Amosĩ 9 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwami Mukulu akatswera Ĩsraelĩ

¹ Monalangira Omukama inianimene oko mũsĩke wʼekiherero; neryo mwa­bũga ati, Ũswĩraye oko singi syʼesyondũyĩ esyonzeguliro sititimane; ũtwesyo mo mbindi-mbindi oko mitwe yʼabosĩ; neryo nage nasyĩta abandi ba kubo omo mũyalĩ; sihali muguma wa kubo oyo wasyatibita omo lusago, sihendisyabala omũsayĩ nʼomuguma wa kubo.

² Nomo bangatakula eriya omo Kũlĩmũ, ebyala byage byasyahambabo eyo; nomo bangahetukira elubula, nasyakĩmũkalyabo eyo.

³ Nomo bangayĩbĩsa oko singi yʼeKaramelĩ, nasyasondyabo nʼerĩlũsyabo eyo; kandi nomo bangabĩsama oko meso wage omo mutobero wʼengetsi, eyo nasyahamula enzoka iyalumabo.

⁴ Nomo bangaya omo bunyegwa embere wʼesyonzĩgũ syabo, eyo nasyahamula omũyalĩ, nago asyĩtabo; nasyalolabo ebitsule, butsira omo bubuya.

⁵ Neryo Omukama, Omwami Mukulu Wʼemilondo, yo yũkatũla oko kitaka ikyasendekerera, nʼabosĩ abĩkere mukyo basyalira; nakyo ekyosĩ kikayisumba ngʼolũsĩ lwʼeNĩlĩ, kandi kyasyahotoka ndeke ngʼolũsĩ lwʼeNĩlĩ lwʼeMĩsĩrĩ.

⁶ Oyũkahĩmba esyongonde syʼendata siwe syʼomo matũkũ, kandi abirihanda ekibanza kyʼekitanda kiwe oko kihugo; oyukabirikira amagetsi wʼengetsi, nʼerĩũtago oko kihugo: Omwami Mukulu lyo lĩna liwe.

⁷ Omwami Mukulu ati, Ĩnywe bana ba Ĩsraelĩ, Simuli ũkwʼĩngye ngʼabana bʼeEtĩopĩa kwehĩ? Mondalũsya Ĩsraelĩ yʼomo kihugo kyʼeMĩsĩrĩ, nʼAbafĩlĩstĩnĩ eKafũtorĩ, nʼAbasũrĩa eKĩrĩ kwehĩ?

⁸ Lebaya, ameso wʼomukama, Omwami Mukulu ali oko bwami bwʼebibi, nage nasyaheryabo erĩlũa oko bugali bwʼekihugo; nĩkwa Omwami Mukulu ati, Sĩndĩendĩsyaherya ekĩtũnga kya Yakobo kyo kutsibu.

⁹ Kusangwa, lebaya, ngahamula, nasyasenzegeta ekĩtũnga kya Ĩsraelĩ omo katĩkatĩ kʼebihanda byosĩ, ngʼengano kwʼikasenzegetawa omo kisenzegeto, nĩkwa sihali embuto nʼenguma eyasyatogera oko kitaka.

¹⁰ Abakola-nabi bosĩ omo bandu bage basyahola omo mũyalĩ, abakabũga bati, obũlĩge sĩbwendĩsyatũhĩkako kutse sibwendisyatubana.

¹¹ Oko kiro ekyo nasyasingika enyũmba ya Dawĩdĩ eyatera, nʼeririba ebihundu byayo; nasyahanganĩa ahasambukala, nʼerĩswahĩmbayo ngoko yabya kera;

¹² ibatoka erĩsĩgalya abasĩgalira bʼeEdomũ, nʼebihanda byosĩ ebikahulirawa oko lĩna lyage, Omwami Mukulu atya yukakola ekĩ.

¹³ Omwami Mukulu akabũga ati, Lebaya, ebiro bikasa omugulu Omũlĩmĩ asyahĩka oko mũgesĩ nʼoyukakama ebĩgũma byʼebĩnyũ asyatanga oyukahera embuto; nʼebitwa byasyatogongya ebĩnyũ bĩsĩhĩre, nʼehitwa hyosĩ hyasyasendekerera.

¹⁴ Nage nasyasũbũlya abandu bage Ĩsraelĩ oko banyegwa, nabo basyahĩmba emĩyĩ eyatsanda, nʼerĩĩkala muyo; kandi basyahera amalima wʼebĩnyũ, nʼerĩpũlya ebĩnyũ byago, basyalima amalima nibya, nʼerirya akalyo kago.

¹⁵ Nage nasyahandabo oko kitaka kyabo, isibendisyaswakulwa omo kihugo kyabo ekyo nabirihabo, Omwami Mukulu, Nyamuhanga wawe atya.