Ekiriro 1 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Omũyĩ ĩkere ĩgowene ati, Owabya oswĩre mwʼabandu! Abiribya ngʼomũkwakalĩ, Oyo wabya mukulu omo bihanda! Abya munya-mwami-kalĩ omo katĩkatĩ kʼebihugo, Abiribya mũsũbĩ!

² Akalira kutsibu omo kiro, Nʼemĩsonĩa yiwe iri oko matema wuwe. Omo baragane buwe bosĩ, Siawite nʼomuguma wʼerĩmũkĩranĩa. Abĩra buwe bosĩ babirimuteba. Babiribya nzĩgũ siwe.

³ Yũda abirigenda omo bunyegwa busa­na nʼobũlĩge, Kandi busana nʼerĩnũbĩbwa ĩnene. Ĩkere omo katĩkatĩ kʼebihanda, Sialibana eriluhuka. Abakamwendereraya bosĩ babĩrĩmweya. Ahakalĩre nʼobũlĩge.

⁴ Esyonzira syʼeSĩonĩ sikalira, Kusangwa sihali oyukasa oko kyũsĩ kĩbũyĩrĩre. Esyongyo siwe syosĩ syabiribya bĩhũma, Abahererĩ buwe bakasĩmba. Abambesa buwe bali nʼobũlĩge, Naye ali nʼengitsi.

⁵ Esyonzĩgũ siwe syabiribya bakama buwe, Esyonzĩgũ siwe syabwene omũyĩsa. Kusangwa Omwami Mukulu abĩrĩmwagalya Busana nʼobungi bwʼebibi biwe, Abana buwe balere babiriya Omo bunyegwa embere syʼenzĩgũ.

⁶ Eriyisitika lya mwali WʼeSĩonĩ lyabĩrĩmũlũako. Abanya-mwami buwe babiribya ngʼesyongabi Esitawite bũlĩsĩryo, Syabiritibita butsira maka Embere syʼomuhiyi.

⁷ Yerũsalema omo biro byʼobũlĩge nʼeriagalwa liwe, Akibuka ebibuya biwe byosĩ Ebyabya oko mugulu wa kera. Omugulu abandu buwe bawa omo byala byʼenzĩgũ, Isihali mundu wʼerĩmũwatĩkya, Esyonzĩgũ siwe mosyamulolako Mosyasekererya erihwa liwe.

⁸ EYerũsalema yabĩrĩhalya kutsibu, Neryo yabiribya ngʼekindu kĩtĩre nye. Abosĩ abamũsĩkaya bakamupona, Kusangwa babirilangira endũmbũ yiwe. Ega, naye akasĩsĩkana, nʼerikebera ehandi.

⁹ Esyonye siwe syabya omo lukimba luwe. Sialibuka endũlĩ yiwe. Kikaleka iniawa omo mĩsũsũmano. Siawite omũkĩranĩa. Uwe Mwami Mukulu, ũlebaye obũlĩge bwage, Kusangwa enzĩgũ yabĩrĩyĩhamya.

¹⁰ Enzĩgũ yabirisanza ebyala byayo Oko bindu bibuya byosĩ. Kusangwa abirilangira ebihanda byabiriingira ahabũyĩrĩre huwe, Abo wahana uti, Sibingire omo ndeko yawe.

¹¹ Abandu buwe bosĩ bakasĩmba, bakasondaya akalyo. Babĩrĩhĩtya ebindu byabo byowene busana nʼakalyo Erĩsũbya esyongebe syabo. Uwe Mwami Mukulu ulangire, kandi Ũlebaye, Kusangwa nabiriponwa.

¹² Simwetsomana ĩnywe bosĩ ko mukalaba eyĩ kwehĩ? Mũlebaye, mũyĩtegereraye nga hane obũlĩge ngʼobwage, Obo nakolerawa kutsibu, Obo Mwami Mukulu abĩrĩnyagalyamo oko kiro kyʼerihitana lĩkalĩre riwe.

¹³ Abirituma omuliro omo makũha wage erĩlũa endata, Nago abĩrĩkĩndago. Abiritega obutaha-taha busana nʼebisando byage, Abĩrĩnyĩsũbya enyũma. Abĩrĩnzĩga nʼerireka inalembera Omo musibo gosĩ.

¹⁴ Engomo yʼerĩhalya lyage inyibohereko. Ebyala biwe byabirilukayo haguma. Yamahĩka oko bĩkya byage. Abiribuga amaka wage. Omukama abĩrĩmbĩra omo byala byʼabandu, Sinditoka erihangana embere syabo.

¹⁵ Omukama abirigana esyombangĩ syage syosĩ. Omo katĩkatĩ ketu. Abiribirikira omugulu ahamula erilwa nage Erĩhĩnolera abalwana bage. Omukama abiriryatanga omumbesa mwali wa Yũda Ngʼomo kikamiro kyʼebĩnyũ.

¹⁶ Busana nʼemyatsi eyĩ ngalira. Ameso wage akasenda mwʼamagetsi. Kusangwa omũkĩranĩa oyo wangakĩranĩa Omutima wage ali hali ũkwʼĩngye. Abana bage babiribya omo bũlĩge Kusangwa enzĩgũ yabĩrĩsĩngana.

¹⁷ ESĩonĩ yabirisanzula ebyala byako. Sihali oyo wangamũkĩranĩa. Omwami Mukulu abirihana busana na Yakobo, Abakamũtĩmbako babye nzĩgũ siwe. EYerũsalema yabiribya ngʼekindu kĩtĩre nye omo katĩkatĩ kabo.

¹⁸ Omwami Mukulu yutunganene, Kusangwa nabirihona oko kihano kiwe. Mowe lino, ĩnywe bandu bosĩ, Kandi mũlebaye obũlĩge bwage. Abambesa bage nʼabalwana bage Babiriya omo bunyegwa.

¹⁹ Monabirikira abaragane bage, nĩkwa mobanyiteba. Abahererĩ bage nʼabakulu bage mobaholera omo mũyĩ, Omugulu bayisondera akalyo kʼerĩsũbya amaka wabo.

²⁰ Uwe Mwami Mukulu, ũlebaye, kusangwa indi omo bũlĩge, Nʼomutima wage amayĩhũmbanga. Omutima wage abiribinduka omwisi wage, Kusangwa nabirihona nabi. Omo nzira omũyalĩ akĩta, Nʼomo nyũmba iri ngʼoluholo.

²¹ Babĩrĩowa ko ngasĩsĩkana. Ko hate oyũkanyĩkĩranaya. Esyonzĩgũ syage syosĩ syabĩrĩowa obũlĩge bwage. Babiritsema kusangwa mowakola ekyo. Wasyaleta ekiro ekyo wabiriahula, Nabo basyabya nga ngye.

²² Obubi bwabo bosĩ buhuluke embere syawe. Ukolebo ngoko wanyikola busana nʼerĩhalya lyage ryosĩ. Kusangwa erĩsĩsĩkana lyage ni ringi, Nʼomutima wage akalembera.