Amosĩ 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritswera lya Nyamuhanga oko bihanda

¹ Ebĩnywa bya Amosĩ oyo wabya muguma gʼoko balĩsya bʼeTekoa, ebyo alangira busana na Ĩsraelĩ omo biro bya Ũzĩa omwami wʼeYũda, nʼomo biro bya Yeroboamũ mugala wa Yoasĩ omwami wʼeĨsraelĩ, emyaka ĩbĩrĩ embere wʼomũsĩkĩ wʼekitaka.

² Neryo mwabũga ati, Omwami Mukulu asyahaya erĩlũa eSĩonĩ, asyahũlũkya omulenge wuwe erĩlũa eYerũsalema; nʼamalĩsĩryo wʼabalĩsya asyalira, nʼesingi yʼeKaramelĩ ikuma.

³ Omwami Mukulu akabũga ati, Busana nʼamalolo asatu wʼeDamasekĩ, ega busana nʼawani, sĩendĩsyakakĩrya erisuyira lyako; kusangwa babĩrĩhũmba eGĩleadĩ yʼomo mĩhũmbo yʼebyuma.

⁴ Nĩkwa nasyatuma omuliro oko kĩtũnga kya Hazaelĩ, nago asyatogotya ekikali kya Benĩhadadĩ.

⁵ Omwami Mukulu akabũga ati, Nasyabũna engomo yʼeDamasekĩ, nasyĩtĩra esyondũlanĩ syʼomo musya wʼeAwenĩ nasyĩta oyuwite oko mũtso wʼobwami erĩlũa omo kĩtũnga kyʼeEdenĩ; nʼabandu bʼeSũrĩa basyaya omo bunyegwa eKĩri.

⁶ Omwami Mukulu akabũga ati, Busana nʼamalolo asatu wʼeGaza, ega, busana nʼawani, sindiendisyakakĩrya erisuyira lyabo; kusangwa mobatwala abandu bosĩ mo banyegwa, erihabo oko Edomũ.

⁷ Nĩkwa nasyatuma omuliro oko lũhĩmbo lwʼeGaza, nago asyatogotya ebikali byako.

⁸ Kandi ati, Nasyĩta endũlanĩ yʼeAsĩdodĩ nibya, nʼoyuwite oko mũtso wʼobwami bwʼeAskelonĩ; nasyasumba ebyala byage erilwa na Ekronĩ; nʼAbafĩlĩstĩnĩ abasaka basyatĩnda.

⁹ Omwami Mukulu akabũga ati, Busana nʼamalolo asatu wʼeTĩro, ega, busana nʼawani, sindiendisyakakĩrya erisuyira lyako; kusangwa mobahotera ekihanda kyosĩ kyʼeEdomũ, mobatibuka endagano yʼabagala babo.

¹⁰ Nĩkwa nasyatuma omuliro oko lũhĩmbo lwʼeTĩro, nago asyatogotya ebikali byako.

¹¹ Omwami Mukulu akabũga ati, Busana nʼamalolo asatu wʼeEdomũ, ega busana nʼawani, sindiendisyakakĩrya erisuyira lyako, kusangwa mwakwama mugala wabo yʼomo mũyalĩ, kandi mwalũmya eriganyira liwe lyosĩ, nʼerihitana liwe molyasatangya emigulu yosĩ, kandi mwabika erihitana liwe ebiro byosĩ.

¹² Nĩkwa nasyatuma omuliro oko Temanĩ, nago asyatogotya ebikali byʼeBozĩra.

¹³ Omwami Mukulu akabũga ati, Busana nʼamalolo asatu wʼabana ba Amonĩ, ega, busana nʼawani, sindiendisyakakĩrya erisuyira lyako; kusangwa babĩrĩlandũla abakule bʼeGĩleadĩ, ibatoka eritomeka oko mitano yabo.

¹⁴ Omwami Mukulu ati, Nĩkwa nasyakya omuliro oko lũhĩmbo lwʼeRaba, nago asyatogotya ebikali byako, omwʼĩũta obogo oko kiro kyʼamalwa, nʼomo kitunzyo oko kiro kyʼakanyabungu.

¹⁵ Omwami wabo asyagenda ngʼomunyegwa, iye haguma nʼabanyamwami buwe haguma, Omwami Mukulu atya.