Danĩelĩ 8 - AMASAKO ABOYTRTRE WA NYAMUHANGA AWAKAHULAWA MO BIBLIA

Esyonzolĩ syʼembangale nʼembaya

¹ Oko mwaka wʼakasatu wʼeritabala lyʼOmwami Belsasarĩ erilota molyambulukirako, ĩngye Danĩelĩ, enyũma wʼesyo, esyanyibutukira erĩmbere.

² Neryo monalangira omwʼilota esyonzolĩ; neryo omugulu nalangira, nabya ahakongotere eSũsa owabya omo kihugo kyʼeElamũ; kandi nabya omo syonzolĩ esyo inyine hakũhĩ nʼolũsĩ lwʼeŨlayĩ.

³ Neryo monasumba ameso wage, nʼerilangira, neryo, lebaya, embere wʼolũsĩ bahangene embangale yʼamahembe abiri; nʼamahembe abiri ayo abya mali-mali; nĩkwa erĩhembe liguma lyabya liri oko lindi, nʼeriri eryo molyalasa enyũma.

⁴ Neryo monalangira embangale eyo ĩkakũna oluhande lwʼeyĩkwa, nʼelutambi lwʼendata, nʼelutambi lwʼeyĩkwa; kandi sihali nyama eyatoka erihangana embere syayo, kutse sihali oyo wangalamya omo byala byayo; nĩkwa moyakola ngʼerisonda lyayo, nʼerĩyĩhamya.

⁵ Nʼomugulu naganĩraya, lebaya, embaya moyalũa ebwanga bwʼeyĩkwa ĩkahĩka oko kihugo kyosĩ, nayo moyĩtatũla oko kitaka; nʼembaya eyo yabya nʼerĩhembe ĩnene eryʼomuhanda omo katĩkatĩ kʼameso wayo.

⁶ Nayo moyasa hakũhĩ nʼembangale, eyabya nʼamahembe abiri, eyo nalangira inahangene hakũhĩ nʼolũsĩ, nʼembaya eyo moyararĩayo omwʼihitana lyʼamaka wayo.

⁷ Nage monalangira ikasegera hakũhĩ nʼembangale, kandi moyahitana kuyo, moyahumira embangale, moyatũa amahembe wayo abiri; nʼembangale moyitaswabya nʼamaka eriimana embere syayo; nĩkwa embaya moyakĩndayo ahisi oko kitaka nʼeriryatangirirayo; isihali oyo wangalamya embangale omo byala byayo.

⁸ Nʼembaya eyo moyayĩhamya kutsibu; nʼomugulu yamabibya nʼamaka, erĩhembe ĩnene eryo molyatwĩka; nʼomo mwanya walyo mohalasa amahembe ani manene manene awalolĩrye oko mahunga ani wʼekyanya.

Akahembe kakalasa omwʼĩhembe

⁹ Neryo omwʼĩhembe liguma mohahuluka akahembe kake; nako mokalasa erikanyirira kutsibu ebwanga bwʼelutambi lwʼeyĩkwa, nʼebwanga bwʼendata, nʼebwanga bwʼeKihugo Kibuya.

¹⁰ Kandi akahembe ako mokalasa erĩhĩka oko mulondo wʼelubula; kandi mokatogerya oko kitaka abandi bʼomulondo oyo, nʼesindi ngũnũnũ, nʼeriryatangirabyo ahisi.

¹¹ Ega, mokayĩhamya kati, kakalingirirana nʼomukulu wʼomulondo; kandi mokamũlũsya kwʼobuhere bwʼerĩokererya, nʼahabũyĩrĩre huwe mohaguswa ahisi.

¹² Kandi busana nʼamalolo akahembe ako kasyahabwa obuhere bwʼebiro byosĩ; kandi akahembe ako kasyagusa omwatsi wʼekwenene ahisi oko kitaka, nʼerikola erisonda lyako nʼeritokalyo.

