Danĩelĩ 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Danĩelĩ nʼabalĩkyabo basatu bakagana akalyo kʼOmwami

¹ Oko mwaka wʼakasatu wʼeritabala lya Yehoyakĩmũ omwami wʼeYũda, Nebũkadeneza, omwami wʼeBabelĩ mwasa eYerũsalema, mwagoterago.

² Nʼomukama mwahĩra Yehoyakĩmũ omwami wʼeYũda omo byala biwe, nʼekihande kyʼebindu byʼenyũmba ya Nyamuhanga; mwahekerabyo omo kihugo kyʼeSĩnarĩ oko nyũmba ya nyamuhanga wuwe, mwĩngĩrya ebindu ebyo, omo kigona kya nyamuhanga wuwe.

³ Omwami mwabũga na Aspenazĩ omukulu wʼebikonwe biwe, ati balete abandi bʼabana ba Ĩsraelĩ, lo lubuto lwʼabami nʼolwʼesyongũla;

⁴ abalwana abate ko kĩtĩngũ, nĩkwa ababuya, nʼabanyima omo menge gosĩ, nʼabawite eriminya, nʼabenge-benge Omwʼiminya, nʼabawite amaka wʼerihangana omo nyũmba yʼOmwami; kandi ati akangĩrĩrayebo amenge wʼomũbũge wʼAbakaldea.

⁵ Nʼomwami mwahamulirabo erĩgabo lyʼobuli kiro lyʼebisi-bisi byʼOmwami, nʼoko bĩnyũ ebyo akapũlaya, kandi ati bakangĩrĩrĩbawe emyaka ĩsatu; neryo oko ndũlĩ yayo bahangane embere syʼOmwami.

⁶ Omo katĩkatĩ kʼabandu aba habya abana bʼeYũda, Danĩelĩ, Hanania, Mĩsaelĩ na Azaria.

⁷ Omukulu wʼebikonwe mwalukabo amena; mwaha Danĩelĩ erĩna lya Beltesaza, nʼuku Hanania erĩna lya Sadĩrakĩ; nʼuku Mĩsaelĩ, Mesakĩ; nʼuku Azaria Abedenego.

⁸ Nĩkwa Danĩelĩ mwayĩsũnza omo mutima wuwe eritindayĩtsandya omo bisi-bisi byʼOmwami, kutse omo bĩnyũ ebyo apũlaya; kyaleka iniasaba omukulu wʼebikonwe ati sĩayĩtsandaye.

⁹ Nĩkwa Nyamuhanga mwaleka Danĩelĩ ĩnĩalĩgwa nʼerisasirwa omo meso wʼomukulu wʼabakonĩre.

¹⁰ Neryo omukulu wʼebikonwe mwabwira Danĩelĩ ati, Ngubaha omwami omukama wage, oyo wabahamulira ebyalya byenyũ nʼerĩpũlya lyenyũ; kusangwa busana nakĩ angalebya amũsũ wenyũ ĩsĩakomĩre ngʼamũsũ wʼabandi balwana abʼemyaka yenyũ kwehĩ? litya ĩmũkĩtĩsaya omutwe wage embere syʼOmwami.

¹¹ Neryo Danĩelĩ mwabwira omũhanganĩrĩ oyo mukulu wʼebikonwe ahĩra ukwʼabo Danĩelĩ, Hanania, na Mĩsaelĩ na Azaria ati, Ngakugonga-gonga nyiti,

¹² Ulenge abagombe bawe, ebiro ĩkũmĩ; batuhe esyonyenyĩ tulye, nʼamagetsi tũpũlaye.

¹³ Neryo amũsũ wetu asamalirawe embere syawe, nʼamũsũ wʼabandi balwana abakalya ebisi-bisi byʼOmwami; neryo ukolere abagombe bawe ngoko wamalebya.

Abo Danĩelĩ bamasĩnga abandi

¹⁴ Neryo mwahulikirirabo omo mwatsi oyũ, mwalengabo ebiro ĩkũmĩ.

¹⁵ Nʼebiro ĩkũmĩ ebyo byabere byabihwa amũsũ wabo mwatendera kwilaba, nʼemibiri yabo moyanyenyeta kwilaba abalwana bosĩ abalya oko bisi-bisi byʼOmwami.

¹⁶ Neryo Omũhanganĩrĩ mwalũsya ebisi-bisi byabo, nʼebĩnyũ ebyo bangapũlĩrye, mwahabo esyonyenyĩ.

¹⁷ Nĩkwa abalwana bani aba, Nyamuhanga mwahabo eriminya, nʼobuminye omwʼiga lyosĩ, nʼamenge; kandi Danĩelĩ abya nʼobowĩka omo syonzolĩ nʼomwʼilota.

¹⁸ Neryo ebiro ebyo byabere byabihwa ebyo mwami ahamula erĩĩngĩryabo, omukulu wʼabakonĩre mwaletabo embere sya Nebũkadeneza.

¹⁹ Nʼomwami mwakanĩa haguma nabo; nʼomo katĩkatĩ kabo abosĩ mohatabanika oyuli nga Danĩelĩ, na Hanania, na Mĩsaelĩ, na Azaria; busana nʼekyo mobahangana embere syʼOmwami.

²⁰ Nʼomo myatsi yosĩ yʼamenge nʼobowĩka, umwʼebyo mwami abũlayabo; mwalebyabo ĩbanowene engendo ĩkũmĩ kwilaba abasaki nʼabalagũlĩ ababya omo butabale buwe bosĩ.

²¹ Na Danĩelĩ mwabyaho erĩhĩka oko mwaka wʼerĩmbere wʼOmwami Kĩro.