Abatswerĩ 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Nyamuhanga akakehaya oko milondo ya Gĩdeonĩ

¹ Neryo Yerũbaalĩ (oyo nĩ Gĩdeonĩ) nʼabandu bosĩ ababya haguma naye, mobabuka omo ngyakya-ngyakya, mobalalirira oko mũsĩke wʼeyĩsoko ya Harodĩ; nʼekilaliriro kya Mĩdĩanĩ kyabya eLutambi lwʼEndata kubo hakũhĩ nʼekitwa kyʼeMore, omo musya.

² Neryo Omwami Mukulu mwabwira Gĩdeonĩ, ati, Abandu abali haguma nawe ni bangi busana nage erĩhĩra Abamĩdĩanĩ omo byala byabo, Ĩsraelĩ akasyayihalamba kwĩngye, ati, Ebyala byage byo byanyĩlamaya.

³ Na lino, ũtũlego omo matwĩ wʼabandu, uti, Oyukubaha nʼerititimana, asubule, alũe oko kitwa kyʼeGĩleadĩ. Neryo abandu elfu makũmĩ abiri nʼĩbĩrĩ (22,000) mobasubula; mohasĩgala elfu ĩkũmĩ (10,000).

⁴ Kandi Omwami Mukulu mwabwira Gĩdeonĩ ati, Abandu bakine bangi; wandagalĩrayebo oko magetsi, nage nasyalengabo busana nawe eyo. Neryo kyasyabya, oyo nasyahula nyiti, Oyũ asyagenda nawe, asyagenda nawe; nĩkwa abosĩ abo nasyahula nyiti, Oyũ siendisyagenda nawe, oyo siendisyagenda.

⁵ Kwʼandagalĩraya abandu bʼatya oko magetsi; neryo Omwami Mukulu mwabũga na Gĩdeonĩ ati, Obuli mundu oyukalyatsira amagetsi omo lulimi luwe ngʼembwa kwʼikalyatsira, wasyamũhĩra aho wuwe; kandi nibya obuli mundu oyũkakũkama akapũlya.

⁶ Nʼeriganza lyabo abalyatsirira, erĩhĩra ebyala byabo oko buno bwabo, mobabya bandu magana asatu; nĩkwa abandi bandu bosĩ mobakũkama nʼerĩpũlya amagetsi.

⁷ Kandi Omwami Mukulu mwabwira Gĩdeonĩ, ati, Oko bandu magana asatu abalialyatsirira nasyabalamya, nʼerĩhĩra Abamĩdĩanĩ omo byala byawe; litya Uleke abandi bandu bosĩ bagende, obuli mundu aho wuwe.

⁸ Neryo abandu (300) ayo mobaheka ebyalya byʼabandu omo byala byabo nʼesyongubi syabo. Neryo Gĩdeonĩ mwakũlũkya abandi balume bosĩ ba Ĩsraelĩ, obuli mundu oko hema yiwe, nĩkwa mwasĩgalira nʼabandu magana asatu (300); nʼekilaliriro kya Mĩdĩanĩ kyabya eyĩkwa kwiye omo musya.

Esyonzolĩ syʼOmunya Mĩdĩanĩ

⁹ Neryo mokyabya ekiro ekyo, Omwami Mukulu mwabũga naye ati, Wandagalire oko ndwiro; kusangwa nabĩrĩhĩrayo omo byala byawe.

¹⁰ Nĩkwa wamabya ukubaha eriandagala, wandagalire oko ndwiro na Pũra omugombe wawe.

¹¹ Neryo wasyowa ebyo bakakanĩranaya; nʼenyũma omutima wawe asyasĩkĩbwa iwatoka eriandagalira oko ndwiro. Neryo Gĩdeonĩ mwandagala na Pũra omugombe wuwe oko mutano wʼabasĩrĩkanĩ ababya omo kilaliriro.

¹² NʼAbamĩdĩanĩ nʼAbaamalekĩ nʼabandu bosĩ bʼekihande lwʼendata ibanagotsere omo musya ngʼesyongĩke omo bungi bwabo. Nʼesyongamia syabo syabya butaganzika, ngʼemisege oko mũsĩke wʼengetsi omo bungi bwasyo.

¹³ Nʼomugulu Gĩdeonĩ ahĩka, lebaya, habya omundu oyũkakanĩraya mũlĩkyabo erilota liwe; ati, Lebaya, monalotĩre esyonzolĩ; neryo lebaya, akatole kʼobundu bwʼekisusu mokakumbagala omo ndwiro yʼAbamĩdĩanĩ, mokahĩka oko hema, mokaswĩryayo nayo moyatera, kandi mokabindulayo, moyayisanza ahisi.

