Amosĩ 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Mũsonda-sondaye Nyamuhanga imomwakota

¹ Uwe kĩtũnga kya Ĩsraelĩ, mowe ekĩnywa ngabaletera ekĩ eribalirirako.

² Omukondo ye Ĩsraelĩ abiriwa, siendisyaswahangana; agotsere ahisi ĩyowene oko kihugo kiwe; sihali mundu oyo wasyamũhanganĩa.

³ Kusangwa Omukama, Omwami Mukulu akabũga ati, Omũyĩ owahuluka kwʼeelfu nguma, asyasaka kwʼerĩgana liguma, nʼowahuluka kwʼerĩgana, asyasaka kwʼerĩkũmĩ oko nyũmba ya Ĩsraelĩ.

⁴ Kusangwa Omwami Mukulu akabũga nʼekĩtũnga kya Ĩsraelĩ ati, Mũnyĩsonda-sondaye imwatoka eribyaho.

⁵ Nĩkwa sĩmũsonda-sondaye eBetelĩ, kutse simwingire eGĩlĩgalĩ, kutse simulabe eBerĩ-seba; kusangwa kwenene eGĩlĩgalĩ yasyaya omo bunyegwa, nʼeBetelĩ yasyabya buyira.

⁶ Mũsonda-sondaye Omwami Mukulu imomwabyaho; Omwami Mukulu akasyahĩka oko kĩtũnga kya Yosefũ ngʼomuliro nago iniagulumira, isihali oyo wangalĩmyago eBetelĩ.

⁷ Ĩnywe mukahindula erĩbanza libuya eribya ekĩkalĩhĩre, nʼerigusa eritunganene lyʼahisi oko kitaka.

⁸ Oyo wahangika eKĩlĩmĩa nʼeOrĩonĩ, nʼeribindula omwʼĩrĩmya owakalĩre eribya ngyakya-ngyakya, nʼerĩhĩra eritungi mo mwĩrĩmya wʼekiro; oyukabirikira amagetsi wʼengetsi erĩũtago oko bulambo bwʼekitaka, Omwami Mukulu lyo lĩna liwe.

⁹ Oyukabutuka erĩherya bandu bʼamaka, kikaleka eritsanda ĩryahĩka oko hakongotere.

¹⁰ Bakakwa obusu oyukakunga omo lũkyo kandi bakapona kutsibu oyũkabũga ebitunganene.

¹¹ Busana nʼekyo mũkalĩhĩsaya engemu yʼengano; mwabĩrĩhĩmba amanyũmba wʼamabwe awabatsĩre nĩkwa sĩmwendĩsyĩkala mugo; mwabirihera amalima wʼebĩnyũ wʼerĩtsemesya, nĩkwa sĩmwendĩsyapũlya ebĩnyũ byago.

¹² Kusangwa nyĩnasĩ obungi bwʼamalolo wenyũ, nʼebibi byenyũ ko biri bitsibu, ĩnywe mũkanũbaya abatunganene, nʼerĩĩmya esigulo, kandi mukahiga abera omo lũkyo.

¹³ Busana nʼekyo, omundu mũgeregetanĩa asyahuna oko mugulu ngʼoyũ; kusangwa ni mugulu mubi.

Basonde-sonde Nyamuhanga

¹⁴ Mũsondaye ebibuya, butsira ebibi, imomwabyaho; litya Omwami Mukulu, Nyamuhanga Wʼemilondo atoke eribya haguma nenyũ, ngoko mwabĩrĩbũga.

¹⁵ Mwagalirawe oko bibi, mwanze ebibuya; mũhanganaye erĩbanza litunganene omo lũkyo; Omwami Mukulu Wʼemilondo aganyire amasĩgalira wa Yosefũ.

Eririra

¹⁶ Busana nʼekyo, Omwami Mukulu, Nyamuhanga Wʼemilondo, Omukama, akabũga ati, Eririra likabya omo bibuga byosĩ; kandi bakabũga omo syonzira syosĩ bati, Ĩyooo! Ĩyooo! basyabirikira, Omũlĩmĩ eririra, nʼabawite amenge wʼeririra busana nʼeririra.

¹⁷ Omwami Mukulu ati, omo malima gosĩ wʼebĩnyũ hakabya ekiriro; kusangwa nasyalaba omo katĩkatĩ kenyũ.

¹⁸ Obũlĩge ũkwʼĩnywe mũkakwa olukando lwʼekiro kyʼOmwami Mukulu, ekiro kyʼOmwami Mukulu kyasyabyakĩ busana nenyũ kwehĩ? Kyasyabya mwĩrĩmya, isi kyakakala;

¹⁹ ngʼomundu oyo wasaga endale mwaswahĩndana nʼedubu, kutse akaya omo nyũmba eka nʼerĩegemerya ebyala byʼoko lũhĩmbo, nʼenzoka yikamuluma.

²⁰ Kwe kiro kyʼOmwami Mukulu sikyendisyabya mwĩrĩmya butsira kyakakala kwehĩ? Omwĩrĩmya munene, isihali erikanga mugo kwehĩ?

²¹ Ngakwa ebiro bikulu byenyũ byʼobusu, nʼerigana erirya ĩnene lyenyũ, kandi Sinditsemera esyondeko syenyũ sĩbũyĩrĩre.

²² Nomo mwanganyiherera amahere wenyũ wʼerĩokererya, nʼamahere wenyũ wʼengano, sĩndĩendĩsyalĩgago; kandi sĩndĩendĩsyalebya amahere wʼobuholo wʼesyonyama syenyũ sĩnenehĩre.

²³ Mũnyĩlũsaye kwʼamahira-mahira wʼesyonyimbo syenyũ; kusangwa sĩndĩendĩsyowa omulenge wʼesyonanga syenyũ.

²⁴ Nĩkwa erĩbanza lisende ngʼamagetsi, nʼeritwangana ngʼolũsĩ olukasenda emigulu yosĩ.

²⁵ Uwe kĩtũnga kya Ĩsraelĩ, mowanyiretera esyohongo nʼobuhere bwʼengano omo mbwarara emyaka makũmĩ ani kwehĩ?

²⁶ Kandi momwaheka ehema yʼOmwami wenyũ Sĩkũtĩ, nʼobuhima bwa Kĩũnĩ, nʼesyosanamu syenyũ, engũnũnũ ya nyamuhanga wenyũ eyo mwayĩkokoteraya.

²⁷ Busana nʼekyo nasyaleka imwaya omo bunyegwa eyisirya wʼeDamasekĩ, Omwami Mukulu akabũga, erĩna liwe yo Nyamuhanga Wʼemilondo.