Danĩelĩ 4 - AMASAKO ABOYTRTRE WA NYAMUHANGA AWAKAHULAWA MO BIBLIA

Nebũkadeneza akapipa Nyamuhanga

¹ Omwami Nebũkadeneza oko bandu bosĩ, nʼebihanda byosĩ, nʼemĩbũge, abĩkere omo kihugo kyosĩ: Obuholo bwenyũ bukanyirire.

² Namasĩma erĩkangya ebiminyikalo nʼebyʼeriswekera ebyo Nyamuhanga Wʼendata Kutsibu abirinyikolera.

³ Ebĩmĩnyĩsyo biwe ko biri binene! Nʼebyʼeriswekera biwe ko biri byʼamaka! Obwami buwe ni bwami bwʼerikota, nʼeritabala liwe likabya oko ndengo ndengo.

Nebũkadeneza akalota kandi esyonzolĩ syʼomuti

⁴ Ĩngye Nebũkadeneza, nabya ngaluhukira omo nyũmba yage, ĩnyĩnayĩsyandĩre omo nyũmba yage yʼobwami.

⁵ Monalota esyonzolĩ esĩnyĩtĩre obuba; nʼamalengekanĩa oko ngyingo yage, nʼesyonzolĩ syʼomutwe wage mosyanyĩgerũkya omutima.

⁶ Neryo monahamula nyiti balete abandu bosĩ bʼamenge bʼeBabelĩ embere syage, banyĩmĩnyĩsaye eribikula lyʼerilota eryo.

⁷ Neryo abasaki nʼabalagũlĩ, Abakaldea, nʼabakũmũ mobasa; nage monakanĩryabo erilota eryo; nĩkwa mobatanyĩmĩnyĩsya eribikula lyalyo.

⁸ Nĩkwa enyũma, Danĩelĩ mwahuluka embere syage, oyo erĩna liwe lyabya Beltesaza, ngʼerĩna lya nyamuhanga wage, kandi omwisi siwe muli ekĩrĩmũ kyʼesyonyamuhanga sĩbũyĩrĩre; neryo monamubwira erilota lyage nyiti,

⁹ Uwe Beltesaza, omukulu wʼabasaki, kusangwa nyĩnasĩ ekĩrĩmũ kyʼesyonyamuhanga sĩbũyĩrĩre kiri omwisi syawe, kandi sihali ekĩbĩsĩre ekĩkakwĩta obũlĩge, unyibwire esyonzolĩ syʼerilota lyage, esyo nalangira, nʼeribikula lyasyo.

¹⁰ Esĩ nĩ nzolĩ syʼomutwe wage oko ngyingo yage, ko syabya sitya. Monalangira, neryo, lebaya, ihali omuti omo katĩkatĩ kʼekihugo; nʼobuli bwago bwabya buli kutsibu.

¹¹ Omuti oyo mwalasa, mwabya nʼamaka, nʼobuli bwago mobwahĩka omo kyanya nʼerilolwako lyago molyahĩka oko ndũlĩ yʼekihugo kyosĩ.

¹² Nʼebikoma byago byabya bibuya, nʼebĩgũma byago ini bingi, nʼomwisi wago imuli akalyo busana nʼabosĩ; esyonyama syʼomolĩ mosyabana ekyũtũtũ omo ndĩna yago, nʼesyonyonyũ syʼekyanya mosyĩkala oko mitahi yago, nʼebihangikwa byosĩ ebiriho mobyalya kugo.

¹³ Monalangira omo nzolĩ syʼomutwe wage oko ngyingo yage, neryo, lebaya, omũteya, omundu ũbũyĩrĩre mwandagala akalũa elubula.

¹⁴ Mwabirikira nʼomulenge munene ati, Mukonde omuti, mũtwe nʼemitahi yago, mũlagalaye ebikoma byago, mupanza-panze ebĩgũma byago; nʼesyonyama sĩlũe oko ndĩna yago, nʼesyonyonyũ omo mitahi yago.

