Abatswerĩ 8 - AMASAKO ABOYTRTRE WA NYAMUHANGA AWAKAHULAWA MO BIBLIAGĩdeonĩ akakanaya nʼAbaefũraĩmũ 1 Nʼabandu ba Efũraĩmũ mobamubwira bati, Busana nakĩ wamatukola utya mutatubirikira, omugulu wayalwa na Mĩdĩanĩ kwehĩ? Mobamuhayira kutsibu. 2 Naye mwabũga nabo ati, Namatakolakĩ ebiri ngʼekyo mwakola kwehĩ? Amasĩgalira wʼebĩgũma byʼebĩnyũ bya Efũraĩmũ si mabuya kwilaba ebĩnyũ byʼeAbĩezerĩ kwehĩ? 3 Nyamuhanga abĩrĩhĩra omo byala byenyũ abasondolĩ ba Mĩdĩanĩ, Orebũ na Zebũ. Nage monatoka erikolakĩ ngʼebyo mwakola kwehĩ? Neryo erihitana lyabo molyũmbya busana naye, omugulu abũga ebyo. Abasũkotĩ bakĩma Gĩdeonĩ yʼamandu 4 Neryo Gĩdeonĩ mwahĩka eYorodanĩ, mwasokera eyisirya, iye nʼabandu magana asatu (300) ababya haguma naye, ibamabiluha, nĩkwa ibakinakwamirira. 5 Kandi mwabũga nʼabandu bʼeSũkotĩ, ati, Kĩsĩ-kĩsĩ, muhe abandu abangwamĩre bʼamandu; kusangwa bamaluha, kandi ngakwamirira Zeba na Salmũna, abami bʼeMĩdĩanĩ. 6 Neryo abasondolĩ bʼeSũkotĩ mobabũga bati, Ebyala bya Zeba na Salmũna biri lino omo byala byawe, uti tuhe abasĩrĩkanĩ bawe bʼobundu kwehĩ? 7 Neryo Gĩdeonĩ mwabũga ati, Busana nʼekyo omugulu Omwami Mukulu abĩrĩhĩra Zeba na Salmũna omo byala byage, neryo nasyaswĩrya emibiri yenyũ omo misaki-saki nʼamahwa byʼomo mbwarara. 8 Kandi mwahetukira ePenũelĩ mwabũga nabo atya nibya; nʼabandu bʼePenũelĩ mobamũsũbĩrya ngʼabandu bʼeSũkotĩ ko bamũsũbĩraya. 9 Naye mwabũga nʼabandu bʼePenũelĩ ati, Omugulu nasyasubula nʼobuholo nasyaterya enyũmba eyĩsũngũlĩkĩre eyĩ. Erihambwa lya Zeba na Salmũna 10 Nĩkwa Zeba na Salmũna babya eKarkorĩ, haguma nʼabasĩrĩkanĩ babo, abandu nga elfu ĩkũmĩ nʼĩtanu (15,000), abosĩ abasaka oko basĩrĩkanĩ bʼabandu bʼendata; kusangwa mohawa bandu abakakula omũyalĩ elfu erĩgana nʼamakũmĩ abiri (120,000). 11 Kandi Gĩdeonĩ mwahetuka omo nzira yʼabandu ababya bĩkere omo mahema ebwanga bwʼendata bwʼeNoba nʼeYogĩbeha, kandi mobabambira endwiro, omugulu endwiro ĩtasĩ. 12 Omugulu Zeba na Salmũna batibita; Gĩdeonĩ mwakwamabo; neryo mwahamba abami babiri bʼeMĩdĩanĩ, Zeba na Salmũna, neryo mwakĩnda abasĩrĩkanĩ babo bosĩ. Gĩdeonĩ akakangĩrĩraya abakulu bʼeSũkotĩ bʼomo mahwa 13 Na Gĩdeonĩ mwasubula erĩlũa oko malwa eyiri obwiruka bwʼeHeresĩ. 14 Neryo mwahamba omũlwana wʼabandu bʼeSũkotĩ, neryo mwamũbũlya ewahi; naye mwamũmĩnyĩsya emyatsi yʼabanya-mwami bʼeSũkotĩ, nʼabakulu bayo, abandu makũmĩ alinda. 15 Neryo mwahĩka oko bandu bʼeSũkotĩ, mwabũga ati, Lebaya Zeba na Salmũna, abo mwanyitenyerako, muti, Ebyala bya Zeba na Salmũna bane omo byala byawe, uti tuhe abandu bawe abalũhĩre obundu kwehĩ? 16 Neryo mwĩmya abakulu bʼomũyĩ, neryo mwasuyira abandu bʼeSũkotĩ omo misaki-saki nʼamahwa wʼembwarara. 17 Kandi mwaterya enyũmba eyĩsũngũlĩkĩre yʼePenũelĩ, kandi mwĩta abalume bʼomũyĩ oyo. Erĩkwa lya Zeba na Salmũna 18 Neryo mwabũlya Zeba na Salmũna ati, Kwʼabandu mwĩtĩra eTaborĩ babya bandu ba muhandakĩ kwehĩ? Nabo mobamũsũbĩrya bati, Ko banabya nga we; obuli muguma wa kubo abya asosĩre omwana wʼOmwami. 