Ekiriro 5 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Uwe Mwami Mukulu, Wibuke ekyabĩrĩtũhĩkako. Ũlebaye, ulangire erihemulwa lyetu!

² Omwandu wetu abirihabwa abʼehandi, Amanyũmba wetu oko bʼehali.

³ Tuli ngũbĩ nʼabatawite abĩse wabo, Abokoyo wetu bali ngʼabakwakalĩ.

⁴ Amagetsi tũkapũlaya tukagulago oko bũgũlĩ, Nʼesyongwĩ tukota tukagulasyo.

⁵ Abakatukwama bali oko bĩkya byetu. Tũlũhĩre, sitwebana eriluhuka.

⁶ Twabiriwa embere syʼAbanya Mĩsĩrĩ, nʼAbasũrĩa, Busana nʼeribana akalyo katolere.

⁷ Abotata wetu mobahalya, nabo sibakiriho. Netu twabiriheka obubi bwabo.

⁸ Abakobe bakatutabalako. Sihali oyũkatũlamaya omo byala byabo.

⁹ Tukabana akalyo ketu omwʼĩtĩsya engebe yetu, Busana nʼomũyalĩ wʼembwarara.

¹⁰ Esyongoba syetu sĩkĩnĩre ngʼerĩko, Busana nʼerĩhũhana lyʼenzala lĩkahĩsaya.

¹¹ Mobatsandya abakalĩ eSĩonĩ, Nʼabambesa omo mĩyĩ yʼeYũda.

¹² Abanya-mwami mobahanikwa omo byala byabo. Mobatakenga abakulu.

¹³ Abalwana mobakola oko luso, Nʼabalwana mobatwĩkala eriheka esyongwĩ.

¹⁴ Abakulu babĩrĩũmbya omo syongyo, Abalwana babĩrĩũmbya okwʼitsanga lyʼenzenze.

¹⁵ Obutseme bwʼemitima yetu bwabĩrĩũmbya. Erisata lyetu lyabiribinduka mo kiriro.

¹⁶ Embĩta yabiritoga erĩlũa oko mutwe wetu. Obũlĩge kwĩtwe, kusangwa twabĩrĩhalya.

¹⁷ Busana nʼekĩ, emitima yetu eyĩ yabirirembera, Busana nʼemyatsi eyĩ ameso wetu abĩrĩhũma.

¹⁸ Busana nʼekitwa kyʼeSĩonĩ ekyabiribya kĩma, Esyoboha sikalendera mukyo.

¹⁹ Uwe Mwami Mukulu, ukatabala kera na kera Ekĩtũmbĩ kyawe kyʼobwami ni kyʼesyondengo nʼesyondengo.

²⁰ Busana nakĩ ukatwibirirawa ebiro byosĩ, Busana nakĩ ũkatũsĩganaya omugulu muli gungaha kwehĩ?

²¹ Uwe Mwami Mukulu, ũtũsũbaye ukʼuwe, netu itwatoka erisubula, Uyire ebĩro byetu mo bihya-bihya ngʼebya kera.

²² Kutse uwe wabiritugana ndeke kwehĩ? Kutse Wabirituhitanako kutsibu kwehĩ?