Ekiriro 3 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Ĩngye indi mundu oyo wabirilola oko malĩge Busana nʼomũtso wʼerihitana liwe.

² Abĩrĩnyĩkũna nʼerĩnyĩlabya Omo mwĩrĩmya butsira omo kyakakala.

³ Kwenene akabindula ebyala biwe erilwa nage Ngendo nʼengendo omo musibo gosĩ.

⁴ Abirireka omubiri wage nʼengoba yage ibyabonda, Abĩrĩbũnanga amakũha wage.

⁵ Abĩrĩhĩmba ahakongotere erilwa nage Abĩrĩnyĩhatatanĩa nʼerĩnyĩtĩmbako nʼendulu nʼamalĩge.

⁶ Abĩrĩnyĩkalya ahali omwĩrĩmya, Ngʼabandu bahola kera.

⁷ Abĩrĩmbĩra kʼolũhĩmbo oko mbande syosĩ indatoka erihuluka. Abĩrĩrĩtohya omũlĩkĩ wage.

⁸ Ega, omugulu ngalaka, nʼeribirikira erĩwatĩkĩbwa, Akakingira erisaba lyage.

⁹ Abĩrĩrĩba esyonzira syage omo mabwe abatsĩre. Abĩrĩhengemĩa esyonzira syage.

¹⁰ Abiribya ũkwʼĩngye ngʼedubu eyikanyilamba, Ngʼendale eyiri ahabĩsamĩre.

¹¹ Abiribindula esyonzira syage nʼerindahangula mo bihande bihande. Abirinyiyira mo mundu wʼobũlĩge.

¹² Abirikanda obuta buwe, Abirinyiyira mwʼirengerera busana nʼomusoha.

¹³ Abĩrĩngĩrya emisoha yʼolubo luwe Omo mbĩko yage.

¹⁴ Nabiribya owʼerisekwa oko bandu betu bosĩ, Nʼolwimbo lwabo, omo musibo gosĩ.

¹⁵ Abĩrĩnyũsũlya nʼebĩkalĩhĩre, Abĩrĩnyĩkũndya omo muhokolo.

¹⁶ Abiritulanga ameno wage omo misege. Abĩrĩnyĩgotserya omo lũtũtũ.

¹⁷ Abirihiga omutima wage hali oko buholo. Nabiribirirwa obutseme.

¹⁸ Monabũga nyiti, Amaka wage abirihera, Nʼamaha wage awakalũa oko Mwami Mukulu.

¹⁹ Wibuke amalĩge wage nʼerĩhanga-hangya lyage, Nʼomuhokolo, nʼendulu.

²⁰ Omutima wage akibukabyo kwenene, Kandi abĩrĩsĩrĩkalira omwisi wage.

²¹ Ngayĩbũkaya ekĩ, Busana nʼekyo indi nʼamaha.

²² Ebibuya byʼOmwami Mukulu byalekĩre ĩtũtaherĩbwa, Kusangwa eriganyira liwe sĩrĩrĩũmbaya.

²³ Ni rihya-lihya obuli ngyakya-ngyakya. Obutalegula bwawe ni bunene.

²⁴ Omutima wage ati, Omwami Mukulu nĩ ʼgabo lyage. Busana nʼekyo nasyamũhĩra kwʼamaha.

²⁵ Omwami Mukulu ni mubuya ukwʼabo abakamulinda, Oko mundu oyukamusonda-sonda.

²⁶ Ni kibuya omundu akalinda bũkũtũ, Busana nʼerĩlamya lyʼOmwami Mukulu.

²⁷ Ni kibuya omundu akakola omũbĩrĩ Omo bũlwana buwe.

²⁸ Ĩkale ĩyowene nʼeribya bũkũtũ, Kusangwa yo wamũhĩra goko.

²⁹ Ahĩre obuno buwe oko lũtũtũ, Mbino hali amaha.

³⁰ Alolaye erĩtema oko yũkamũswĩraya. Osũlĩbawe nʼebĩtsũmĩ omo bĩtsũmĩ.

³¹ Kusangwa Omukama siendisyagana mundu Erĩhĩka kera na kera.

³² Nomo angamwagalĩranĩa, Nĩkwa asyaganyira ngʼobungi bwʼerisasira liwe.

³³ Kusangwa sĩalĩagalaya nʼomũhwa, Kutse erĩĩta abana bʼabandu bʼobũlĩge.

³⁴ Eriryatangirira, Abʼomũlĩkĩ bosĩ bʼekihugo.