¹⁴ Na mũlĩkyabo mwamũsũbĩrya ati, Ekĩ si kindi go nʼomũyalĩ wa Gĩdeonĩ mugala wa Yoasĩ, omundu wa Ĩsraelĩ. Nyamuhanga abĩrĩhĩra Abamĩdĩanĩ nʼendwiro yosĩ omo byala biwe.

Gĩdeonĩ akagaba endeko

¹⁵ Neryo omugulu Gĩdeonĩ owa engulu yʼesyonzolĩ nʼeribindulwa lyasyo, mũnama nʼerĩramya; neryo mwasuba omo ndwiro ya Ĩsraelĩ, mwabũga, ati, Muhangane, kusangwa Omwami Mukulu abĩrĩhĩra endwiro yosĩ ya Mĩdĩanĩ omo byala byenyũ.

¹⁶ Kandi mwagaba abandu magana asatu (300) mo milondo ĩsatu, kandi mwahĩra esyongubi omo byala byʼabosĩ ba kubo, nʼemikongoto yʼeminaga, nʼebisosomole omwisi wʼeminaga.

¹⁷ Kandi mwabwirabo ati, Munyisamalire mukole nga ngye; neryo, lebaya, omugulu ngahĩka oko mutano wʼendwiro, neryo kyasyabya, ngoko ngakola, nenyũ mwasyakola mutya.

¹⁸ Omugulu ngabuha engubi, ĩngye nʼabosĩ abali haguma nage, nenyũ mwasyabuha esyongubi nibya oko mbande syosĩ syʼendwiro, ĩmwabũga muti, Busana nʼOmwami Mukulu, na busana na Gĩdeonĩ.

Gĩdeonĩ akasĩnga Abamĩdĩanĩ

¹⁹ Neryo Gĩdeonĩ nʼabandu erĩgana ababya haguma naye, mobahĩka oko mutano wʼendwiro okwʼĩtsũka lyʼekĩsĩsĩmũko kyʼomo katĩkatĩ, omugulu babya ĩbamabĩswahĩra omũteya. Neryo mobabuha esyongubi, kandi mobatulanga eminaga eyabya omo byala byabo.

²⁰ Omugulu emilondo ĩsatu yabuha esyongubi, nʼeritulanga eminaga, mobawata oko bisosomole omo byala byabo byʼamalembe, nʼesyongubi omo byala byabo byʼamali busana nʼeribuhasyo, kandi mobabirikira bati, Omũyalĩ wʼOmwami Mukulu nʼowa Gĩdeonĩ!

²¹ Mobahangana obuli mundu aho wuwe erĩtĩmba oko ndwiro nʼabasĩrĩkanĩ bosĩ mobatibita; mobalaka ibakatibita.

²² Nʼomugulu babuha esyongubi magana asatu (300), Omwami Mukulu mwahĩra omũyalĩ wʼobuli mundu eribindukira mũlĩkyabo, omo basĩrĩkanĩ bosĩ; nʼabasĩrĩkanĩ mobatibita erĩhĩka eBetĩsĩta ebwanga bwʼeZerera, erĩhĩka oko mutano wʼeAbelĩ-mehola, hakũhĩ nʼeTabata.

²³ Nʼabandu ba Ĩsraelĩ mobahĩndana haguma erĩlũa eNafũtalĩ, nʼerĩlũa eAserĩ, nʼerĩlũa eManase hosĩ, mobakwamirira Mĩdĩanĩ.

²⁴ Na Gĩdeonĩ mwatuma abakwenda omo kihugo kyosĩ kyʼebitwa kya Efũraĩmũ, ati, Mwandagale eribambira Mĩdĩanĩ, muyatangebo, oko bisokero erĩhĩka eBetĩ-bara nʼerĩhĩka oko lũsĩ lwʼeYorodanĩ. Neryo abandu bosĩ ba Efũraĩmũ mobabirikirwa haguma, mobĩmya ebisokero erĩhĩka eBetĩ-bara, nʼeYorodanĩ.

²⁵ Kandi mobahamba abasondolĩ babiri abʼeMĩdĩanĩ, Orebũ na Zebũ; mobĩtĩra Orebũ okwʼĩbwe ryʼeOrebũ. Na Zebũ, mobamwĩtĩra oko kikamiro kyʼebĩnyũ kyʼeZebũ, neryo mobakwamirira Abamĩdĩanĩ. Kandi mobaleta emitwe ya Orebũ na Zebũ uku Gĩdeonĩ eyisirya wʼeYorodanĩ.