Danĩelĩ 3 - AMASAKO ABOYTRTRE WA NYAMUHANGA AWAKAHULAWA MO BIBLIAEsanamu ya Nebũkadeneza 1 Omwami Nebũkadeneza mwakokotya esanamu yʼesyamagetsi, obuli bwayo bwʼendata bwabya emetere 27, nʼobugali bwayo emetere 2; neryo mwasingikayo omo bwerere bwʼeDũra, omo kihugo kyʼeBabelĩ. 2 Neryo Nebũkadeneza mwatuma erĩhĩndanĩa haguma abakama, nʼabasokĩ, nʼabatabalĩ, nʼabatswerĩ, nʼababĩkĩ nʼabategekĩ, nʼesyombũyĩ, nʼabatabalĩ bosĩ abʼekihugo, base okwʼihamula lyʼesanamu eyo mwami Nebũkadeneza asingika. 3 Neryo abakama nʼabasokĩ, nʼabatabalĩ, nʼabatswerĩ, nʼababĩkĩ, nʼabategekĩ, nʼesyombũyĩ, nʼabahangamĩ bosĩ bʼekihugo mobahĩndana haguma erihamula esanamu eyo mwami Nebũkadeneza asingika. 4 Neryo omũhamĩrya mwabirikira kutsibu ati, ĩnywe bandu, nʼebihanda, nʼemĩbũge, mukahamulawa, 5 omugulu mũkowa emirenge yʼengubi, nʼenyamulera, nʼenanga, nʼenzenze, nʼomũgobĩro, nʼamalenga, nʼemihanda yosĩ yʼeriimba, muwe ahisi nʼerĩramya esanamu eyo yʼesyamagetsi eyo mwami Nebũkadeneza asingika. 6 Nʼoyutendiwa ahisi nʼerĩramya, asyaguswa oko ndambĩ eyo omwʼirunga lyʼomuliro erikagulumira. 7 Neryo oko mugulu oyo, omugulu abandu bakowa emirenge yʼengubi, nʼenyamulera, nʼenanga, nʼenzenze, nʼomũgobĩro, nʼamalenga, nʼemihanda yosĩ yʼeriimba, abandu bosĩ nʼebihanda, nʼemĩbũge, mobawa ahisi, mobaramya esanamu yʼesyamagetsi eyo mwami Nebũkadeneza asingika. Abalĩkyabo Danĩelĩ basatu bakagana erĩramya esanamu 8 Neryo oko mugulu oyo Abakaldea mobasa hakũhĩ mobahandikirira Abayũda. 9 Mobasũbĩrya mobabwira omwami Nebũkadeneza bati, Uwe mwami, ukote! 10 Uwe mwami, mowahĩra ehamũlĩ, uti obuli mundu oyo wasyowa emirenge yʼengubi, nʼenyamulera, nʼenanga, nʼenzenze, nʼomũgobĩro, nʼamalenga, nʼemihanda yosĩ yʼeriimba, asyawa ahisi nʼerĩramya esanamu yʼesyamagetsi. 11 Nʼoyutendiwa ahisi nʼerĩramya, asyaguswa omwʼirunga erikaka mʼomuliro. 12 Hali abandi Bayũda abo wahĩra mo bakulu oko myatsi yʼekihugo kyʼeBabelĩ; ni Sadĩrakĩ, na Mesakĩ, na Abedenego. Uwe mwami, abalume aba sibetakukenga; sibekolera esyonyamuhanga syawe, kandi sĩberamaya esanamu yʼesyamagetsi eyo wasingika. 13 Neryo Nebũkadeneza omwʼihitana liwe nʼerikarama liwe mwahamula ati balete Sadĩrakĩ, na Mesakĩ, na Abedenego. Neryo mobaleta abalume abo embere syʼOmwami. 14 Neryo Nebũkadeneza mwasũbĩrya mwabwirabo ati, Ĩnywe Sadĩrakĩ, na Mesakĩ, na Abedenego, ni kwenene simulikolera esyonyamuhanga syage, kutse erĩramya esanamu yʼesyamagetsi eyo nasingika kwehĩ? 15 Neryo lino mwamabya mũnasĩkĩre omugulu mũkowa emirenge yʼengubi, nʼenyamulera, nʼenanga, nʼenzenze, nʼomũgobĩro, nʼamalenga, nʼemĩsĩndo yosĩ yʼeriimba, eriwa ahisi nʼerĩramya esanamu eyo nakokotaya, lyowene; nĩkwa mwamatindaramyayo, oko katambĩ ako mwasyaguswa omwʼirunga erikaka mʼomuliro; ni nyamuhanga wahi oyo wasyabalamya omo byala byage kwehĩ? 