Abatswerĩ 9 - AMASAKO ABOYTRTRE WA NYAMUHANGA AWAKAHULAWA MO BIBLIA

Abĩmelekĩ akĩta abagala ba Yerũbalĩ

¹ Na Abĩmelekĩ mugala wa Yerũbalĩ mwaya eSekemũ oko wabo nyĩnyalume, mwakanĩa nabo, nʼekĩtũnga kyosĩ kyʼekihanda kyʼabĩse-kulu wuwe, ati,

² Ngabasaba nyiti, Mũtũlĩrego omo matwĩ wʼabandu bosĩ bʼeSekemũ, muti, Ekibuya busana nenyũ ni kyahi, abagala bosĩ ba Yerũbalĩ, abandu makũmĩ alinda, babatabaleko, kutse omuguma abatabaleko kwehĩ? Mwibuke ngoko indi ĩkũha lyenyũ nʼomubiri wenyũ.

³ Neryo abonyĩnya-lume wuwe mobatũlĩrago omo matwĩ wʼabandu bʼeSekemũ busana naye ebĩnywa byosĩ ebĩ; nʼemitima yabo moyabinduka erikwama Abĩmelekĩ; kusangwa babũga bati, Iye ni mugala wetu.

⁴ Kandi mobamuha ebĩtsĩpa makũmĩ alinda ebĩkalũa omo nyũmba ya Balĩ-berĩtĩ, mubyo Abĩmelekĩ mwayibanira abandu batya-batya nʼababi, abamukwama.

⁵ Kandi mwaya oko kĩtũnga kya tata wuwe eOfra, mwĩta abagala babo, ba bagala ba Yerũbalĩ, abandu makũmĩ alinda, okwʼĩbwe iguma; nĩkwa Yotamũ endũngo ya Yerũbalĩ mwasĩgala; kusangwa mwayĩbĩsa.

⁶ Nʼabandu bosĩ bʼeSekemũ mobayĩhĩndanĩa haguma nʼabandu bosĩ bʼeBetĩ-Mĩlo, mobayasĩngya Abĩmelekĩ mo mwami, hakũhĩ nʼeterebĩntĩ yʼendũyĩ eyabya eSekemũ.

Omũsyo wʼemiti

⁷ Neryo omugulu babwira Yotamũ, Yotamũ mwayimana oko kitwa kyʼeGerĩzĩmũ mwagusa omulenge wuwe, mwabirikira mwabwirabo ati, Mumbulikirire, ĩnywe balume bʼeSekemũ, Nyamuhanga abane erĩbowa.

⁸ Ekiro kiguma emiti moyayasĩngya omwami wayo erĩmũhakabya amagũta; kandi moyabũga nʼomuti mũzeĩtũnĩ iti, Ututabaleko.

⁹ Nĩkwa omuti wʼomũzeĩtũnĩ mwabwirayo ati, Ngandĩsĩganĩa amagũta wage awakaleka ĩbasĩkya Nyamuhanga nʼabandu, inagenda nʼerĩyĩhũnga-hũngya endata oko miti kwehĩ?

¹⁰ Nʼemiti moyabwira omuti wʼomũtĩnĩ iti, Nawe wase ututabaleko.

¹¹ Nĩkwa omuti wʼomũtĩnĩ mwabwirayo ati, Nasĩga obusi, nʼebĩgũma bibuya byage, inayayĩhũnga-hũngya endata oko miti kwehĩ?

¹² Neryo emiti moyabwira omũlĩkĩ wʼebĩnyũ iti, Wase ututabaleko.

¹³ Nĩkwa omũlĩkĩ wʼebĩnyũ mwabwirayo ati, Nangasĩga ebĩnyũ byage bihya-bihya ebĩkatsemesaya Nyamuhanga nʼabandu nʼerĩyayĩhũnga-hũngya endata oko miti kwehĩ?

¹⁴ Neryo emiti yosĩ moyabwira omusakisaki iti, Wase ututabaleko.