19 Naye mwabũga nabo ati, Abo babya bagala betu, abagala ba koyo wage. Ngoko Mwami Mukulu aliho, kumbe mwalĩbalayabo eribyaho, nage sĩnangabĩta nenyũ. 20 Neryo mwabwira Yeterĩ akambere kuwe ati, Hangana wĩtebo. Nĩkwa omũlwana mwatakula omũyalĩ wuwe; kusangwa mubaha, kusangwa abya iniakine mũlwana. 21 Neryo Zeba na Salmũna mobabũga bati, Uwe, uhangane utuweko; kusangwa ngoko mulume ali, nʼamaka wuwe kwʼane atya. Neryo Gĩdeonĩ mwahangana, mwĩta Zeba na Salmũna, kandi mwĩmya obutega obwabya omo bĩkya byʼesyongamia syabo. Gĩdeonĩ akasaba esyombũka syʼesyamagetsi 22 Neryo abandu ba Ĩsraelĩ mobabwira Gĩdeonĩ bati, Ututabaleko, uwe na mugala wawe, nʼomwitsikulu wawe; kusangwa wabĩrĩtũlamya omo byala bya Mĩdĩanĩ. 23 Na Gĩdeonĩ mwabwirabo ati, Sindiendibatabalako, kutse omugala wage siendisyabatabalako. Omwami Mukulu asyabatabalako. 24 Kandi Gĩdeonĩ mwabwirabo ati, Ngasonda erĩbabũlya, obuli mundu ambe esyombũka siwe syʼomo matwĩ esyo anyega. (Kusangwa babya nʼesyombũka syʼamatwĩ syʼesyamagetsi, kusangwa babya Abaĩsmaelĩ.) 25 Mobasũbĩrya bati, Tukandikuhasyo kwenene. Neryo mobasesa olukimba, obuli mundu mwagusa mulo esyombũka siwe syʼamatwĩ esyo ahũnga. 26 Nʼobũlĩto bwʼesyombũka syʼomo matwĩ syʼesyamagetsi esyo abũlaya syabya esyosekelĩ syʼesyamagetsi elfu nguma nʼamagana alinda (1,700); butaganza emisege, nʼamalingita, nʼemyenda yʼolubono eyabya oko bami bʼeMĩdĩanĩ, kandi butaganza amahulula awabya oko bĩkya byʼesyongamia syabo. 27 Neryo Gĩdeonĩ mwakokotya eefodĩ musyo, mwahĩrayo omo mũyĩ wuwe, eOfra. Na Ĩsraelĩ bosĩ mobayakwamayo omo luteto eyo; neryo moyabya ngʼekitego busana na Gĩdeonĩ nʼoko kĩtũnga kiwe. 28 Neryo Mĩdĩanĩ moyakĩndwa itya embere syʼabana ba Ĩsraelĩ, mobataswasumba emitwe yabo. Nʼekihugo mokyahumula oko myaka makũmĩ ani oko biro bya Gĩdeonĩ. Oluholo lwa Gĩdeonĩ 29 Kandi Yerũbalĩ omugala wa Yoasĩ mwayĩkala omo nyũmba yiwe. 30 Na Gĩdeonĩ abya awite abagala makũmĩ alinda abo abuta; kusangwa abya awite abakalĩ bangi. 31 Nʼomũhwekĩ wuwe oyo wabya eSekemũ, naye mwamubutira mugala, mwaluka erĩna liwe mo Abĩmelekĩ. 32 Neryo Gĩdeonĩ mugala wa Yoasĩ mwahola omo bũsyakulu bubuya, mwatabwa omo mahero wa tata wuwe Yoasĩ, eOfra wʼAbabĩezerĩ. Abaĩsraelĩ bakasubira Balĩ 33 Neryo Gĩdeonĩ abere abihola, abana ba Ĩsraelĩ mobaswakwama Balĩ omo luteto, mobayira Balĩ-berĩtĩ mo nyamuhanga wabo. 34 Nʼabana ba Ĩsraelĩ mobataswibuka Omwami Mukulu Nyamuhanga wabo, oyo walamayabo omo byala byʼesyonzĩgũ syabo oko mbande syosĩ; 35 kutse mobatakola kibuya oko kĩtũnga kya Yerũbalĩ, ye Gĩdeonĩ, ngʼebibuya byosĩ ebyo akolera Ĩsraelĩ. |
Bible in Kinandi © Bible Society of the Democratic Republic of Congo, and Bible Society of Uganda, 1980.
Bible Society of the Democratic Republic of Congo