Amosĩ 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisuyira lya Nyamuhanga busana nʼabakamũsĩga-sĩganaya

¹ Obũlĩge oko bakayĩsyandira eSĩonĩ, nʼoko bandu bĩkere buholo omo kitwa kyʼeSamarĩa, abandu abaminyikere ni bakulu bʼekihanda kĩlabĩre ebindi, abo ekihanda kya Ĩsraelĩ kĩkahĩkako.

² Mulabe eKalne, mũlebaye; nʼerĩlũa eyo muye eHamatĩ mukulu; neryo mwandagalire eGatĩ yʼAbafĩlĩstĩnĩ; ibo ni babuya kwilaba amami aya kwehĩ? Kutse ekihugo kyabo ni kinene kwilaba ekyenyũ kwehĩ?

³ Ĩnywe mũkasegeraya ekiro kibi, nʼerĩyĩsegeryako ekĩtũmbĩ kyʼomwaga kwehĩ?

⁴ Abandu abakagotsera oko ngyingo syʼameno wʼesyonzogũ, nʼerĩyĩkakĩrya oko ngotsero syabo, nʼerirya ebyana byʼesyombũlĩ ebiri omo bĩhyo, nʼebyana byʼesyonde bĩkalũa omo kibungo.

⁵ Abakimba esyonyimbo nyitya-nyitya omo mulenge wʼenanga, abakayĩtsũkĩra esyonyimbo nga Dawĩdĩ.

⁶ Abakapũlaya ebĩnyũ omo bibindi omugulu bakayĩhakabaya amagũta mabuya kutsibu; nĩkwa sĩbekwa obũlĩge busana nʼomunubo wa Yosefũ.

⁷ Busana nʼekyo bakandigenda omo bunyegwa haguma nʼabandu bʼerĩmbere abakaya omo bunyewa; nʼerirya lyʼabandu bakayĩkakaya lyasyahwa.

⁸ Omukama, Omwami Mukulu abĩrĩyĩlahĩryako, Omwami Mukulu, Nyamuhanga Wʼemilondo ati, Ngakwa obubuya bwa Yakobo bo nye, kandi ngakwa ebikali biwe byʼobusu; busana nʼekyo nasyahotera omũyĩ nʼebyosĩ birimo.

⁹ Neryo abandu ĩkũmĩ bamasĩgalira omo nyũmba nguma, basyahola.

¹⁰ Neryo ĩse-mulere wʼomundu, kutse oyukamuta, asyamusumba, erĩlũsya amakũha wuwe gʼomo nyũmba, neryo asyabwira oyuli omo kisenge kyʼenyũmba ati, Hakine ogundi mundu haguma nawe kwehĩ? Naye asyabũga ati, Sihali mundu. Neryo asyabũga ati, Uhune. Kusangwa erĩna lyʼOmwami Mukulu siritolere eriahulwa.

¹¹ Kusangwa, lebaya, Omwami Mukulu akandihana ati enyũmba nene itulangawe mo bitswe-bitswe, nʼenyũmba nge itulangawe mo hitswe.

¹² Esyosabayĩrĩ syanasyatibita oko mabwe kwehĩ? Kutse omundu anasyalima mabwe omo syonume syʼesyonde kwehĩ? Nĩkwa ĩnywe mwabirihindula erĩbanza lyʼekwenene mo buti, nʼebĩgũma byʼeritunganene mo bĩkalĩhĩre.

¹³ Ĩnywe mukatsemera ekindu kitya-kitya, ĩmũkabũga muti, Motutayihambira amahembe abiri omo maka wetu kwehĩ?

¹⁴ Kusangwa Omwami Mukulu, Nyamuhanga Wʼemilondo akabũga ati, Ĩnywe nyũmba ya Ĩsraelĩ, lebaya, nasyahanganĩa ekihanda kyʼerilwa nenyũ; nakyo kyasyabanũbya-nũbya erĩtsũka ahʼeriingira hʼeHamatĩ erĩhĩka oko kũsĩ kʼeAraba.