¹⁵ Nʼomusakisaki mwabũga nʼemiti ati, Mwamanyĩhakabya amagũta kwenene eribya mwami wenyũ, mwase musagire omo kyũtũtũ kyage; bite bitya, omuliro alũe omo musakisaki ahĩsĩrĩraye emĩerezĩ yʼeLebanonĩ.

¹⁶ Neryo lino mwamabya mwabirikola kwenene nʼebitunganene, eriyira Abĩmelekĩ mo mwami, kandi mwamabya mwabirikola Yerũbalĩ yo ndeke nʼekĩtũnga kiwe, kandi imwabirimukolera ngoko limutolere;

¹⁷ kusangwa tata wage mwabalwira, kandi mwatsama engebe yiwe nʼerĩbalamya omo byala byʼAbamĩdĩanĩ.

¹⁸ Nĩkwa mwabiribambira ekĩtũnga kya tata wage mũnabwĩre, kandi mwabĩrĩta bagala buwe, makũmĩ alinda, endata okwʼĩbwe iguma, kandi mwabiriyira Abĩmelekĩ omugala wʼomũhwekĩ wuwe eribya mwami oko bandu bʼeSekemũ, kusangwa iye ni mugala wenyũ;

¹⁹ neryo mwamabya mwabirikolera Yerũbalĩ nʼekĩtũnga kiwe kwenene ebitunganene mũnabwĩre, neryo mutsemere Abĩmelekĩ, naye abatsemere.

²⁰ Nĩkwa bite bitya, omuliro ahuluke ewa Abĩmelekĩ, ahĩsĩrĩraye abandu bʼeSekemũ, nʼeBetĩ-Mĩlo, kandi omuliro ahuluke ewʼabandu bʼeSekemũ nʼeBetĩ-Mĩlo ahĩsĩrĩraye Abĩmelekĩ.

²¹ Neryo Yotamũ mwatibita, mwasaga, mwaya eBeerĩ, mwĩkalayo, busana nʼeriubaha Abĩmelekĩ mugala wabo.

Abĩmelekĩ akalwa nʼeSekemũ nʼeTebezĩ

²² Neryo Abĩmelekĩ mwatabalira Ĩsraelĩ emyaka ĩsatu.

²³ Neryo Nyamuhanga mwatuma ekĩrĩmũ kibi omo katĩkatĩ ka Abĩmelekĩ nʼabandu bʼeSekemũ; nʼabandu bʼeSekemũ mobabya nyengehabiri uku Abĩmelekĩ.

²⁴ Neryo omwaga owakolawa oko bagala makũmĩ alinda ba Yerũbalĩ ahĩke, nʼomusasi wabo ahĩrawe uku Abĩmelekĩ mugala wabo, oyo wĩtabo, nʼoko bandu bʼeSekemũ, abamwimira erĩĩta bagala babo.

²⁵ Nʼabandu bʼeSekemũ mobahĩra ekĩrĩmbyo busana naye oko singi syʼebitwa, neryo mobanyega bandu bosĩ abalaba hakũhĩ nabo omo nzira eyo; na Abĩmelekĩ mwabwirwa.

Galĩ akaya embĩta busana na Abĩmelekĩ

²⁶ Neryo Galĩ mugala wa Ebedĩ mwahĩka haguma nʼabagala babo, neryo mobasokera eSekemũ; nʼabandu bʼeSekemũ mobamũlĩga.

²⁷ Kandi mobaya omwʼirima, moboha ebĩgũma byʼamalima wʼebĩnyũ wabo, mobakamabyo, mobatsemerabyo, kandi mobingira omo nyũmba ya nyamuhanga wabo, mobalya mobapũlya, mobalakira Abĩmelekĩ.