¹³ Neryo monowa omundu ũbũyĩrĩre akabũga, kandi ogundi mundu ũbũyĩrĩre mwabwira oyo wabya akabũga ati, Erilota erĩ busana nʼobuhere bwʼebiro byosĩ lyasyabya oko mugulu wahi, omugulu erĩlolo likinaleta ekitsibu kyʼeriherya ekikaleka ahabũyĩrĩre nʼomulondo erĩryatangiriribwa ahisi kwehĩ?

¹⁴ Neryo mwambwira ati, Busana nʼerĩgolo-golo nʼengyakyangyakya elfu ĩbĩrĩ nʼamagana asatu (2,300), neryo ahabũyĩrĩre hasyasũbĩbwa ndeke.

Gabrĩelĩ akabikula esyonzolĩ

¹⁵ Neryo ĩngye Danĩelĩ nabere nabilangira erilota eryo, monasonda-sondya eriminyalyo; neryo, lebaya, mohahangana embere syage oyũsosĩre omundu.

¹⁶ Monowa omulenge wʼomundu omo katĩkatĩ kʼemikyingyi yʼolũsĩ lwʼeŨlayĩ, owakabirikira, ati, Gabrĩelĩ, Ũmĩnyĩsaye omundu oyũ erilota eryo.

¹⁷ Neryo Gabrĩelĩ mwasa hakũhĩ nʼaho nabya nyimene; nʼomugulu ahĩka monubaha, monatũlama oko bũsũ bwage, nĩkwa mwambwira ati, Uwe mugala wʼomundu, Uminye ngoko erilota eryo ni ryʼoko mugulu wʼendũlĩ.

¹⁸ Neryo omugulu abya akabũga nage, otũgotserĩ tunene motwanyihamba nʼobũsũ bwage ĩbũlolĩre oko kitaka; nĩkwa mwanyĩtũlako, mwanyĩhanganĩa mwĩsĩsĩka.

¹⁹ Neryo mwabũga ati, Lebaya, ngandĩkũmĩnyĩsya ebikandisyabya oko mugulu wʼendũlĩ yʼerihitana; kusangwa ni ryʼomugulu owahamulawa wʼendũlĩ.

²⁰ Embangale eyo walangira, eyabya nʼamahembe abiri, ayo ni bami ba Medĩa na Persĩa.

²¹ Nʼembaya eyo yʼekitswiga ni mwami wʼAbagrĩkĩ; nʼerĩhembe ĩnene eryo eriri omo katĩkatĩ kʼameso wayo ni mwami wʼerĩmbere.

²² Neryo erĩhembe eryatwĩka, nʼamahembe ani awahangana omo mwanya walyo, ni mami ani asyahangana erĩlũa omo kihanda kiwe, nĩkwa butsira nʼamaka wuwe.

²³ Neryo oko mugulu wʼenyũma wʼeritabala lyabo, omugulu abakahalaya babibuga enzira yabo, omwami asyahangana; oyũkalĩre, nʼeriminya amenge mabi.

²⁴ Nʼobũtokĩ buwe bwasyabya nʼamaka, nĩkwa butsira nʼobũtokĩ buwe ĩyowene; naye asyaherya nʼerĩswekya, asyagasa nʼerikola erisonda liwe; naye asyaherya esyombangĩ nʼabandu ba Nyamuhanga.

²⁵ Na busana nʼemibere yiwe asyatokesya amatebo omo byala biwe; kandi asyayĩhamya omo mutima wuwe; kandi asyaherya bangi omwʼiyiketera lyabo; kandi asyahangana nʼerilwa nʼOmunya-mwami wʼabanya-mwami; nĩkwa asyatĩndwa butsira omo byala byʼabandu.

²⁶ Nʼerilota lyʼamagolo-golo nʼesyongyakya ebyabĩrĩbũgwa ni kwenene; nĩkwa uhundire erilota eryo; kusangwa ni ryʼebiro bingi ebikandisyasa.

²⁷ Neryo ĩngye Danĩelĩ, monaluha, monalwala ebiro ebyo; neryo monahangana, monakola omũbĩrĩ wʼOmwami; kandi monasweka busana nʼerilota eryo, nĩkwa sihabya owʼeriminyalyo.