Danĩelĩ 10 - AMASAKO ABOYTRTRE WA NYAMUHANGA AWAKAHULAWA MO BIBLIA

Danĩelĩ akahulukirawa nʼomundu wʼolukengerwa

¹ Oko mwaka wʼakasatu wa Kĩro omwami wʼePersĩa, omwatsi mwabĩsũlĩrwa uku Danĩelĩ, oyo wahulawa mo Beltesaza; nʼomwatsi oyo abya kwenene, go wʼamalwa manene; naye mwaminya omwatsi oyo, kandi mwaminya erilota eryo.

² Oko biro ebyo, ĩngye Danĩelĩ, nabya ngalira oko mayenga asatu.

³ Mondasihirwa akalyo kowene, kandi eyĩswĩ kutse ebĩnyũ mobĩtahĩka omo buno bwage, kutse mondahakaba amagũta erĩhĩka aho amayenga asatu amabihwera.

⁴ Nʼoko kiro kyʼamakũmĩ abiri nʼebini kyʼomukera wʼerĩtsũka, omugulu nabya oko mũsĩke wʼolũsĩ lunene lwʼeHĩdekelĩ,

⁵ monasumba ameso wage, nʼerilangira, neryo, lebaya, omundu iniambite ekĩtanĩ, nʼomo mbindi yiwe iniambite esyamagetsi esĩtũkwĩre sya Ũfasĩ.

⁶ Omubiri wuwe abya nga berũlĩ, nʼobũsũ buwe ngʼerisosa lyʼerĩpalya, nʼameso wuwe ngʼebisosomole byʼomuliro, nʼamaboko wuwe nʼebisando biwe ngʼomulinga owakomĩre, nʼomulenge wʼebĩnywa biwe abya ngʼomulenge wʼendeko.

⁷ Ĩngye Danĩelĩ, ĩngyowene monalangira erilota erĩ; kusangwa abandu ababya haguma nage mobatalangira erilota eryo; nĩkwa eriubaha lĩnene molyahambabo, mobatibita erĩyabĩsama.

⁸ Neryo monasĩganĩbwa ĩngyowene, monalangira erilota ĩnene erĩ, kandi mondaswabya nʼakagala omwisi wage; kusangwa obubuya bwage mobwahindulwa omwisi wage erisosa oluholo, mondaswabya nʼakagala.

⁹ Nĩkwa monowa omulenge wʼebĩnywa biwe; nʼomugulu nowa omulenge wʼebĩnywa biwe, otũgotserĩ tũlĩtohĩre motwanyihamba omo bũsũ bwage, nʼobũsũ bwage ĩbũlolĩrye oko kitaka.

¹⁰ Neryo, lebaya, ebyala mobyanyĩtũlako, nʼerĩnyĩhĩra oko marwĩ wage nʼoko bugali bwʼebyala byage.

¹¹ Neryo oyo mwambwira ati, Uwe Danĩelĩ, uwe mundu oyũsĩmĩrwe kutsibu, Uminye ebĩnywa ebyo ngabũga nawe, uhangane mwĩsĩsĩka; kusangwa namatumwa ukʼuwe lino. Nʼomugulu ambwira ekĩnywa ekĩ, monahangana ngatitimana.

¹² Neryo mwambwira ati, Danĩelĩ, Sigubahe; kusangwa erĩtsũka oko kiro kyʼerĩmbere eryo wahĩra omutima wawe okwʼiminya, nʼerĩyĩkehya embere sya Nyamuhanga wawe, ebĩnywa byawe mobyogũbwa; nage namasa busana nʼebĩnywa byawe.

¹³ Nĩkwa omunya-mwami wʼobwami bwʼePersĩa mwanyĩkakĩrya ebiro makũmĩ abiri nʼekiguma; nĩkwa lebaya, Mĩkaelĩ, omuguma gʼoko banya-mwami bakulu, mwasa nʼerĩnyĩwatĩkya, nage monasĩgalayo haguma nʼabami bʼePersĩa.

¹⁴ Lino nabĩrĩhĩka erĩkũmĩnyĩsya ebĩkandĩsyahĩka oko bandu bawe omo biro byʼenyũma; kusangwa esyonzolĩ esyo ni syʼebiro bingi byʼenyũma.

¹⁵ Nʼomugulu amabĩbũga nage ebĩnywa ebĩ, monalolya obũsũ bwage oko kitaka, monabya mũmũ.

¹⁶ Neryo, lebaya, omuguma oyũsosĩre abagala bʼabandu mwatũla oko mĩnywa yage; neryo monatanda obuno bwage monabũga nʼeribwira oyo wahangana embere syage, nyiti, Uwe Mukama wage, busana nʼerilota erĩ amalĩge wage abirimbamba, sĩndĩtasĩgala nʼakagala omwisi syage.

¹⁷ Kusangwa omugombe wʼomukama wage angatoka erĩkanĩa ati nʼomukama wage kwehĩ? Kusangwa lino sihakiri amaka kutse omuka omwisi syage.

¹⁸ Neryo kandi oyũsosĩre omundu mwanyĩtũlako kandi, mwamba akagala.

¹⁹ Neryo mwabũga ati, Uwe mundu oyũsĩmĩrwe kutsibu, Sigubahe. Ubye nʼobuholo; ũsĩke nʼamaka, ega, uhande omutima! Nʼomugulu abũga nage, monabana amaka, monabũga nyiti, omukama wage abũge; kusangwa wamanyiha amaka.

²⁰ Neryo mwabũga ati, Ũnasĩ ekikaleka ĩnakũhĩkako kwehĩ? Na lino ngandisubula eriyalwa nʼomunya-mwami wʼePersĩa; nʼomugulu ngahongoka hano, lebaya, omunya-mwami wʼAbagĩrĩkĩ akandiasa.

²¹ Nĩkwa ngandikubwira ekĩsakĩre omo masako wʼekwenene; kandi sihali oyukahangana ndeke haguma nage erilwa nʼaba, yo nʼomunya-mwami wenyũ Mĩkaelĩ.