʼengebe yʼerikota, mobĩkĩrĩrya.

⁴⁹ Kandi ekĩnywa kyʼomukama mokyapanzikanira omo kihugo kyosĩ ekyo.

⁵⁰ Nĩkwa Abayũda mobalwĩsĩsanĩa abakalĩ bʼekisomo abakakengawa, nʼabalume bakulu bʼomũyĩ. Neryo mobatsũka erĩendererya Paũlo na Barnaba, mobahigabo, erĩlũsyabo omo kihugo kyabo.

⁵¹ Nĩkwa abakwenda mobakungutira kubo kwʼolũtũtũ lwʼebisando byabo, neryo mobaya eĨkonĩo.

⁵² Kandi abiga bʼeAntĩokĩa mobũsũla nʼobutseme nʼOmũlĩmũ Abũyĩrĩre omugulu gosĩ.