Amosĩ 4 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisuyirwa lya Ĩsraelĩ

¹ Mowe ekĩnywa ekĩ, ĩnywe nde syʼeBasanĩ esiri omo bitwa byʼeSamarĩa, abakanũbaya abera, abakalyata oko bera, abakabũga nʼabĩbabo bati, Mulete, tũpũlaye!

² Omukama, Omwami Mukulu abĩrĩlahĩrya omo bũbũyĩrĩre buwe ati, Mũlebaye ebiro byasyabahĩkako, omugulu basyabakura omo mbaniko, nʼamasĩgalira wenyũ omo mũrobĩ.

³ Omwami Mukulu ati, Mwasyahuluka omo bihundu byʼesyombĩmbo, obuli mũkalĩ asyalaba embere siwe; nenyũ mwasyayigusa eHarmonĩ.

⁴ Mwingire eBetelĩ, mũhalaye, eGĩlĩgalĩ mũkanyaye amalolo; mulete esyohongo syenyũ obuli ngyakya-ngyakya, nʼerĩgabo lyenyũ lyʼerĩkũmĩ obuli biro bisatu.

⁵ Muhere obuhere bwʼeriha ewasĩngya obuli kwʼekĩhamya, mũtũle omwatsi wʼamahere wʼerianza erĩhĩtya, mũtũlaganaye engulu yago. Kusangwa litya mwanzĩre erikola, ĩnywe bana ba Ĩsraelĩ, Omukama, Omwami Mukulu akabũga atya.

⁶ Omwami Mukulu ati, Nĩkwa nabiribaha eriera lyʼameno omo mĩyĩ yenyũ yosĩ, nʼobwaga bwʼakalyo aho wenyũ hosĩ; nĩkwa simwetasuba aho nyiri.

⁷ Kandi nabĩrĩkakĩrya embũla busana nenyũ, omugulu habya hakĩsĩya mikera ĩsatu yʼobugese. Kandi nabĩrĩwĩsya embũla oko mũyĩ muguma, nʼerireka iyitawa oko gundi mũyĩ; ekihande kiguma mokyawa kwʼembũla, nʼekihande ekitawako embũla mokyuma.

⁸ Omwami Mukulu ati, Neryo emĩyĩ ĩbĩrĩ kutse ĩsatu moyayiwako oko mũyĩ muguma erĩpũlya amagetsi, nĩkwa moyĩtũgũta; nĩkwa simwetanyisubako.

⁹ Omwami Mukulu ati, Nabĩrĩbaswĩrya omo kĩhũhanĩ nʼekihondo. Nʼotũlũndya twabirirya amalima wenyũ mangi, nʼamalima wenyũ wʼebĩnyũ, nʼemiti yenyũ yʼemĩtĩnĩ, nʼemiti yʼeMĩzeĩtũnĩ; nĩkwa simwetanyisubako.

¹⁰ Omwami Mukulu ati, Nabiribatumira akasũsũ ngoko natumako eMĩsĩrĩ; nabĩrĩta abalwana benyũ omo mũyalĩ, haguma nʼesyosabayĩrĩ syenyũ; nabĩrĩhetũkya erikumba libi lyʼekilaliriro kyenyũ erĩhĩka omo nĩndo syenyũ; nĩkwa simwetanyisubako.

¹¹ Omwami Mukulu ati, Nabĩrĩbatĩngĩtya ngoko natĩngĩtaya eSodomo nʼeGomora, nenyũ mwabya ngʼekĩsĩnganĩkya ekikatsagurawa omo muliro; nĩkwa simwetanyisubako.

Ũyĩtegekanaye erĩhĩndana na Nyamuhanga

¹² Busana nʼekyo uwe Ĩsraelĩ, ko nasyakukola nyitya; kusangwa nasyakukola ekĩ; uwe Ĩsraelĩ, ũyĩtegekanaye erĩhĩndana na Nyamuhanga wawe.

¹³ Kusangwa lebaya, oyo wahangika ebitwa, nʼoyo wahangika erihunga, nʼerĩtũlĩra omundu yʼamalengekanĩa wuwe; oyukayira engyakya-ngyakya eribya mwĩrĩmya, nʼoyukalyatanga ahʼendata hʼekihugo, Omwami Mukulu Nyamuhanga Wʼemilondo, lyo lĩna liwe.