³⁵ Erikaga omundu erĩbanza lyʼekwenene. Embere syʼOwendata Kutsibu,

³⁶ Erĩĩma omundu erĩbanza liwe litunganene, Omukama Sĩalĩrĩga emyatsi eyĩ.

³⁷ Nindi yũkabũga, ikyakoleka, Omugulu Omukama atetahanakyo kwehĩ?

³⁸ Si mʼomo buno bʼOwendata Kutsibu Obubi nʼobubuya bikahuluka kwehĩ?

³⁹ Omundu oyuliho kutse ogundimundu Akalaka busana nakĩ kwehĩ? Ĩnĩanasĩ ebibi biwe.

⁴⁰ Tũsonda-sondaye esyonzira syetu, Tusube oko Mwami Mukulu.

⁴¹ Tukasumba emitima yetu haguma nʼebyala byetu Uku Nyamuhanga omo lubula.

⁴² Twabĩrĩhalya twabirihona. Nawe sulitatubuyira.

⁴³ Wabirituswika nʼerihitana nʼeritukwamirira. Wabĩrĩta, sulitaganyira.

⁴⁴ Wabiriyiswika omo kĩtũ, Isihali erisaba likatoka erilabamo.

⁴⁵ Wabirituyira mo kyabũ nʼekĩbĩrĩryo Omo katĩkatĩ kʼabandu.

⁴⁶ Esyonzĩgũ syetu syosĩ syabiritanda Amuno wasyo go kutsibu erilwa netu.

⁴⁷ Obuba nʼobuhya byabĩrĩtũhĩkako, Erĩhũngwa nʼerihera.

⁴⁸ Erĩso lyage likasenda mwʼesyonyũsĩ syʼamagetsi Busana nʼerĩherĩbwa lya mwali wʼabandu bage.

⁴⁹ Ameso wage akasendaya emĩsonĩa, Butsira erĩũmbya.

⁵⁰ Erĩhĩka aho Mwami Mukulu asyaherya eyĩkwa Nʼerisamalira iniane elubula.

⁵¹ Ameso wage akaletera omutima wage wʼobũlĩge Busana nʼabali bosĩ bʼomũyĩ wage.

⁵² Esyonzĩgũ syage syabirinyisonda-sonda kutsibu Ngʼenyonyũ butsira ekikaleka.

⁵³ Babĩrĩnyĩhũnerya omo buhya bʼomũlĩkĩ Nʼerĩnyĩhĩra kwʼerĩbwe.

⁵⁴ Amagetsi abirisenda oko mutwe wage. Monabũga nyiti, Namakwa!

⁵⁵ Monabirikira erĩna lyawe, uwe Mwami Mukulu, Inyine omo buhya obwʼeyĩkwa yo hali.

⁵⁶ Mowowa omulenge wage. Sũlĩbe okũtũ kwawe okwʼisaba lyage lyʼerilama, Nʼoko milake yage yʼerĩwatĩkĩbwa.

⁵⁷ Mowasegera hakũhĩ ekiro ekyo nakulakira. Mowabũga uti, Sigubahe!

⁵⁸ Uwe Mukama, wabirinyitonganira omo myatsi yʼomutima wage. Wabĩrĩtongolya engebe yage.

⁵⁹ Uwe Mwami Mukulu, wabirilangira erĩnũbĩbwa lyage. Utswere omwatsi wage.

⁶⁰ Wabirilangira erĩkĩsya lyabo lyosĩ, Nʼesyombĩta syabo syosĩ busana nage.

⁶¹ Uwe Mwami Mukulu, wabĩrĩowa eritsuma lyabo, Nʼesyombĩta syabo syosĩ busana nage.

⁶² Emĩnywa yʼabandu bakanyibambira, Nʼerĩbũga lyabo omo bihwehwe Bikalwa nage omo musibo gosĩ.

⁶³ Ũlebaye erĩĩkala lyabo nʼerihangana lyabo. Nabere lwimbo lwabo lwʼerĩsekererya.

⁶⁴ Uwe Mwami Mukulu, wasyalihabo endĩhĩ, Ngʼemĩbĩrĩ yʼebyala byabo.

⁶⁵ Wasyahabo Obutsibu bwʼomutima, Nʼeritakira lyawe lyasyabya kubo.

⁶⁶ Wasyakwamirirabo omwʼihitana, nʼerĩheryabo Eyĩkwa oko lubula lwʼOmwami Mukulu!