²⁸ Na Galĩ mugala wa Ebedĩ mwabũga ati, Ko Abĩmelekĩ nindi, na Sekemũ nindi ati tumukolere kwehĩ? Si mugala wa Yerũbalĩ kwehĩ? Na Zebũlĩ sĩ mũsondolĩ wuwe kwehĩ? Mukolere abandu ba Hamorĩ ĩse wa Sekemũ; nĩkwa busana nakĩ twangamukolera kwehĩ?

²⁹ Kumbe abandu aba bali omo byala byage! Neryo ĩnalũsya Abĩmelekĩ. Neryo mwabwira Abĩmelekĩ ati, Tomekera omulondo wawe wʼabasĩrĩkanĩ, uhuluke.

³⁰ Neryo omugulu Zebũlĩ omũtabalĩ wʼomũyĩ owa ebĩnywa bya Galĩ mugala wa Ebedĩ, erihitana liwe molyaka.

³¹ Neryo mwatuma abakwenda nʼamenge uku Abĩmelekĩ, ati, Lebaya, Galĩ, mugala wa Ebedĩ nʼabagala babo bamahĩka eSekemũ; kandi lebaya, bakaleta omwaga gʼomo mũyĩ erikubambira.

³² Na lino, hangana omo kiro haguma nʼabandu abali haguma nawe, ulambirebo okolĩ.

³³ Neryo, omo ngyakya-ngyakya, omugulu eryuba likahuluka, imwabuka lũba nʼeriyabambira omũyĩ oyo; neryo, omugulu iye nʼabandu abali haguma naye bakahuluka erikubambira, iwakolabo ngoko wangatoka.

³⁴ Neryo Abĩmelekĩ mwahangana nʼabandu bosĩ ababya haguma naye, omo kiro mobayalĩmbya eSekemũ omo milondo ĩnĩ.

³⁵ Neryo Galĩ omugala wa Ebedĩ mwahuluka, mwimana omo kyaswa kyʼolũkyo lʼomũyĩ. Na Abĩmelekĩ mwahangana, nʼabandu ababya haguma naye, okwʼĩrĩmbya.

³⁶ Omugulu Galĩ alangira abandu, mwabwira Zebũlĩ ati, Lebaya, abandu bakandagala omo singi syʼebitwa. Na Zebũlĩ mwamubwira ati, Ukalangira ekyũtũtũ kyʼebitwa ngʼabandu.

³⁷ Na Galĩ mwabũga kandi ati, Langira, abandu bakandagala omo katĩkatĩ kʼekihugo, nʼomulondo muguma akasa omo nzira yʼomuti wʼeterebĩntĩ Meonenĩmũ.

³⁸ Neryo Zebũlĩ mwamubwira ati, Obuno bwawe bulihi rino, ebyo wabũga uti, Abĩmelekĩ nindi, tumukolere kwehĩ? Aba si ba bandu wapona kwehĩ? Huluka lino, ulwe nabo.

³⁹ Na Galĩ mwahuluka embere syʼabandu bʼeSekemũ, mwalwa na Abĩmelekĩ.

⁴⁰ Na Abĩmelekĩ mwamutibitako, naye mwasaga embere siwe, nʼabangi mobawa mobahutangala, erĩhĩka ekyaswa oko lũkyo lwʼomũyĩ.

Abĩmelekĩ akaheraya Sekemũ

⁴¹ Na Abĩmelekĩ mwĩkala eArũma; na Zebũlĩ mwahiga Galĩ nʼabagala babo sĩbĩkale eSekemũ.

⁴² Neryo engyakya, abandu mobaya omolĩ; kandi mobabwira Abĩmelekĩ.

⁴³ Naye mwĩmya abandu, mwagababo mo milondo ĩsatu, mwalambirabo omolĩ; neryo mwalangira, neryo lebaya, abandu mobalũa oko mũyĩ; neryo Abĩmelekĩ mwahangana nʼeribambirabo, kandi mwĩtabo.