¹⁵ Nĩkwa muleke ekĩsĩkĩ kyʼemĩrĩhĩ yago omo kitaka, haguma nʼomũlĩkĩ wʼekyuma nʼomulinga omo biti birere birere omolĩ; kandi kitsape omo kimi kyʼomo kyanya; nʼerĩgabo liwe libye haguma nʼesyonyama omo biti byʼekitaka.

¹⁶ Nʼomutima wuwe abindulawe siabye wʼomundu, ahabawe omutima wʼenyama; nʼemigulu irinda imulabeko.

¹⁷ Eritswera erĩ ni ryʼerihamula lyʼabateya, kandi erĩtwa omwatsi oyũ ni busana nʼekĩnywa kyʼababũyĩrĩre; busana nʼerĩmĩnyĩsya ngoko abaliho batoke eriminya ngoko Owendata Kutsibu akatabala oko bwami bwʼabandu, akahabo oko oyo anzĩre, kandi akahanganaya mubo omugunda.

¹⁸ Ĩngye mwami Nebũkadeneza monalangira erilota erĩ; nawe, uwe Beltesaza, ũtũle eribikula lyalyo, kusangwa abʼamenge bosĩ abʼobwami bwage sibetatoka erĩnyĩmĩnyĩsya eribikula lyasyo; nĩkwa uwe ukatoka; kusangwa ekĩrĩmũ kyʼesyonyamuhanga sĩbũyĩrĩre kiri umʼuwe.

¹⁹ Neryo Danĩelĩ, oyukahulawa mo Beltesaza, mwabumbubana akatambĩ, nʼamalengekanĩa wuwe mwamũswekya. Nʼomwami mwasũbĩrya ati, Beltesaza, Suleke erilota erĩ nʼeribikulalyo lĩkakũswekya. Beltesaza mwamũsũbĩrya ati, Omukama wage, erilota erĩ ni ryʼabakakũkwa obusu, nʼeribikula lyalyo libye oko syonzĩgũ syawe.

²⁰ Omuti ogo walangira, owalasa, nʼeribana amaka, obuli bwago obwahĩka omo kyanya, nʼerilolwako lyago erĩhĩka omo kihugo kyosĩ;

²¹ nʼebikoma byago ebyabya bibuya, nʼebĩgũma byago bingi, nʼomwisi wago ebyalya byabya busana nʼabosĩ; nʼomo ndĩna yago esyonyama syʼomolĩ mosyĩkala, nʼesyonyonyũ syʼomo kyanya mosyahĩra obwĩkalo bwasyo oko mitahi yago,

²² nina we, mwami; wabirikula nʼeribana amaka; kusangwa obukulu bwawe bwabiribya bunene, nʼerĩhĩka omo kyanya, nʼeritabala lyawe lyamahĩka oko ndũlĩ yʼekihugo.

²³ Kandi ngoko mwami alangira omũteya oyũbũyĩrĩre akandagala erĩlũa elubula, akabũga ati, Muko nde omuti, mũherayego; nĩkwa mũsĩge ekĩsĩkĩ kyʼemĩrĩhĩ yago omo kitaka, nĩkwa haguma nʼomũlĩkĩ wʼekyuma nʼomulinga omo biti birere birere byʼomolĩ, kandi kitsape omo kimi kyʼekyanya; kandi abye akasangira haguma nʼesyonyama syʼomolĩ, erĩhĩka emigulu irinda yasyamulabako.

²⁴ Eribikula lyasyo lyerĩ, uwe mwami, kandi ni ʼhamula lyʼOwendata Kutsibu erĩkahĩka oko mukama wage omwami.

²⁵ Liti wasyahigwa erĩlũsĩbwa oko bandu, nʼobwĩkalo bwawe bwasyabya haguma nʼesyonyama syʼomolĩ, nawe wasyalĩsĩrĩrĩbwa erirya ebiti ngʼesyonde, kandi wasyatsapĩbwa omo kimi kyʼekyanya, nʼemigulu irinda yasyakulabako; erĩhĩka aho wasyaminyira Owendata Kutsibu kwʼakatabala oko bwami bwʼabandu nʼerihabo ukwʼoyo akasonda.

