Emibiri 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Uwe Tahi Teofilo

¹ Omo kitabu kyage kyʼerĩmbere monakusakira emyatsi yosĩ eyo Yesu akola nʼerĩkangĩrĩrya, erĩtsũka ekiro ahasa omũbĩrĩ,

² nʼerĩhĩka oko kiro atwalawa endata elubula. Nĩkwa embere wʼeritwalwa liwe endata, mwahana abakwenda abo ayisoga eribya buwe, omo bũtokĩ bwʼOmũlĩmũ Abũyĩrĩre.

³ Omo biro makũmĩ ani enyũma wʼobuligo buwe, Yesu mwayĩkangya kubo esyongendo nyingi kwʼaneho, omo bĩmĩnyĩsyo bingi byʼekwenene. Kandi mwabutukira kubo, iniakabwirabo emyatsi yʼobwami bwa Nyamuhanga.

⁴ Neryo abakwenda babere babĩhĩndana, Yesu mwahanabo ati, Sĩmũlũe eYerũsalema, nĩkwa mulinde oyo Tata wage alaga, yo nʼoyo nabagambulira.

⁵ Kusangwa Yoane mwabatĩsya omo magetsi, nĩkwa ĩnywe mwasyabatĩsĩbwa omo Mũlĩmũ Abũyĩrĩre hate hakya biro bingi.

Yesu akatwalawa endata elubula

⁶ Neryo abakwenda babere bahĩndana haguma, mobabũlya Yesu bati, Mukama, ũkandĩsũbya obwami uku Ĩsraelĩ mangahano kwehĩ?

⁷ Yesu mwabwirabo ati, Tata abiritegeka emigulu nʼebirimo omo hamũlĩ yiwe ĩyowene. Kandi si mwatsi wenyũ eriminyabyo.

⁸ Nĩkwa mwasyabana obũtokĩ omugu­lu Omũlĩmũ Abũyĩrĩre asyabahĩkako. Kandi mwasyabya batũlĩ bʼomwatsi wage eYerũsalema nʼomo Yũdea yosĩ, nʼeSamarĩa, nʼerĩhĩka oko ndũlĩ-ndũlĩ syʼekihugo.

⁹ Neryo abere abĩbũga emyatsi eyĩ, Yesu mwasumbirwa endata ibanatungerere, nʼekĩtũ mokyamwĩmya erĩlũa oko meso wabo.

¹⁰ Nĩkwa babere banemulalamira omo kyanya akagenda, neryo lebaya, abandu babiri abʼesyongimba nyeru-nyeru, mobahangana hakũhĩ nabo,

¹¹ bati, Ĩnywe balume bʼeGalĩlaya, busana nakĩ mukahangana aho mukasamalira omo kyanya kwehĩ? Yesu oyukabitwalwa elubula akalũa ũkwʼĩnywe, asyaswasa atya ngoko mukabimusamalira akaya elubula.

Oyukasuba omo mwanya wa Yũda

¹² Neryo mobasuba eYerũsalema bakalũa oko kitwa ekikahulawa mo Zeĩtũnĩ, ekiri hakũhĩ nʼeYerũsalema ngʼekilometre kiguma.

¹³ Neryo babere bahĩka eYerũsalema, mobahetukira endata omo kyumba kyʼenyũmba aho babya bĩkere. Nabo babya Petero, na Yoane, na Yakobo, na Anderea, Fĩlĩpo na Toma, Bartolomayo, na Matayo, Yakobo mugala wa Alfayo, na Sĩmonĩ-Zelote, na Yũda mugala wa Yakobo.

¹⁴ Abosĩ abo mobahĩndana okwʼisaba emigulu yosĩ, haguma nʼabakalĩ, na Marĩa nyĩnya wa Yesu, nʼabagala babo Yesu.

¹⁵ Oko mugulu oyo, Petero mwahangana omwʼĩhĩndana lyʼabalĩkyetu, abandu ngʼerĩgana liguma nʼamakũmĩ abiri. Neryo mwabũga ati,

¹⁶ Balĩkyetu, Amasako abya atolere eribererera ago Mũlĩmũ Abũyĩrĩre aminyerera omo buno bwa Dawĩdĩ busana na Yũda, oyo wabya mũsondolĩ wʼabatsimba Yesu.

¹⁷ Yũda oyũ aganzawa haguma netu, kandi mwasangira netu omo mũbĩrĩ oyo.

¹⁸ (Nĩkwa Yũda oyo, mwagula ekitaka omo bũgũlĩ bwʼebibi biwe; nʼaho mwatoga nʼomutwe wuwe mwatsũka ahisi, kandi mwatulika omo katĩkatĩ nʼebila biwe mobyasandukala.

¹⁹ Kandi abandu bosĩ ababya bĩkere eYerũsalema mobaminya omwatsi oyo; kyaleka ekitaka ekyo ikyahulwa omo mũbũge wabo mo Hakeldama, kiti, Ekitaka kyʼomusasi.)

²⁰ Kusangwa kĩsakĩre omo kitabu kyʼesyonyimbo kiti, Enyũmba yiwe ibye kĩhũma, Sĩyĩsyesyĩkala mo mundu; kandi, Nʼomwanya wʼomũbĩrĩ wuwe, ogundi mundu ĩmayego.

^21-22 Neryo hatolere omundu muguma oyo wabya netu, busana nʼerĩtũla omwatsi wʼerĩlũbũka lyʼomukama Yesu. Atolere iniabya mundu oyo wabirisiba haguma netu emigulu yosĩ eyo Mukama Yesu alendera haguma netu, erĩtsũka okwʼĩbatĩsya lya Yoane nʼerĩhĩka oko kiro Yesu atwalawa endata akalũa ũkwʼĩtwe.

²³ Neryo mobahĩra embere syabo abandu babiri, ye Yosefũ oyukahulawa mo Barĩsaba, oyo wahulawa mo Yũsto, na Matĩa.

²⁴ Neryo mobasaba bati, Uwe, Mukama, ũnasĩ emitima yʼabandu bosĩ. Neryo Mukama, Ũkanganaye oko babiri aba, oyo wamayisoga,

²⁵ erĩĩmya omwanya wʼomũbĩrĩ nʼowʼobukwenda ogo Yũda asĩga akakitira ehandi eriya aho wuwe.

²⁶ Neryo mobakola obukanga busana nabo, nʼekura moyatogera uku Matĩa; neryo Matĩa mwaganzirwa oko bakwenda erĩkũmĩ nʼomuguma.