16 Sadĩrakĩ na Mesakĩ, na Abedenego mobasũbĩrya mobabwira omwami bati, Uwe Nebũkadeneza, sihali ekyangatuma ĩtwakũsũbĩrya oko mwatsi oyũ. 17 Kyamabya kitya, Nyamuhanga wetu oyo tukakolera akatoka erĩtũlamya omwʼirunga erikaka mʼomuliro; naye akandĩtũlamya omo byala byawe, uwe mwami. 18 Nĩkwa bite bitya, uwe mwami, Uminye ko tutendĩrĩga erikolera esyonyamuhanga syawe, kutse erĩramya esanamu yʼomulinga wasingika. Sadĩrakĩ na Mesakĩ na Abedenego bakagusawa omwʼirunga lyʼomuliro 19 Neryo Nebũkadeneza mwosũla nʼerikarama, nʼerisosa lyʼobũsũ buwe molyahinduka uku Sadĩrakĩ na Mesakĩ na Abedenego, neryo mwasũbĩrya, mwahamula ati bakaye erirunga ngendo sirinda kwilaba ko lĩkakĩbawa. 20 Neryo mwahamula esindi mbangĩ syʼomulondo wuwe ati babohe Sadĩrakĩ, na Mesakĩ, na Abedenego bagusebo omwʼirunga erikaka mʼomuliro. 21 Neryo abandu aba mobabohwa ibane nʼesyosũrũalĩ syabo, nʼesyokanzu syabo nʼebisomeko byabo, nʼesindi ngimba syabo, mobaguswa omwʼirunga erikagulumira. 22 Neryo kusangwa erihamula lyʼOmwami lyabya lĩkalĩre nʼerirunga iryamabigulumira kutsibu, obukangira bʼomuliro mobwĩta abandu abo, abahamba Sadĩrakĩ na Mesakĩ, na Abedenego. 23 Nʼabalume basatu aba, Sadĩrakĩ, na Mesakĩ, na Abedenego, mobawa ĩbanabohĩre; omwʼirunga erikagulumira, omo muliro. Abandu bani bakalendera omo muliro butsira mwaga 24 Neryo, omwami Nebũkadeneza mwasweka, mwahangana lũba, mwabũga nʼabahanĩ buwe ati, Motutetagusa abandu basatu omo muliro ĩbanabohĩre kwehĩ? Mobasũbĩrya bati, Kwenene, uwe mwami. 25 Naye mwasũbĩrya ati, Lebaya, namalangira abandu bani ibanabohwerwe, bakalendera omo katĩkatĩ kʼomuliro, kandi butsira bwagalĩ; nʼerisosa lyʼowʼakani liri ngʼomugala wʼesyonyamuhanga. 26 Neryo Nebũkadeneza mwahĩka hakũhĩ nʼolũkyo lwʼerirunga erikagulumira mʼomuliro; neryo mwabũga ati, Sadĩrakĩ na Mesakĩ, na Abedenego, ĩnywe bagombe ba Nyamuhanga Wʼendata Kutsibu, mũlũemo, mwase hano. Neryo Sadĩrakĩ na Mesakĩ, na Abedenego mobalũa omo muliro. 27 Neryo abakama, nʼabasokĩ nʼabatabalĩ, nʼabahanĩ bʼomwami, ababya bahĩndene haguma, mobalangira abandu aba, ngoko muliro atabya awite amaka busana nʼemibiri yabo, kutse esyonzwiri syʼemitwe yabo mositabebuka kutse esyongimba syabo mositahinduka, kutse omubebu gʼomuliro mwatahambabo. 28 Neryo Nebũkadeneza mwabũga ati, Apipawe Nyamuhanga wa Sadĩrakĩ, na Mesakĩ, na Abedenego, oyo watuma omũlaĩka wuwe, nʼerĩlamya abagombe buwe abayiketera ye, ababindula ekĩnywa kyʼOmwami, nʼeriha emibiri yabo sibakolere kutse erĩramya ogundi nyamuhanga, nina Nyamuhanga wabo. 29 Busana nʼekyo, ngahĩra ehamũlĩ nyiti abandu bosĩ nʼebihanda byosĩ, nʼobuli mũbũge abakabũga ebitatolere busana na Nyamuhanga wa Sadĩrakĩ, na Mesakĩ, na Abedenego, basyatsũtsangwa mo bitswe-bitswe, nʼamanyũmba wabo asyayirwa mo byabũ; kusangwa sihali gundi nyamuhanga wangatoka erĩlamya ngʼomuhanda oyũ. 30 Neryo mwami mwahamya Sadĩrakĩ na Mesakĩ, na Abedenego omo kihugo kyʼeBabelĩ. |
Bible in Kinandi © Bible Society of the Democratic Republic of Congo, and Bible Society of Uganda, 1980.
Bible Society of the Democratic Republic of Congo