²⁶ Kandi ngoko bahamula erĩsĩga ekĩsĩkĩ nʼemĩrĩhĩ yʼomuti; obwami bwawe bwasyabya ibune bwawe wamabiminya olubula ko lukatabala.

²⁷ Busana nʼekyo uwe mwami erihana ryage erĩ libane erĩkũtsemesya, uleke ebibi byawe busana nʼebitunganene, uleke amalolo wawe, Uganyire abera; kwamũhwa wanganabana erĩkanyĩrĩrya Obuholo bwawe.

Nebũkadeneza akayalya ebiti ngʼende

²⁸ Ebyosĩ ebĩ mobyahĩka oko mwami Nebũkadeneza.

²⁹ Emikera ĩkũmĩ nʼeyĩbĩrĩ yabihwa, omwami abya akalendera oko lutwe lwʼekikali kyʼeBabelĩ.

³⁰ Neryo omwami mwabũga ati, Okũ si Babelĩ kunene, oko nabĩrĩhĩmba busana nʼenyũmba yʼobwami, omo maka wʼobũtokĩ bwage na busana nʼolukengerwa lwʼerĩkangabasanĩa lyage kwehĩ?

³¹ Omugulu ekĩnywa ekyo kikine omo buno bwʼomwami omulenge mwasa erĩlũa elubula ati, Uwe mwami Nebũkadeneza, kyamabũgwa ukʼuwe kiti, Eribya mwami lyamalũsĩbwa ukʼuwe.

³² Wasyahigwa erĩlũa hakũhĩ nʼabandu; nʼerĩĩkala lyawe lyasyabya haguma nʼesyonyama syʼomolĩ; wasyalĩsĩrĩrĩbwa oko biti ngʼesyonde; nʼemigulu irinda yasyakulabako erĩhĩka aho wasyaminyira Owendata Kutsibu kwʼakatabala oko bwami bwʼabandu kandi akahabo oko oyo anzĩre erihabo.

³³ Oko ndambĩ eyo, omwatsi oyo mwabererera uku Nebũkadeneza; naye mwahigwa erĩlũa hakũhĩ nʼabandu, neryo mwalya ebiti ngʼesyonde, nʼomubiri wuwe mwatsapa omo kimi kyʼekyanya, erĩhĩka aho esyonzwiri siwe mosyahũlũlĩrya ngʼebyeya byʼerĩsamba, nʼesyonyala siwe ngʼesyonyala syʼesyonyonyũ.

Nebũkadeneza akasuba eribya mundu

³⁴ Neryo ebiro ebyo byabere byabihwa, ĩngye Nebũkadeneza, monasumbira ameso wage elubula, nʼobũlengekanĩa bwage mobwanyisubako, monapipa Owendata Kutsibu, monamupipa nʼerĩmũsĩkya, oyuliho kera na kera; kusangwa eritabala liwe ni ʼtabala lya kera na kera, nʼobwami buwe ni bʼoko ndengo ndengo.

³⁵ Nʼesyondũlanĩ syosĩ syʼekihugo sikaganzawa nga si kindu; naye akakola ngʼerisonda liwe omo milondo yʼelubula, nʼomo katĩkatĩ kʼesyondũlanĩ syʼekihugo; kandi sihali oyo wangakakĩrya ebyala biwe, kutse erĩmũbũlya ati, Ukayira uti?

³⁶ Oko mugulu oyo, obũlengekanĩa bwage mobwanyisubako; kandi busana nʼolukengerwa lwʼobwami bwage, erĩkangabasanĩa lyage nʼolukengerwa lwage mobyanyisubako; nʼabahanĩ bage nʼabakama bage mobasa erĩnyĩsondya; nage monaswahanganĩbwa omo bwami bwage, nʼobukulu bubuya mobwanyitomekerwako.

³⁷ Na lino ĩngye Nebũkadeneza, ngapipa, nʼerihalamba, nʼerĩsĩkya Omwami wʼelubula, kusangwa emĩbĩrĩ yiwe yosĩ ni kwenene, nʼesyonzira siwe nĩ ʼbanza litunganene; nʼabakalendera nʼeriyiheka, akatoka erĩkehyabo.