⁴⁴ Na Abĩmelekĩ, nʼemilondo eyabya haguma naye mobanguha embere, mobimana omo kyaswa oko lũkyo lʼomũyĩ; nʼeyindi milondo ĩbĩrĩ moyanguha oko bosĩ ababya omolĩ mobĩtabo.

⁴⁵ Na Abĩmelekĩ mwalwa nʼomũyĩ ekiro kyosĩ ekyo; mwahũnga omũyĩ oyo, mwĩta abandu ababyamo; neryo mwasambula omũyĩ, mwapanzirako omũnyũ.

Abĩmelekĩ akahĩsaya enyũmba eyĩsũngũlĩkĩre yʼeSekemũ

⁴⁶ Kandi omugulu abandu bʼenyũmba eyĩsũngũlĩkĩre yʼeSekemũ bowa omwatsi oyo, mobingira ahakongotere hʼenyũmba ya Elberĩtĩ.

⁴⁷ Na Abĩmelekĩ mwabwirwa ambu abandu bosĩ bʼomo nyũmba eyĩsũngũlĩkĩre yʼeSekemũ bamahĩndana haguma.

⁴⁸ Na Abĩmelekĩ mwahetuka oko kitwa kyʼeSalmonĩ, iye nʼabandu bosĩ ababya haguma naye; neryo Abĩmelekĩ mwĩmya embasa omo byala biwe, mwakonda Omutahi wʼomuti, mwĩmyago mwahĩrago oko kitigo kiwe; neryo mwabwira bandu ababya haguma naye ati, Ngoko mwamalangira ngakola, mwanguhe mukole ngoko ngakola.

⁴⁹ Nʼabandu bosĩ mobakonda obuli mundu Omutahi wuwe, mobakwama Abĩmelekĩ, mobĩkyayo oko kyumba kyʼomwisi ahakongotere, mobakĩrya omuliro oko bandu ababya omo kyumba kyʼomwisi; neryo abandu bosĩ bʼenyũmba eyo eyĩsũngũlĩkĩre yʼeSekemũ ko bahola batya, abalume nʼabakalĩ nga elfu nguma.

Abĩmelekĩ akakwĩra eTebesĩ

⁵⁰ Neryo Abĩmelekĩ mwaya eTebesĩ, mwahanda endwiro eribambira eTebesĩ, kandi mwakĩndago.

⁵¹ Nĩkwa habya enyũmba eyĩsũngũlĩkĩre omo mũyĩ oyo, abalume nʼabakalĩ bosĩ mobatibitaho, nʼabosĩ bʼomũyĩ oyo, mobayikingiramo, mobasamba oko lutwe olwʼenyũmba eyĩsũngũlĩkĩre eyo.

⁵² Na Abĩmelekĩ mwahĩka oko nyũmba eyĩsũngũlĩkĩre ati ahĩsayeyo omo muliro.

⁵³ Nʼomũkalĩ muguma mwagusa engasĩrya oko mutwe wa Abĩmelekĩ moyatula erĩhanga liwe.

⁵⁴ Neryo Abĩmelekĩ mwabirikira lũba omũlwana omũhekĩ wʼebindu biwe byʼamalwa, mwamubwira ati, Kula omũyalĩ wawe, ũnyĩte, abandu bakasyabũga bati, Omũkalĩ mwamwĩta. Nʼomũlwana oyo mwamũlũba gomo, mwahola.

⁵⁵ Nʼomugulu abandu ba Ĩsraelĩ balangira ngoko Abĩmelekĩ amabihola, mobomboloka obuli mundu aho wuwe.

⁵⁶ Litya Nyamuhanga mwakĩsya ebibi bya Abĩmelekĩ, ebyo akolera tata wuwe, erĩĩta abagala babo amakũmĩ alinda.

⁵⁷ Kandi mwakĩsĩrya ebibi byosĩ byʼabandu bʼeSekemũ oko mitwe yabo; nʼeritakira lya Yotamũ omugala wa Yerũbalĩ molyahĩka kubo.