Ekiriro 4 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Esyamagetsi syamakĩna siti! Nʼesyamagetsi esĩkangĩre Syamahinduka siti! Amabwe awabũyĩrĩre amũtwa Oko ndũlĩ yʼobuli nzira.

² Abagala ba Sĩonĩ abʼobũgũlĩ bunene, Bali ngʼesyamagetsi nyibuya. Bakaganzawa ngʼesyonyungu syʼeribumba, Omũbĩrĩ wʼebyala byʼomũbũmbĩ!

³ Esyoboha sĩkalasaya emisonga, Sĩkongaya ehyana hyasyo. Omwali wʼabandu bage abiribya mutsibu, Ngʼembũnĩ yʼomwʼirungu.

⁴ Olulimi lwʼabana bakonga Lukamatana nʼebĩtĩnĩnĩ busana nʼenyota. Abana balere bakasaba akalyo, Isihali mundu ukahabo.

⁵ Abakalya ndeke-ndeke ebisi-bisi Babiribya ngabulya-nandi omo nzira. Abakũlĩbawa omo ngimba syʼomunyama Bakasiba oko kyabũ.

⁶ Kusangwa obubi bwa mwali wʼabandu bage Ni bunene kwilaba obubi bwʼeSodomo. Owagusawa omo katambĩ kaguma Isihali oyukamulira.

⁷ Abandu abahigulawa bako babya babuya kwilaba enzururu. Babya beru kwilaba amasabũ. Babya bahenĩrye oko mubiri ndeke kwilaba amarĩjanĩ, Nʼeritendera lyabo lyabya lĩsosĩre safĩro.

⁸ Erisosa lyabo nĩ bĩragũlũ kwilaba amakala. Sibeminyikala omo nzira. Esyongoba syabo simatene nʼamakũha wabo. Syabiriuma, syabiribya ngʼemiti.

⁹ Abakĩtawa nʼomũyalĩ ni babuya Kwilaba abakĩtawa nʼenzala. Kusangwa aba bakabulirayo, Bakabonda eribula akalyo kʼeririma.

¹⁰ Ebyala byʼabakalĩ bʼeriganyira Bakahũka abana babo. Bo babya kalyo kabo Busana nʼerihera lyʼomwali wʼabandu bage.

¹¹ Omwami Mukulu amaberererya erihitana liwe, Abĩrĩũta eryagalirwa liwe lĩkalĩre. Naye abĩrĩakya omuliro omo Sĩonĩ, Owakalya ebibanza byako.

¹² Abami bʼekihugo mobatĩkĩrĩrya, Kutse esyondũlanĩ syosĩ syʼekihugo, Ngʼobũyĩgũ nʼenzĩgũ Bangatoka eriingira omo lũkyo lwʼeYerũsalema.

¹³ Ni busana nʼebibi byʼabamĩnyererĩ bako, Nʼamalolo wʼabahererĩ bako. Abũta omusasi wʼabatunganene Omo katĩkatĩ kako.

¹⁴ Bakatĩma-tĩma omo nzira ngʼabʼesyombũmĩ, Babiritsanda omo musasi, Kikaleka abandu ibatatoka erĩtũla oko syongimba syabo.

¹⁵ Mobabirikirabo bati, Mũlũeho! Abahalira! Mũlũeho, mugende, sĩmũtũle ukundi! Neryo mobatibita, nʼerĩtĩma-tĩma, Abandu omo bihanda, mobabũga bati, Sibendĩsyaswĩkala netu.

¹⁶ Obũsũ bwʼomwami Mukulu bwabiri-panzabo Siendisyaswalola kubo. Mobatakenga abahererĩ, Mobatasĩkya abakulu.

¹⁷ Ameso wetu akahũma, Nʼeririndirira erĩwatĩkĩbwa ni busa. Omwʼirindirira lyetu twamalindirira, Ekihanda kitetoka erĩlamya.

¹⁸ Bakasonda-sonda erirendera lyetu, Kikaleka itwataluka eriya omo nzira syetu. Endũlĩ yetu iri hakũhĩ, Ebiro byetu byahwere Kusangwa endũlĩ yetu yabĩrĩhĩka.

¹⁹ Abakatukwama bangũhĩre Kwilaba amasamba awʼomo kyanya. Mobatuhiga oko bitwa, Mobatulambira omo mbwarara.

²⁰ Omuka wʼemihuli yetu, omũhakabĩbwa wʼOmwami Mukulu, Amahambwa omo mahya wabo. Oyo twahula tuti, Omwisi wʼekyũtsũtsũ kiwe Twasyĩkala omo bihanda.

²¹ Uwe mwali wʼeEdomũ, utseme, utsange, Uwe wĩkere omo kihugo kyʼeŨzĩ. Nĩkwa olũtehĩ lwasyalaba nʼrĩkũhĩkako nibya. Wasyakũnda, nʼerĩyĩsĩga ndũmbũ.

²² Uwe mwali wʼeSĩonĩ, Erisuyira lyʼebibi byawe lyabĩrĩhĩkana. Siendisyaswakuheka omo bunyegwa. Uwe mwali wʼeEdomũ, asyatswera ebibi byawe. Asyaswikula amalolo wawe.